ભારત અને સેશેલ્સ વચ્ચેના દ્વિપક્ષીય સંબંધોમાં આજે મહત્વપૂર્ણ મોરચે નવી શરૂઆત જોવા મળી છે. નવી દિલ્હીના હૈદરાબાદ હાઉસ ખાતે વડાપ્રધાન નરેન્દ્ર મોદી અને સેશેલ્સના પ્રમુખ પેટ્રિક હર્મિની વચ્ચે યોજાયેલી ઉચ્ચ સ્તરીય બેઠકમાં દરિયાઈ સુરક્ષા, વ્યૂહાત્મક ભાગીદારી અને આર્થિક સહયોગ સહિત અનેક મહત્વપૂર્ણ મુદ્દાઓ પર ચર્ચા કરવામાં આવી હતી. બંને દેશોના નેતાઓની હાજરીમાં અનેક મહત્વપૂર્ણ MoU પર હસ્તાક્ષર થયા, જે આગામી સમયમાં સંરક્ષણ, ટેક્નોલોજી અને વેપાર ક્ષેત્રે સહયોગ વધારશે.
હિન્દ મહાસાગર વિસ્તારમાં ભારતનું વધતું પ્રભાવ
આ બેઠકને હિન્દ મહાસાગર વિસ્તારમાં ભારતની મજબૂત સ્થિતિ અને ‘ગ્લોબલ સાઉથ’ના નેતૃત્વને મજબૂત બનાવતા મહત્વપૂર્ણ પગલાં તરીકે જોવામાં આવી રહી છે. ઑક્ટોબર 2025માં સત્તા સંભાળ્યા બાદ પ્રમુખ પેટ્રિક હર્મિનીની આ પ્રથમ ભારત મુલાકાત છે. ખાસ વાત એ છે કે આ મુલાકાત ભારત અને સેશેલ્સ વચ્ચેના રાજદ્વારી સંબંધોના 50 વર્ષ પૂર્ણ થવાના અવસરે યોજાઈ રહી છે, જે બંને દેશોની લાંબા ગાળાની મિત્રતાને વધુ મજબૂત બનાવે છે.
Addressing the joint press meet with President Dr. Patrick Herminie of the Republic of Seychelles.
https://t.co/gKZQcH960T
— Narendra Modi (@narendramodi) February 9, 2026
‘વિઝન મહાસાગર’ માટે સેશેલ્સનો મજબૂત સમર્થન
બેઠક પહેલાં પ્રમુખ હર્મિનીએ રાજઘાટ ખાતે મહાત્મા ગાંધીને શ્રદ્ધાંજલિ અર્પણ કરી હતી. વિદેશ મંત્રી એસ. જયશંકરે તેમની સાથે મુલાકાત કરીને ભારતના ‘વિઝન મહાસાગર’ (MAHASAGAR) પહેલ માટે સેશેલ્સના સમર્થનની પ્રશંસા કરી હતી. આ પહેલ હિન્દ મહાસાગર ક્ષેત્રમાં સુરક્ષા, વિકાસ અને સહકાર વધારવા માટે મહત્વપૂર્ણ માનવામાં આવે છે.
શાસન, ઉદ્યોગ અને આરોગ્ય ક્ષેત્રે સહયોગ વધારવાની દિશામાં ચર્ચા
પ્રમુખ હર્મિનીએ દિલ્હી પહોંચતા પહેલા ચેન્નાઈ અને મુંબઈની મુલાકાત લીધી હતી, જ્યાં તેમણે શાસન વ્યવસ્થા, ઉદ્યોગ વિકાસ, દરિયાકાંઠા સંચાલન અને આરોગ્ય ક્ષેત્રે સહયોગ વધારવા માટે વિવિધ હિતધારકો સાથે ચર્ચાઓ કરી હતી. આરોગ્ય સેવાઓ સુધારવા માટે સુપર-સ્પેશિયાલિટી આઉટરીચ, હોસ્પિટલ ઈન્ફ્રાસ્ટ્રક્ચર અને સસ્તી દવાઓની ઉપલબ્ધતા જેવા મુદ્દાઓ પર ખાસ ધ્યાન કેન્દ્રિત કરવામાં આવ્યું હતું.
બ્લુ ઈકોનોમી અને રોકાણની નવી તકો
મુંબઈમાં કેન્દ્રીય મંત્રી સર્બાનંદ સોનોવાલ સાથે યોજાયેલી બેઠક અને ‘ઇન્ડિયા-સેશેલ્સ બિઝનેસ રાઉન્ડ ટેબલ’માં બ્લુ ઈકોનોમી, દરિયાઈ વેપાર અને ટકાઉ વિકાસ માટે નવી રોકાણ તકો શોધવા પર ભાર મૂકવામાં આવ્યો હતો. ભારત માટે સેશેલ્સ એક વ્યૂહાત્મક દરિયાઈ ભાગીદાર છે, જે હિન્દ મહાસાગર વિસ્તારમાં સુરક્ષા અને આર્થિક સહકાર બંને માટે મહત્વપૂર્ણ છે.
નવી દિલ્હીમાં રોકાણ દરમિયાન પ્રમુખ હર્મિની રાષ્ટ્રપતિ દ્રૌપદી મુર્મૂ સાથે પણ મુલાકાત કરશે અને પ્રાદેશિક તેમજ વૈશ્વિક મુદ્દાઓ પર વિચારોનું આદાનપ્રદાન કરશે. નિષ્ણાતો અનુસાર આ મુલાકાત ભારત-સેશેલ્સ સંબંધોને નવા યુગમાં પ્રવેશ કરાવશે અને દરિયાઈ સુરક્ષા સાથે વેપાર અને વિકાસના નવા માર્ગો ખોલશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
