સંઘ લોક સેવા આયોગ (UPSC) દ્વારા 4 ફેબ્રુઆરી 2026ના રોજ સિવિલ સેવા પરીક્ષા (CSE) માટેનું સત્તાવાર નોટિફિકેશન જાહેર કરવામાં આવ્યું છે, જેમાં આ વર્ષે સેવા ફાળવણી, ઉમેદવારોની લાયકાત અને પરીક્ષા સુરક્ષાને લઈને મહત્વપૂર્ણ અને કડક ફેરફારો કરવામાં આવ્યા છે. નવા નિયમો મુજબ, અગાઉની પરીક્ષામાં IAS અથવા IFS તરીકે પસંદગી મેળવી ચૂકેલા ઉમેદવારો હવે CSE 2026માં ફરીથી બેસી શકશે નહીં. વધુમાં, જો કોઈ ઉમેદવાર પ્રિલિમિનરી પરીક્ષા પાસ કર્યા બાદ અને મેન્સ પહેલાં IAS અથવા IFSમાં નિમણૂક મેળવે છે, તો તે મુખ્ય પરીક્ષા માટે ક્વોલિફાય હોવા છતાં તેમાં ભાગ લઈ શકશે નહીં. IPS સેવા માટે પણ નવા પ્રતિબંધો લાગુ કરવામાં આવ્યા છે. જો કોઈ ઉમેદવાર અગાઉ IPS તરીકે પસંદ થઈ ચૂક્યો હોય, તો તે 2026ના પરિણામના આધારે ફરીથી IPS સેવાનો વિકલ્પ પસંદ કરી શકશે નહીં.
આ ઉપરાંત UPSCએ પહેલાથી સેવા મેળવી ચૂકેલા અધિકારીઓ માટે ખાસ છૂટની જાહેરાત કરી છે. જો કોઈ ઉમેદવાર 2025 કે તે પહેલાં IAS, IPS, IRS અથવા અન્ય સરકારી સેવાઓમાં જોડાઈ ગયો હોય, તો તેને બાકી રહેલા એટેમ્પ્ટ ઉપયોગ કરવા માટે 2026 અને 2027 એમ બે વર્ષ સુધી ફરી પરીક્ષા આપવાની મંજૂરી મળશે અને આ સમયગાળા દરમિયાન હાલની નોકરીમાંથી રાજીનામું આપવાની જરૂર રહેશે નહીં. જોકે, જો ઉમેદવાર 2028 પછી ફરી પરીક્ષા આપવા માંગે છે, તો પહેલા પોતાની સેવા છોડવી ફરજિયાત રહેશે.
ટ્રેનિંગ સંબંધિત નિયમોમાં પણ ફેરફાર કરવામાં આવ્યા છે. જો કોઈ ઉમેદવાર 2026ની પરીક્ષામાં સફળ થઈને ગ્રુપ-A સેવામાં પસંદ થાય અને વધુ સારો રેન્ક અથવા પસંદગીની કેડર મેળવવા માટે 2027માં ફરી પરીક્ષા આપવા માંગે છે, તો તેને સંબંધિત વિભાગ પાસેથી ટ્રેનિંગમાંથી સત્તાવાર છૂટ (Exemption) લેવી પડશે. જો ઉમેદવાર ટ્રેનિંગમાં હાજર ન રહે અને આવી મંજૂરી પણ ન મેળવે, તો તેની અગાઉની પસંદગી રદ થઈ શકે છે. વધુમાં, જો ઉમેદવાર 2027માં ફરી સફળ થાય, તો તેને બંનેમાંથી માત્ર એક જ સેવા પસંદ કરવાની રહેશે.
પરીક્ષામાં પારદર્શિતા વધારવા અને ગેરરીતિઓ અટકાવવા UPSCએ ટેકનોલોજીનો વધુ ઉપયોગ કરવાનો નિર્ણય લીધો છે. હવે AI આધારિત ફેશિયલ રિકોગ્નિશન અને આધાર વેરિફિકેશન ફરજિયાત બનાવવામાં આવ્યા છે. ઉમેદવારોને નવા ચાર-સ્ટેપ ડિજિટલ પોર્ટલ પર નોંધણી કરાવવી પડશે, જે સીધું આધાર કાર્ડ સાથે જોડાયેલું રહેશે. શૈક્ષણિક લાયકાત અંગે, IAS માટે કોઈ પણ વિષયમાં સ્નાતક ડિગ્રી ફરજિયાત છે, જ્યારે ભારતીય વિદેશ સેવા (IFS) માટે એનિમલ હસબન્ડરી, બોટની, કેમિસ્ટ્રી અથવા મેથેમેટિક્સ જેવા વિશિષ્ટ વિષયોમાં સ્નાતકની ડિગ્રી જરૂરી રહેશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
