ગુરુપૂર્ણિમાના પાવન પર્વ નિમિત્તે ગુજરાતના મુખ્યમંત્રી ભૂપેન્દ્ર પટેલે રાજ્યના નાગરિકોને શુભેચ્છાઓ પાઠવી હતી. આ વિશેષ અવસરે તેમણે અરવલ્લી જિલ્લાના શામળાજી તાલુકામાં આવેલા પ્રસિદ્ધ લુસડિયા ધામની મુલાકાત લઈને સંત સુરમલદાસજીની સમાધિએ શ્રદ્ધાપૂર્વક દર્શન કર્યા હતા.
મુખ્યમંત્રીએ ગુરુ-શિષ્ય પરંપરાના મહત્ત્વને યાદ કરતાં રાજ્ય અને દેશના નાગરિકોના સુખ, સમૃદ્ધિ અને કલ્યાણ માટે પ્રાર્થના કરી હતી. તેમની ઉપસ્થિતિને કારણે લુસડિયા ધામમાં આવેલા સંતો, આદિજાતિ ભક્તો અને સ્થાનિક ગ્રામજનોમાં ઉત્સાહનો માહોલ જોવા મળ્યો હતો.
આદિજાતિ ભક્તો સાથે સાધ્યો સંવાદ
મુખ્યમંત્રીએ લુસડિયા ધામ ખાતે ઉપસ્થિત આદિજાતિ ભક્તો અને સ્થાનિક ગ્રામજનોનું અભિવાદન ઝીલી તેમની સાથે સહજ સંવાદ સાધ્યો હતો. મુખ્યમંત્રીની સરળતા અને લોકો સાથે સીધા જોડાવાના અભિગમથી સ્થાનિકોમાં આનંદ જોવા મળ્યો હતો.
ગુરુપૂર્ણિમાના મહોત્સવમાં ભાગ લેવા આવેલા શ્રદ્ધાળુઓએ મુખ્યમંત્રીનું ઉષ્માભર્યું સ્વાગત કર્યું હતું. મુખ્યમંત્રીએ પણ હાથ જોડીને સૌનું અભિવાદન કર્યું અને તેમની સાથે આત્મીયતાપૂર્વક વાતચીત કરી હતી.
પ્રોટોકોલ બાજુ પર મૂકી કાફલો રોકાવ્યો
લુસડિયા ધામ અને શામળાજી તરફ જતી વખતે મુખ્યમંત્રી ભૂપેન્દ્ર પટેલનો સરળ અને જનસહજ સ્વભાવ ફરી એકવાર સામે આવ્યો હતો. રસ્તામાં લુસડિયા ગામ નજીક શાળાનાં બાળકો અને ગ્રામજનો ઊભેલા જોઈ મુખ્યમંત્રીએ પોતાનો કાફલો રોકાવ્યો હતો.
સામાન્ય નાગરિકની જેમ લોકો વચ્ચે પહોંચીને તેમણે બાળકો અને ગ્રામજનો સાથે આત્મીય વાતચીત કરી હતી. મુખ્યમંત્રીએ બાળકોના અભ્યાસ અને તેમની પ્રવૃત્તિઓ અંગે જાણકારી મેળવી તેમને પ્રોત્સાહિત કર્યા હતા.
આજે ગુરુપૂર્ણિમાના પાવન પર્વે શામળાજીના દર્શનાર્થે જતા રસ્તામાં લુસડીયા ગામ નજીક બાળકોને અને ગ્રામજનોને મળવાનો આનંદપૂર્ણ અવસર મળ્યો.
ગ્રામજનોએ આત્મીયતાથી આવકાર આપ્યો.. ગૌરીવ્રત કરતી અને માથે સુશોભિત કળશ ધારણ કરેલી નાનકડી દીકરીઓએ પણ પરિવારજનની જેમ સ્વાગત કર્યું. બાળકો અને… pic.twitter.com/HlLbf9zK5v
— Bhupendra Patel (@Bhupendrapbjp) July 29, 2026
ગૌરીવ્રત કરતી દીકરીઓએ કર્યું પરંપરાગત સ્વાગત
મુખ્યમંત્રીના કાફલાને જોઈ સ્થાનિક ગ્રામજનો અને બાળકોમાં ઉત્સાહ છવાયો હતો. ગૌરીવ્રત કરતી નાની દીકરીઓએ માથે સુશોભિત કળશ ધારણ કરીને હર્ષોલ્લાસ સાથે મુખ્યમંત્રીનું પરંપરાગત સ્વાગત કર્યું હતું.
મુખ્યમંત્રી ભૂપેન્દ્ર પટેલે દીકરીઓ સાથે વાતચીત કરી તેમને આશીર્વાદ અને શુભેચ્છાઓ પાઠવી હતી. ગ્રામજનો દ્વારા કરવામાં આવેલા આત્મીય સ્વાગતને તેમણે સહજતાથી સ્વીકાર્યું હતું.
મુખ્યમંત્રીની સરળતાએ જીત્યાં લોકોનાં દિલ
વીવીઆઈપી પ્રોટોકોલ વચ્ચે પણ કાફલો રોકાવી બાળકો અને સામાન્ય નાગરિકોને મળવાના મુખ્યમંત્રીના નિર્ણયથી સ્થાનિક લોકોમાં ખુશી જોવા મળી હતી.
શાળાનાં બાળકો સાથે વાતચીત, ગૌરીવ્રત કરતી દીકરીઓનું અભિવાદન અને ગ્રામજનોને મળવાની તેમની સરળ શૈલીએ ફરી એકવાર લોકોનું ધ્યાન ખેંચ્યું હતું. ગ્રામજનોએ મુખ્યમંત્રીના આ સરળ અને સહજ વ્યવહારને આવકાર્યો હતો.
ગુરુપૂર્ણિમાનો સામાજિક અને આધ્યાત્મિક સંદેશ
ગુરુપૂર્ણિમા ભારતીય સંસ્કૃતિમાં ગુરુ પ્રત્યે આદર, શ્રદ્ધા અને કૃતજ્ઞતા વ્યક્ત કરવાનો પવિત્ર દિવસ છે. આ દિવસે લોકો પોતાના ગુરુઓ, સંતો અને માર્ગદર્શકોને નમન કરીને તેમના જીવનમાં આપેલા યોગદાનને યાદ કરે છે.
મુખ્યમંત્રી ભૂપેન્દ્ર પટેલની લુસડિયા ધામની મુલાકાત આધ્યાત્મિક પરંપરા સાથે આદિજાતિ સમાજના સાંસ્કૃતિક વારસાને સન્માન આપતી ઘટના તરીકે જોવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
