ગીર સોમનાથ જિલ્લાના કોડીનાર તાલુકાના સરખડી ગામની પ્રતિભાશાળી દીકરી રાજલબહેન વાળાએ આંતરરાષ્ટ્રીય વોલીબોલ મંચ પર ભારતીય મહિલા ટીમનું નેતૃત્વ સંભાળી સમગ્ર ગીર સોમનાથ જિલ્લો અને ગુજરાતનું ગૌરવ વધાર્યું છે. થાઈલેન્ડના નાખોન રાત્ચાસિમા ખાતે તા. ૧થી ૭ જુલાઈ, ૨૦૨૬ દરમિયાન યોજાયેલી ૧૬મી એ.વી.સી. એશિયન મહિલા અંડર-૧૮ વોલીબોલ ચેમ્પિયનશિપમાં રાજલબહેને ભારતીય ટીમના કપ્તાન તરીકે દેશનું પ્રતિનિધિત્વ કર્યું હતું.
માત્ર ૧૬ વર્ષની ઉંમરે ભારતીય ટીમનું નેતૃત્વ કરવાની સિદ્ધિ હાંસલ કરનાર રાજલબહેને પોતાની રમત, આત્મવિશ્વાસ અને નેતૃત્વ ક્ષમતાથી સૌનું ધ્યાન ખેંચ્યું હતું. તેમની આગેવાની હેઠળ ભારતીય ટીમે કોરિયા, ચાઈનીઝ તાઈપેઈ અને વિયેતનામ જેવી એશિયાની મજબૂત ટીમો સામે જોરદાર ટક્કર આપી હતી.
રાજલબહેન વાળા અત્યાર સુધી રાજ્ય કક્ષાએ છ મેડલ, આંતરરાષ્ટ્રીય કક્ષાએ બે મેડલ તેમજ ખેલો ઇન્ડિયામાં એક બ્રોન્ઝ અને બે સિલ્વર મેડલ પોતાના નામે નોંધાવી ચૂક્યાં છે. તેમની આ સિદ્ધિઓ તેમની સતત મહેનત, શિસ્ત અને સમર્પણનું ઉત્તમ ઉદાહરણ છે.
વોલીબોલ માટે દેશભરમાં ઓળખ ધરાવતા સરખડી ગામમાં બાળપણથી જ રાજલબહેને જાણીતા કોચ વરજાંગભાઈ વાળાના માર્ગદર્શન હેઠળ રમતની તાલીમ શરૂ કરી હતી. ગામમાં વોલીબોલનું વાતાવરણ અને પરિવારનો સહયોગ તેમની સફળતામાં મહત્વપૂર્ણ સાબિત થયો છે. તેમના પિતા પ્રતાપભાઈ વાળા, જેઓ ભારતીય સેનામાં સેવા આપી ચૂક્યા છે, તેમણે દીકરીને રમતગમત ક્ષેત્રે આગળ વધવા સતત પ્રોત્સાહન પૂરું પાડ્યું હતું.
રાજલબહેને સ્પોર્ટ્સ ઓથોરિટી ઓફ ગુજરાતના નડિયાદ સ્થિત હાઈ પર્ફોર્મન્સ સેન્ટરમાં સઘન તાલીમ મેળવી પોતાની પ્રતિભાને વધુ નિખારી હતી. જેના પરિણામે આજે તેઓ આંતરરાષ્ટ્રીય સ્તરે ભારતનું નેતૃત્વ કરતી ખેલાડી તરીકે ઉભરી આવ્યા છે.
સરખડી ગામ વર્ષોથી ‘વોલીબોલ વિલેજ’ તરીકે ઓળખાય છે. આ અગાઉ પણ ગામની કિંજલ વાળા અને ચેતના વાળા ભારતીય મહિલા વોલીબોલ ટીમના કપ્તાન રહી ચૂક્યાં છે. હવે રાજલબહેન વાળાએ પણ આ ગૌરવશાળી પરંપરાને આગળ ધપાવી ગામ, જિલ્લો અને રાજ્યનું નામ વિશ્વના રમતગમતના નકશા પર વધુ ઉજ્જવળ બનાવ્યું છે.
ગુજરાત સરકાર રમતગમતને પ્રોત્સાહન આપવા સતત પ્રયત્નશીલ છે. આગામી વર્ષોમાં અમદાવાદ ખાતે એશિયન ગેમ્સ યોજવાની તૈયારી અને ભારતની ઓલિમ્પિક દાવેદારી વચ્ચે ગીર સોમનાથ જેવી ધરતી પરથી ઉભરી રહેલી આવી પ્રતિભાઓ દેશના ઉજ્જવળ રમતગમત ભવિષ્યનું પ્રેરણાદાયી ચિત્ર રજૂ કરે છે.
રાજલબહેન વાળાની આ ઐતિહાસિક સિદ્ધિ માત્ર તેમના પરિવાર માટે જ નહીં, પરંતુ સમગ્ર ગીર સોમનાથ જિલ્લા, ગુજરાત અને દેશ માટે ગૌરવ અને પ્રેરણાની ક્ષણ બની છે.
રિપોર્ટર:- મૌલિક ઝણકાટ [કોડીનાર (ગીર સોમનાથ)]
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
