અમદાવાદમાં રમતગમતના માળખાગત વિકાસને નવી દિશા આપવાના હેતુથી અમદાવાદ મ્યુનિસિપલ કોર્પોરેશન (AMC) દ્વારા થલતેજ વોર્ડના ભાડજ વિસ્તારમાં આધુનિક ઇન્ટિગ્રેટેડ સ્પોર્ટ્સ કોમ્પ્લેક્સ વિકસાવવાની મહત્વાકાંક્ષી યોજના હાથ ધરવામાં આવી છે. કોમનવેલ્થ ગેમ્સ સહિત આંતરરાષ્ટ્રીય સ્તરની સ્પર્ધાઓને ધ્યાનમાં રાખીને તૈયાર થનારા આ પ્રોજેક્ટ માટે AMCએ ટેન્ડર પ્રક્રિયા શરૂ કરી છે.
આ પ્રોજેક્ટની અંદાજિત કિંમત ₹82.60 કરોડ નક્કી કરવામાં આવી છે. રમતગમતના ક્ષેત્રમાં અમદાવાદને આંતરરાષ્ટ્રીય સ્તરે વધુ સક્ષમ બનાવવા માટે આ પ્રોજેક્ટને મહત્વપૂર્ણ માનવામાં આવી રહ્યો છે.
ઇન્ડોર અને આઉટડોર બંને પ્રકારની રમતો માટે આધુનિક સુવિધાઓ
પ્રસ્તાવિત સ્પોર્ટ્સ કોમ્પ્લેક્સમાં ઇન્ડોર તેમજ આઉટડોર બંને પ્રકારની રમતો માટે વિશ્વસ્તરીય સુવિધાઓ ઉપલબ્ધ કરાવવામાં આવશે.
મુખ્ય આકર્ષણ તરીકે મલ્ટીપર્પઝ ઇન્ડોર સ્પોર્ટ્સ હૉલ તૈયાર કરવામાં આવશે, જેમાં બાસ્કેટબોલ, વોલીબોલ અને બેડમિન્ટન માટે ચાર કોર્ટની વ્યવસ્થા હશે. ઉપરાંત તાઈક્વોન્ડો, કબડ્ડી, કુસ્તી અને ટેબલ ટેનિસ જેવી રમતો માટે અલગ મલ્ટી-સ્પોર્ટ્સ હૉલ પણ વિકસાવવામાં આવશે.
ખેલાડીઓ માટે શૂટિંગ રેન્જ અને પિકલબોલ કોર્ટ
સ્પોર્ટ્સ કોમ્પ્લેક્સમાં 20 ટાર્ગેટ ધરાવતી 10 મીટર ઇન્ડોર શૂટિંગ રેન્જ બનાવવામાં આવશે, જ્યાં એર પિસ્ટલ અને એર રાઇફલની તાલીમ અને પ્રેક્ટિસ માટે સુવિધા ઉપલબ્ધ રહેશે. આ ઉપરાંત ટેનિસ, બાસ્કેટબોલ અને વોલીબોલ માટે આઉટડોર કોર્ટ તેમજ 8 આધુનિક પિકલબોલ કોર્ટ પણ બનાવવામાં આવશે, જે નવી પેઢીના ખેલાડીઓ માટે વિશેષ આકર્ષણ બની શકે છે.
ડિજિટલ ગેમિંગ અને વેલનેસ સેન્ટરની પણ વ્યવસ્થા
પરંપરાગત રમતો ઉપરાંત કોમ્પ્લેક્સમાં ડિજિટલ ગેમ રૂમ, યોગ અને એરોબિક્સ માટે વેલનેસ સેન્ટર તેમજ કેરમ, ચેસ, સ્નૂકર અને બિલિયર્ડ્સ જેવી ઇન્ડોર પ્રવૃત્તિઓ માટે વિશેષ રિક્રિએશન ઝોન પણ વિકસાવવામાં આવશે.
આ સુવિધાઓ ખેલાડીઓ અને રમતપ્રેમીઓને સર્વાંગી રમતગમત અને સ્વાસ્થ્યનો અનુભવ પૂરો પાડશે.
ખેલાડીઓ અને અધિકારીઓ માટે આધુનિક ઇન્ફ્રાસ્ટ્રક્ચર
કોમ્પ્લેક્સમાં ખેલાડીઓ માટે ચેન્જિંગ રૂમ, લોકર સુવિધા, લાઉન્જ, કોચ કેબિન, રેફરી રૂમ અને મીડિયા રૂમ બનાવવામાં આવશે. આ ઉપરાંત ફર્સ્ટ-એઇડ સેન્ટર, મેડિકલ સર્વિસ સ્ટેશન, ઓડિયો-વિડિયો ટ્રેનિંગ રૂમ અને અન્ય આધુનિક સુવિધાઓ ઉપલબ્ધ રહેશે, જેથી રાષ્ટ્રીય અને આંતરરાષ્ટ્રીય સ્તરની સ્પર્ધાઓનું આયોજન સરળતાથી થઈ શકે.
VIP લાઉન્જ, કેફેટેરિયા અને બેઝમેન્ટ પાર્કિંગની સુવિધા
પ્રોજેક્ટ અંતર્ગત વહીવટી કચેરીઓ, VIP લાઉન્જ, કેફેટેરિયા, જ્યૂસ બાર, ન્યુટ્રિશન સેન્ટર, વિશાળ વેઇટિંગ એરિયા અને ડબલ હાઇટ એન્ટ્રન્સ લોબી પણ તૈયાર કરવામાં આવશે.
સાથે જ બેઝમેન્ટ પાર્કિંગ, રમતગમતના સાધનો માટે સ્ટોર રૂમ, ઇલેક્ટ્રિકલ અને ELV રૂમ સહિતની ટેક્નિકલ સુવિધાઓ પણ સામેલ કરવામાં આવશે. દિવ્યાંગજનો માટે વિશેષ સુવિધાઓ અને ટોઇલેટ પણ ઉપલબ્ધ રહેશે.
18 મહિનામાં પૂર્ણ થશે પ્રોજેક્ટ
AMCના આયોજન મુજબ વર્ક ઓર્ડર જારી થયા બાદ ચોમાસાનો સમયગાળો બાદ કરતા અંદાજે 18 મહિનામાં સમગ્ર સ્પોર્ટ્સ કોમ્પ્લેક્સનું નિર્માણ પૂર્ણ કરવામાં આવશે. આ પ્રોજેક્ટ પૂર્ણ થયા બાદ અમદાવાદને રમતગમત ક્ષેત્રે નવી ઓળખ મળશે અને ખેલાડીઓને શહેરમાં જ આંતરરાષ્ટ્રીય ધોરણની તાલીમ અને સ્પર્ધાની સુવિધા ઉપલબ્ધ થશે.
આંતરરાષ્ટ્રીય ધોરણો અને ગ્રીન બિલ્ડિંગ પર વિશેષ ભાર
આ સ્પોર્ટ્સ કોમ્પ્લેક્સનું ડિઝાઇનિંગ ઇન્ટરનેશનલ ટેનિસ ફેડરેશન (ITF) અને બેડમિન્ટન વર્લ્ડ ફેડરેશન (BWF)ના ધોરણો અનુસાર કરવામાં આવશે.
સાથે જ GRIHA, ઇન્ડિયન ગ્રીન બિલ્ડિંગ કાઉન્સિલ (IGBC) અથવા યુએસ ગ્રીન બિલ્ડિંગ કાઉન્સિલ (USGBC)ની પ્લેટિનમ રેટિંગ મેળવવા યોગ્ય પર્યાવરણમૈત્રી અને ઊર્જા કાર્યક્ષમ માળખું પણ તૈયાર કરવામાં આવશે, જે તેને ગ્રીન અને સસ્ટેનેબલ સ્પોર્ટ્સ ઇન્ફ્રાસ્ટ્રક્ચર તરીકે ઓળખ આપશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
