પંજાબના રાજકારણમાં ભારે ખળભળાટ મચી ગયો છે, કારણ કે આમ આદમી પાર્ટીના ધારાસભ્ય હરમીત સિંહ પઠાણમાજરાને પંજાબ પોલીસે ધરપકડ કરી છે. બળાત્કાર, છેતરપિંડી અને ગુનાહિત ધમકી જેવા ગંભીર આરોપોમાં છેલ્લા છ મહિનાથી ફરાર રહેલા પઠાણમાજરાની આખરે ધરપકડ થતા રાજકીય ગરમાવો વધી ગયો છે.
માહિતી મુજબ, હરમીત સિંહ પઠાણમાજરા વિરુદ્ધ 2 સપ્ટેમ્બર 2025થી કેસ નોંધાયો હતો, ત્યારથી તે પોલીસની નજરથી દૂર હતો. અનેક સમન્સ જારી કર્યા છતાં હાજર ન રહેતા અદાલતે તેને ‘પ્રોક્લેમ્ડ ઓફેન્ડર’ જાહેર કર્યો હતો. પોલીસને આશંકા હતી કે તે દેશ છોડીને ભાગી શકે છે, જેના કારણે તેના વિરુદ્ધ લુકઆઉટ નોટિસ પણ જાહેર કરવામાં આવી હતી.
પોલીસે વિશેષ ટીમ બનાવીને લાંબા સમયથી તેના સંભવિત ઠેકાણાઓ પર દરોડા પાડ્યા હતા. અંતે ટેકનિકલ સર્વેલન્સ અને સતત તપાસના આધારે તેને ઝડપી લેવામાં આવ્યો છે. હવે પોલીસે તેને અદાલતમાં રજૂ કરીને રિમાન્ડ માગવાની તૈયારી શરૂ કરી છે, જેથી કેસની વધુ ઊંડી તપાસ થઈ શકે.
આ ધરપકડથી પંજાબની ભગવંત માન સરકાર પર દબાણ વધી ગયું છે. નોંધનીય છે કે છેલ્લા 48 કલાકમાં આ બીજી મોટી ધરપકડ છે. આ પહેલા પૂર્વ પરિવહન મંત્રી લાલજીત સિંહ ભુલ્લરને આત્મહત્યા માટે દુષ્પ્રેરણાના કેસમાં પકડવામાં આવ્યા હતા.
વિપક્ષ પાર્ટીઓએ આ મુદ્દે સરકારને ઘેરવાનું શરૂ કર્યું છે. તેઓ રાજ્યમાં કાયદો અને વ્યવસ્થાની સ્થિતિ તેમજ સત્તાધારી પક્ષના નેતાઓના વર્તન પર સવાલો ઉઠાવી રહ્યા છે. એક તરફ ભુલ્લરનો કેસ અધિકારીની આત્મહત્યા સાથે જોડાયેલો છે, જ્યારે બીજી તરફ પઠાણમાજરા પર લાગેલા બળાત્કારના આરોપોએ આ સમગ્ર મામલાને વધુ સંવેદનશીલ બનાવી દીધો છે.
હાલમાં પોલીસે સત્તાવાર રીતે ધરપકડની પુષ્ટિ કરી છે અને આગળની કાયદેસરની કાર્યવાહી શરૂ કરી છે. આવનારા દિવસોમાં આ કેસ રાજકીય તેમજ કાનૂની રીતે વધુ ગરમાવો લાવશે તેવી શક્યતા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
