બજેટ 2026માં વૈશ્વિક નાણાકીય કેન્દ્ર તરીકે વિકસિત થઈ રહેલી ગુજરાતની GIFT સિટીને મોટું નાણાકીય પ્રોત્સાહન આપવામાં આવ્યું છે, જેના કારણે ઇન્ટરનેશનલ ફાઇનાન્શિયલ સર્વિસીઝ સેન્ટર (IFSC)ની વૈશ્વિક સ્પર્ધાત્મકતા વધુ મજબૂત બનશે. વિદેશી મૂડી પ્રવાહને આકર્ષવાના મહત્વના માધ્યમ તરીકે જોવામાં આવતાં IFSC માટે સરકારે ટેક્સ પ્રોત્સાહનોમાં મોટો વધારો કર્યો છે.
બજેટની જાહેરાત મુજબ હવે GIFT સિટીમાં સ્થપાયેલા એકમોને અગાઉના 10 વર્ષના બદલે સતત 20 વર્ષ સુધી ટેક્સ હોલીડેનો લાભ મળશે, જ્યારે આ મુદત પૂર્ણ થયા બાદ આ એકમોની વ્યાપારિક આવક પર માત્ર 15 ટકાનો કર લાગુ પડશે, જે ફાઇનાન્સ બિલમાં સ્પષ્ટ કરવામાં આવ્યું છે.
કેન્દ્રીય નાણામંત્રી નિર્મલા સીતારામણે પોતાના બજેટ ભાષણમાં જણાવ્યું હતું કે IFSCની સ્પર્ધાત્મકતા વધારવા માટે કલમ 147 હેઠળ કપાતની મુદતને 25 વર્ષમાંથી સતત 20 વર્ષ સુધી વિસ્તૃત કરવામાં આવી છે અને ઑફશોર બેન્કિંગ યુનિટ્સ (OBU) માટે પણ આ જ લાભ આપવામાં આવશે. તેની સરખામણીએ ભારતના અન્ય ભાગોમાં કામગીરી શરૂ કરનારી વિદેશી કંપનીઓ પર લગભગ 35 ટકાનો ન્યૂનતમ કર લાગુ પડે છે, જેના કારણે GIFT સિટી વિદેશી રોકાણકારો માટે વધુ આકર્ષક બને છે.
આ સાથે જ સરકારે IFSCમાં સ્થિત ટ્રેઝરી સેન્ટર્સ માટે ‘ડીમ્ડ ડિવિડન્ડ’ સંબંધિત જોગવાઈઓને પણ તર્કસંગત બનાવવાનો પ્રસ્તાવ મૂક્યો છે, જેથી ચોક્કસ પરિસ્થિતિઓમાં આવા પ્રાવધાનો લાગુ ન પડે. ગાંધીનગરમાં આવેલી GIFT સિટીને ભારતના પહેલા ઑફશોર-શૈલીના નાણાકીય કેન્દ્ર તરીકે વિકસાવવામાં આવી રહી છે અને આ બજેટી પગલાંનું સ્વાગત કરતાં GIFT સિટીના મેનેજિંગ ડિરેક્ટર અને ગ્રુપ CEO સંજય કૌલે જણાવ્યું હતું કે આ નિર્ણયથી IFSC આધારિત વ્યવસાયોને દીર્ઘકાલીન ટેક્સ સ્થિરતા મળશે અને ભારતની ઑફશોર નાણાકીય સ્પર્ધાત્મકતા વૈશ્વિક સ્તરે વધુ મજબૂત બનશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
