ગુજરાતમાં આજ રોજ ગ્રામ પંચાયતની ચૂંટણીઓના પરિણામો માટે મતગણતરી શરૂ થઈ ગઈ છે અને તમામ તબક્કામાં ભારે ઉત્સાહ જોવા મળી રહ્યો છે. રાજ્યભરમાં કુલ 4564 ગ્રામ પંચાયતો માટે સરપંચ અને સભ્યોની ચૂંટણીઓ યોજાઈ હતી. આજથી આ પરિણામો જાહેર થવા લાગ્યા છે, જેના પગલે તમામ રાજકીય પક્ષો અને સ્થાનિક સમૂહોની નજર હવે ગ્રામ પંચાયતના માથે ટકી છે.
સંપૂર્ણ ગુજરાતમાં 58.56 લાખથી વધુ મતદાતાઓએ મતાધિકારનો ઉપયોગ કર્યો છે, જેમાં 30.48 લાખ પુરુષો અને 28.06 લાખ મહિલાઓનો સમાવેશ થાય છે. ડાંગ જિલ્લામાં સૌથી વધુ 89.54% અને પોરબંદરમાં સૌથી ઓછું 66.77% મતદાન નોંધાયું છે. ખાસ વાત એ છે કે, આ વખતની ચૂંટણીમાં કુલ 3656 સરપંચ પદ માટે 8 હજારથી વધુ ઉમેદવારો મેદાનમાં હતા, જ્યારે સભ્યપદ માટે આશરે 70 હજારથી વધુ ઉમેદવારોએ દાવેદારી કરી હતી.
રાજ્યમાં 751 ગ્રામ પંચાયતો બિનહરીફ જાહેર થઈ છે, જ્યારે 2000 જેટલી બેઠકો માટે ઉમેદવારો હતા જ નહીં. રાજકીય પક્ષોના નિશાન વગરની આ ચૂંટણીઓ તેમ છતાં રાજકીય સમર્થન સાથે ચાલી છે, અને પરિણામો પર મુખ્ય રાજકીય પક્ષોની પણ નજર છે. પંચાયતોને સરકાર તરફથી વધુ સત્તા આપવામાં આવતાં હવે સરપંચ પદ માટે સ્પર્ધા વધુ તીવ્ર બની છે.
વિશિષ્ટ પરિણામો તરફ નજર કરીએ તો:
- ખંભાત (આણંદ): પોપટપુરા ગ્રામ પંચાયતથી હીરાબેન ચીમનભાઈ વણકર સરપંચ તરીકે ચૂંટાયા છે.
- ગોંડલ (રાજકોટ): રીબડા ગામના વોર્ડ-8માંથી સત્યજિતસિંહ અનિરુદ્ધસિંહ જાડેજા વિજયી રહ્યા. વોડી ગામમાંથી ભરત મકવાણા અને બાંદરા ગામના વોર્ડ-4માંથી પરષોત્તમ ઘોણીયા વિજયી થયા છે.
- સુલતાનપુર (રાજકોટ): વોર્ડ-7માંથી વર્ષાબેન ભાદાણીની જીત.
- જામનગર: સુવરડા ગ્રામ પંચાયતમાં વિમલ નાખવાની અને હડમતીયા (મતવા) ગામે દિવ્યેશભાઈ સભાયાની જીત.
- અમરેલી: અહીં 77 ગ્રામ પંચાયત અને 12 ગામની પેટા ચૂંટણી માટે કુલ 2012 સભ્યોની મતગણતરી શરૂ છે. જિલ્લાભરમાં 200 કર્મચારીઓની કામગીરી ચાલી રહી છે.
અમદવાદ જિલ્લામાં પણ મતગણતરી ચાલી રહી છે, જ્યાં 9 મતગણતરી કેન્દ્રો અને 28 હૉલમાં 42 ટેબલ ગોઠવાયા છે. શાંતિપૂર્ણ ગણતરી માટે 297 પોલીસ કર્મચારીઓ તૈનાત કરાયા છે અને સમગ્ર પ્રક્રિયા CCTV કેમેરા હેઠળ છે.
સામાન્ય રીતે, ગુજરાતની ગ્રામ પંચાયત ચૂંટણી સમરસતાની ઓળખ ધરાવે છે, પરંતુ આ વખતે સમરસ પંચાયતોની સંખ્યા ઘટી છે. જાતિગત અને સ્થાનીક સમીકરણો સાથે રાજકીય અસરકારકતાનું પણ મોટું મહત્વ જોવા મળી રહ્યું છે.
મોટા પાયે મતદાન અને કડક સુરક્ષા વચ્ચે શરૂ થયેલી આ મતગણતરીનાં આખરી પરિણામો રાજ્યના ગ્રામ્ય રાજકારણને નવી દિશા આપી શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
