ગુજરાતમાં યોજાયેલી સ્થાનિક સ્વરાજ્ય સંસ્થાઓની ચૂંટણીમાં BJPએ ફરી એકવાર પોતાનું પ્રભુત્વ સાબિત કર્યું છે. 2022ની વિધાનસભા ચૂંટણી બાદ સરકારે નવ નગરપાલિકાઓને મ્યુનિસિપલ કોર્પોરેશનમાં અપગ્રેડ કરવાનો નિર્ણય લીધો હતો, જેનો સીધો રાજકીય લાભ ભાજપને મળ્યો હોવાનું ચૂંટણી પરિણામોમાં સ્પષ્ટ દેખાઈ રહ્યું છે.
15માંથી 15 કોર્પોરેશનમાં ભાજપનો ક્લીન સ્વીપ:
મંગળવારે જાહેર થયેલા પરિણામોમાં રાજ્યની તમામ 15 મ્યુનિસિપલ કોર્પોરેશનમાં ભાજપે જીત મેળવી છે. સાથે જ પક્ષના વોટશેરમાં 5.06 ટકાનો નોંધપાત્ર વધારો નોંધાયો છે.
રાજ્ય ચૂંટણી આયોગ દ્વારા કુલ 10,005 બેઠકો માટે ચૂંટણી જાહેર થઈ હતી, જેમાંથી 6 બેઠકો પર મતદાન થઈ શક્યું નહોતું. બાકી રહેલી 9,999 બેઠકોમાંથી ભાજપે 7,502 બેઠકો જીતીને પ્રભાવશાળી પ્રદર્શન કર્યું છે.
કોંગ્રેસ અને AAP વચ્ચે મતવિભાજન:
ચૂંટણી પરિણામો દર્શાવે છે કે AAPના ઉદયથી કોંગ્રેસના મતબેંકમાં 1.66 ટકાનું ગાબડું પડ્યું છે.
જોકે બેઠકોની સંખ્યામાં કોંગ્રેસ અને AAP બંનેએ વધારો નોંધાવ્યો છે—કોંગ્રેસના જીતેલા ઉમેદવારો 1,086થી વધીને 1,703 થયા છે, જ્યારે AAPના પ્રતિનિધિઓ 71થી વધીને 490 થયા છે.
વોટશેરમાં ભાજપનો મોટો ઉછાળો:
મ્યુનિસિપલ કોર્પોરેશન્સમાં ભાજપના વોટશેરમાં 6.25 ટકાનો વધારો થયો છે.
જોકે નગરપાલિકાઓમાં ભાજપના વોટશેરમાં 0.19 ટકાનો નાનો ઘટાડો નોંધાયો છે, છતાં 721 બેઠકો પર બિનહરીફ જીતથી પક્ષને મોટો ફાયદો થયો છે.
AAPનું શહેરી ઘટાડો, ગ્રામિણ વધારો:
મહાનગરોમાં AAPના મતોમાં 3.70 ટકાનો ઘટાડો નોંધાયો છે, જેમાં ખાસ કરીને સુરતના પરિણામો જવાબદાર માનવામાં આવે છે.
પરંતુ ગ્રામિણ વિસ્તારોમાં AAPએ જોરદાર પ્રદર્શન કર્યું છે. 2021માં 4.20 લાખ મત મેળવનાર AAPએ આ વખતે 21.29 લાખ મત મેળવી 9.75 ટકાનો વધારો નોંધાવ્યો છે.
ગ્રામિણ ક્ષેત્રમાં કોંગ્રેસનો ઘટાડો:
ગ્રામિણ વિસ્તારોમાં કોંગ્રેસના મતોમાં 5.48 ટકાનો ઘટાડો નોંધાયો છે. 2021માં 62.17 લાખ મત મેળવનાર કોંગ્રેસ આ વખતે 57.87 લાખ મત સુધી સીમિત રહી છે.
આથી સ્પષ્ટ થાય છે કે AAPના ઉદયથી કોંગ્રેસને સીધું નુકસાન થયું છે, ખાસ કરીને આદિવાસી બાહુલ્ય વિસ્તારોમાં.
વિધાનસભા 2022ની સરખામણી:
2022ની વિધાનસભા ચૂંટણીમાં AAPને 12.92% વોટશેર મળ્યો હતો, જ્યારે સ્થાનિક ચૂંટણીમાં તે ઘટીને સરેરાશ 9.19% રહ્યો છે.
બીજી તરફ ભાજપે 52.50%થી વધીને 54.70% વોટશેર હાંસલ કર્યો છે. કોંગ્રેસનો વોટશેર પણ 27.28%થી વધીને 30.28% થયો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
