પશ્ચિમ એશિયામાં ચાલી રહેલા યુદ્ધ અને વધતા વૈશ્વિક તણાવ વચ્ચે કિયર સ્ટાર્મરએ મહત્વપૂર્ણ નિવેદન આપ્યું છે. પ્રેસ કૉન્ફરન્સ દરમિયાન તેમણે સ્પષ્ટ શબ્દોમાં કહ્યું કે યુકે આ યુદ્ધમાં જોડાશે નહીં અને આ સંઘર્ષ યુકેનો નથી.
સ્ટાર્મરે જણાવ્યું કે બ્રિટન હાલમાં યુદ્ધ ટાળવા અને પરિસ્થિતિને શાંત કરવા માટે રાજનૈતિક માર્ગ અપનાવી રહ્યું છે. તેમણે ભારપૂર્વક કહ્યું કે “અમે ડિએસ્કલેશન માટે સતત ડિપ્લોમેટિક ચેનલોનો ઉપયોગ કરી રહ્યા છીએ અને કોઈ પણ એવી પરિસ્થિતિમાં પ્રવેશ નહીં કરીએ જેમાં યુકેનું રાષ્ટ્રીય હિત ન હોય.”
તેમણે સ્વીકાર્યું કે યુકેના નાગરિકોમાં ભય છે કે દેશને આ યુદ્ધમાં ખેંચવામાં આવી શકે છે. પરંતુ તેમણે લોકોને આશ્વાસન આપ્યું કે એવું કંઈ બનવાનું નથી. સ્ટાર્મરે ઉમેર્યું કે સરકાર દેશના હિતને સર્વોચ્ચ માનશે અને બિનજરૂરી સંઘર્ષથી દૂર રહેશે.
Watch my press conference live. https://t.co/ZXx4qGaDBI
— Keir Starmer (@Keir_Starmer) April 1, 2026
આ દરમિયાન સ્ટ્રેટ ઑફ હોર્મુઝને ફરીથી ખોલવાના મુદ્દે પણ સ્ટાર્મરે વાત કરી. તેમણે જણાવ્યું કે બ્રિટનના રાજદ્વારીઓ અને સેક્રેટરી અન્ય દેશો સાથે સતત સંપર્કમાં છે જેથી આ મહત્વપૂર્ણ દરિયાઈ માર્ગ ફરી શરૂ થઈ શકે.
યુકેના વડા પ્રધાને સ્વીકાર્યું કે આ યુદ્ધના કારણે દેશની અર્થવ્યવસ્થાને મોટો ઝટકો લાગ્યો છે. તેમણે કહ્યું કે “આ હવે સ્પષ્ટ થઈ ગયું છે કે આ સંઘર્ષનો લાંબા ગાળાનો પ્રભાવ આપણા દેશના ભવિષ્ય પર પડશે. આ પરિસ્થિતિ સરળ નથી અને દેશે તેની તૈયારી રાખવી પડશે.”
યુદ્ધ શરૂ થયા બાદ યુનાઇટેડ કિંગડમમાં પેટ્રોલ અને ડીઝલના ભાવમાં નોંધપાત્ર વધારો થયો છે. આ ઉપરાંત સ્ટાર્મર સરકાર પર પરિસ્થિતિનો લાભ લઈ આર્થિક ફાયદો ઉઠાવવાના આરોપો પણ લાગી રહ્યા છે.
આ પહેલાં ડોનાલ્ડ ટ્રમ્પએ સોશિયલ મીડિયા પર યુકેને લઈને નિવેદન આપ્યું હતું. તેમણે કહ્યું હતું કે જો બ્રિટનને તેલની જરૂર હોય તો સ્ટ્રેટ ઑફ હોર્મુઝ ખોલાવવાનો પ્રયાસ કરે, કારણ કે અમેરિકા તેમની મદદ નહીં કરે. ટ્રમ્પે અન્ય દેશોને પણ આ સંઘર્ષમાં જોડવા પ્રયાસ કર્યો હતો, પરંતુ તેમને સફળતા મળી નથી.
વર્તમાન પરિસ્થિતિમાં યુકેનું આ સ્પષ્ટ વલણ વૈશ્વિક રાજકારણમાં મહત્વપૂર્ણ ગણાઈ રહ્યું છે, કારણ કે મોટા દેશો વચ્ચે તણાવ વધી રહ્યો છે અને પશ્ચિમ એશિયા સંકટ વધુ ગંભીર બનતો જઈ રહ્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
