અમદાવાદ મ્યુનિસિપલ કોર્પોરેશન (AMC)ની આવનારી 2026ની ચૂંટણીને લઈને એક ગંભીર કૌભાંડ સામે આવ્યું છે. કુબેરનગર વોર્ડની વર્તમાન કોંગ્રેસ કોર્પોરેટર કલ્પનાબહેન સુરજભાઈ નવલેકર સામે ચૂંટણી ઉમેદવારી દરમિયાન ખોટા દસ્તાવેજો રજૂ કરવાનો આરોપ લાગ્યો છે.
આ મામલે કલ્પનાબહેને કૃષ્ણનગર વિદ્યાવિહાર હાઈસ્કૂલનું ખોટું અને બોગસ સ્કૂલ લિવિંગ સર્ટિફિકેટ (L.C.) બનાવીને તેને સત્તાવાર રીતે રજૂ કર્યું હોવાનો ખુલાસો થયો છે. આ ઘટનાએ રાજકીય અને શૈક્ષણિક વર્તુળોમાં ભારે ચકચાર મચાવી છે.
શું છે સમગ્ર મામલો?
મણિનગર વિસ્તારમાં રહેતા 68 વર્ષીય અશોકકુમાર કાંતિલાલ પટેલ, જે છેલ્લા 20 વર્ષથી ભાવના એજ્યુકેશન ટ્રસ્ટ સંચાલિત શાળાના મેનેજિંગ ટ્રસ્ટી છે, તેમની ફરિયાદના આધારે આ કેસ નોંધાયો છે.
તેમણે પોતાના નિવેદનમાં જણાવ્યું કે કલ્પનાબહેને તેમની શાળામાં ક્યારેય અભ્યાસ કર્યો જ નથી, છતાં શાળાના નામે ખોટું L.C. બનાવી તેનો ચૂંટણીમાં ઉપયોગ કર્યો હતો. આ પગલાને લઈને તેમણે કાયદેસરની કાર્યવાહી શરૂ કરી છે.
તપાસમાં ખુલ્યા ચોંકાવનારા તથ્યો
આ કૌભાંડનો ભાંડાફોડ મોટેરા નિવાસી ચિરાગ પ્રવીણચંદ્ર શાહ દ્વારા 24 એપ્રિલે જિલ્લા શિક્ષણ અધિકારીને કરાયેલ અરજી બાદ થયો હતો.
શિક્ષણ નિરીક્ષક આર.એમ. માકડિયા અને મદદનીશ શિક્ષણ નિરીક્ષક હિમાંશુ સી. વ્યાસે શાળાના રેકોર્ડની તપાસ કરતાં ગંભીર ગડબડીઓ સામે આવી:
- રજૂ કરાયેલ એલ.સી.માં દર્શાવાયેલ જી.આર. નંબર 1248 શાળાના રેકોર્ડ મુજબ ચાવડા હસમુખભાઈ મધુકાન્તના નામે નોંધાયેલ
- એલ.સી. ઇશ્યુ નંબર 3194 સોની અંકિતકુમાર ગીરીશભાઈના નામે નોંધાયેલ
- કલ્પનાબહેનના નામે શાળાના રજિસ્ટરમાં કોઈ નોંધ જ મળી નહીં
આ સ્પષ્ટ પુરાવાઓના આધારે જિલ્લા શિક્ષણ અધિકારીએ કાર્યવાહી કરવા આદેશ આપ્યો હતો.
આગળની કાર્યવાહી
આ કેસમાં કુલ 8 દસ્તાવેજી પુરાવાઓ સાથે પોલીસ ફરિયાદ નોંધવામાં આવી છે. હાલ આ સમગ્ર મામલાની તપાસ પોલીસ ઇન્સ્પેક્ટર વિજય હસમુખરાય જોષીને સોંપવામાં આવી છે.
આ ઘટનાએ ચૂંટણી પ્રક્રિયામાં પારદર્શિતા અને દસ્તાવેજોની ચકાસણી અંગે ગંભીર પ્રશ્નો ઊભા કર્યા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
