ભારતીય જનતા પાર્ટીએ સંગઠનાત્મક સ્તરે મહત્વપૂર્ણ ફેરફાર કરતાં રાષ્ટ્રીય મહામંત્રી તરુણ ચુઘને ગુજરાત ભાજપના પ્રભારી તરીકે નિયુક્ત કર્યા છે. ભાજપના રાષ્ટ્રીય અધ્યક્ષ નિતિન નબીને ઉત્તર પ્રદેશ, પંજાબ અને ગુજરાત માટે નવા પ્રભારીઓની જાહેરાત કરી છે. ગુજરાતની જવાબદારી તરુણ ચુઘને સોંપવામાં આવી છે. ચુઘને તાજેતરમાં ભાજપના રાષ્ટ્રીય કાર્યાલય પ્રભારીની વધારાની જવાબદારી પણ આપવામાં આવી છે.
તરુણ ચુઘ ભાજપના એવા નેતાઓમાં સામેલ છે, જેમણે વિદ્યાર્થી રાજકારણ અને સંગઠનાત્મક કામગીરીથી પોતાની ઓળખ બનાવી છે. તેઓ હાલમાં ભાજપના રાષ્ટ્રીય મહામંત્રી છે અને જૂન 2026માં મધ્ય પ્રદેશમાંથી રાજ્યસભામાં બિનહરીફ ચૂંટાયા હતા.
કોણ છે તરુણ ચુઘ?
તરુણ ચુઘનો જન્મ ૩ મે, ૧૯૭૩ ના રોજ પંજાબના અમૃતસરમાં એક પરિવારમાં થયો હતો. તેમના પિતાનું નામ બનારસી દાસ ચુઘ છે. તેમણે પોતાનું પ્રારંભિક શિક્ષણ અમૃતસરમાં પૂર્ણ કર્યું. ત્યારબાદ તેમણે અમૃતસરની DAV કોલેજમાંથી MBA (HR) ની ડિગ્રી મેળવી. તેઓ નવ વર્ષની ઉંમરે RSS માં જોડાયા અને ૧૯૮૯ સુધી “ઘાટ નાયક” અને “કાર્યવાહ” જેવા વિવિધ હોદ્દાઓ સંભાળ્યા. વિદ્યાર્થીકાળ દરમિયાન, તેઓ ABVP માં જોડાયા અને જિલ્લા સચિવ અને રાજ્ય કારોબારી સભ્ય તરીકે સેવા આપી. તેમણે પ્રતિષ્ઠિત DAV ઇન્સ્ટિટ્યૂટ ઓફ ટેકનોલોજી, અમૃતસરમાંથી માનવ સંસાધનમાં MBA ની ડિગ્રી મેળવી. ભાજપે મધ્યપ્રદેશથી તરુણ ચુઘને રાજ્યસભાના ઉમેદવાર તરીકે નામાંકિત કર્યા.
વિદ્યાર્થી રાજકારણથી શરૂ થયો રાજકીય સફર
તરુણ ચુઘે વિદ્યાર્થી જીવન દરમિયાન ABVP સાથે કામ કર્યું હતું. તેઓ જિલ્લા અને પ્રદેશ સ્તરની સંગઠનાત્મક જવાબદારીઓ સાથે જોડાયા હતા. ત્યારબાદ ભાજપ યુવા મોરચામાં પ્રવેશ કરીને અમૃતસર જિલ્લામાં મહત્વપૂર્ણ ભૂમિકાઓ સંભાળી હતી. 1993માં તેઓ અમૃતસર જિલ્લા યુવા મોરચાના અધ્યક્ષ બન્યા હોવાનો ઉલ્લેખ તેમના જીવનપ્રોફાઇલ સંબંધિત અહેવાલોમાં કરવામાં આવ્યો છે.
પંજાબમાં યુવા સંગઠન સાથે જોડાયેલા સમયગાળા દરમિયાન ચુઘે વિવિધ જનસંપર્ક અભિયાનોમાં ભાગ લીધો હતો. આ કામગીરીથી તેમને પંજાબ ભાજપના સંગઠનમાં ઓળખ મળી અને ત્યારબાદ તેઓ રાજ્યથી આગળ રાષ્ટ્રીય સંગઠન સુધી પહોંચ્યા.
2,100 કિમીની ‘યુવા ચેતના યાત્રા’થી મળી ઓળખ
તરુણ ચુઘના રાજકીય સફરમાં ‘યુવા ચેતના યાત્રા’નો પણ ઉલ્લેખ થાય છે. 1999માં તેમના નેતૃત્વ હેઠળ પંજાબના વિવિધ જિલ્લાઓને આવરી લેતી આશરે 2,100 કિલોમીટરની યાત્રા યોજાઈ હોવાનું અહેવાલોમાં જણાવાયું છે. આ અભિયાનનો હેતુ યુવાનો સુધી ભાજપની વિચારધારા અને સંગઠનનો સંદેશ પહોંચાડવાનો હતો.
આવા અભિયાનો અને સંગઠનાત્મક કામગીરીને કારણે ચુઘની ઓળખ એક ગ્રાસરૂટ અને સંગઠન કેન્દ્રિત નેતા તરીકે મજબૂત બનતી ગઈ.
BJPમાં રાષ્ટ્રીય મહામંત્રી સુધી પહોંચ્યા
પંજાબમાં લાંબા સમય સુધી સંગઠનાત્મક કામગીરી કર્યા બાદ તરુણ ચુઘને ભાજપના રાષ્ટ્રીય સંગઠનમાં મહત્વપૂર્ણ જવાબદારીઓ મળતી ગઈ. હાલમાં તેઓ ભાજપના National General Secretary તરીકે કાર્યરત છે. ભાજપની સત્તાવાર વેબસાઇટ પણ તેમને રાષ્ટ્રીય મહામંત્રી તરીકે દર્શાવે છે.
રાષ્ટ્રીય મહામંત્રી તરીકે તેઓ વિવિધ રાજ્યોમાં સંગઠન અને ચૂંટણી સંબંધિત જવાબદારીઓ સંભાળી ચૂક્યા છે. હવે ગુજરાત જેવા ભાજપના રાજકીય રીતે અત્યંત મહત્વપૂર્ણ રાજ્યનો પ્રભાર તેમને સોંપવામાં આવ્યો છે.
મધ્ય પ્રદેશથી રાજ્યસભામાં બિનહરીફ ચૂંટાયા
તરુણ ચુઘની રાજકીય કારકિર્દીમાં 2026માં વધુ એક મહત્વપૂર્ણ પડાવ આવ્યો. ભાજપે તેમને મધ્ય પ્રદેશથી રાજ્યસભાની ચૂંટણી માટે ઉમેદવાર બનાવ્યા હતા. જૂન 2026માં તેમણે ઉમેદવારી નોંધાવી હતી અને બાદમાં તેઓ રાજ્યસભામાં બિનહરીફ ચૂંટાયા હતા.
તેમને પંજાબના નેતા હોવા છતાં મધ્ય પ્રદેશમાંથી રાજ્યસભામાં મોકલવાનો નિર્ણય ભાજપના કેન્દ્રીય સંગઠનમાં તેમના મહત્વનો સંકેત માનવામાં આવ્યો હતો.
હવે ગુજરાત ભાજપની કમાન
ભાજપના રાષ્ટ્રીય અધ્યક્ષ નિતિન નબીને સંગઠનાત્મક ફેરફારોના ભાગરૂપે તરુણ ચુઘને ગુજરાતના પ્રભારી બનાવ્યા છે. સાથે ઉત્તર પ્રદેશની જવાબદારી વિનોદ તાવડે અને પંજાબની જવાબદારી સતીશ પૂનિયાને સોંપવામાં આવી છે.
ગુજરાત ભાજપ માટે આ નિયુક્તિ મહત્વપૂર્ણ છે, કારણ કે રાજ્યમાં સંગઠનને વધુ મજબૂત બનાવવા, કેન્દ્ર અને પ્રદેશ સંગઠન વચ્ચે સંકલન જાળવવા તેમજ આવનારા રાજકીય અને ચૂંટણી કાર્યક્રમો માટે પ્રભારીની ભૂમિકા મહત્વની રહે છે.
સંગઠનનો લાંબો અનુભવ બની મોટી તાકાત
તરુણ ચુઘની સૌથી મોટી રાજકીય તાકાત તેમની લાંબી સંગઠનાત્મક પૃષ્ઠભૂમિ માનવામાં આવે છે. RSSથી શરૂઆત, ABVPમાં વિદ્યાર્થી રાજકારણ, ભાજપ યુવા મોરચો, પંજાબ ભાજપ અને ત્યારબાદ રાષ્ટ્રીય સંગઠનમાં મહત્વપૂર્ણ પદ સુધીનો તેમનો સફર લગભગ ચાર દાયકાની સંગઠનાત્મક કામગીરી દર્શાવે છે.
હવે ગુજરાતના પ્રભારી તરીકે તેમની સામે પ્રદેશ સંગઠન સાથે સંકલન, કાર્યકર્તાઓને સક્રિય રાખવા અને કેન્દ્રીય નેતૃત્વની રાજકીય રણનીતિને રાજ્ય સ્તરે અસરકારક રીતે અમલમાં મૂકવાની મોટી જવાબદારી રહેશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
