લદ્દાખના કથિત એક્ટિવિસ્ટ સોનમ વાંગચુકની નેશનલ સિક્યોરિટી એક્ટ (NSA) હેઠળ થયેલી અટકાયતને પડકારતી અરજી પર સુપ્રીમ કોર્ટે બુધવારે (11 ફેબ્રુઆરી) સુનાવણી હાથ ધરી હતી. વાંગચુકની પત્ની ડૉ. ગીતાંજલિ આંગ્મોએ દાખલ કરેલી હેબિયસ કોર્પસ પિટિશનમાં અટકાયતને ગેરકાયદેસર ગણાવી તેમને તાત્કાલિક મુક્ત કરવાની માંગ કરવામાં આવી છે. અગાઉની સુનાવણી દરમિયાન કોર્ટે વાંગચુકના સ્વાસ્થ્ય અંગે ચિંતા વ્યક્ત કરીને કેન્દ્ર સરકારને તેમની મુક્તિ અંગેનું વલણ સ્પષ્ટ કરવા કહ્યું હતું.
કેન્દ્ર સરકારનો દાવો – તબિયતમાં ગંભીર સમસ્યા નથી
બુધવારની સુનાવણી દરમિયાન કેન્દ્ર સરકાર તરફથી સોલિસિટર જનરલ તુષાર મહેતાએ સુપ્રીમ કોર્ટને જણાવ્યું કે સોનમ વાંગચુકને સ્વાસ્થ્યના આધારે મુક્ત કરી શકાય નહીં, કારણ કે તેઓ ‘ફિટ, હેલ્ધી અને હાર્ટી’ છે. સરકારના જણાવ્યા મુજબ જેલ મેન્યુઅલ મુજબ તેમની તબિયતની 28 વખત તપાસ કરવામાં આવી છે. તેમને માત્ર હળવી પાચન સંબંધિત સમસ્યા હોવાનું કહેવામાં આવ્યું છે, જે માટે સારવાર ચાલુ છે અને કોઈ ગંભીર ચિંતા કરવાની જરૂર નથી.
સ્વાસ્થ્ય મુદ્દે કોર્ટની અગાઉની ટિપ્પણીઓ
નોંધનીય છે કે સોનમ વાંગચુકે જેલમાં પેટના દુખાવાની ફરિયાદ કરી હતી, જે દૂષિત પાણીના કારણે થઈ હોવાનું કહેવાય છે. અગાઉની સુનાવણીમાં સુપ્રીમ કોર્ટની બેન્ચે તેમની ઉંમર અને તણાવને ધ્યાનમાં રાખીને તબિયત ‘એટલી સારી નથી’ એવી નોંધ કરી હતી. જોકે સરકારનું કહેવું છે કે નિવારક અટકાયતના કેસોમાં માત્ર સ્વાસ્થ્યના આધારે મુક્તિ આપવી અપવાદરૂપ સ્થિતિમાં જ શક્ય છે.
રાષ્ટ્રીય સુરક્ષા મુદ્દે સરકારનો વલણ
કેન્દ્ર સરકારે અગાઉ કોર્ટમાં દલીલ કરી હતી કે સોનમ વાંગચુક લદ્દાખના યુવાનોને હિંસક ચળવળ તરફ ઉશ્કેરી રહ્યા હતા, જે રાષ્ટ્રીય સુરક્ષા માટે જોખમી છે. સરકારના મતે તેમની પ્રવૃત્તિઓને ધ્યાનમાં રાખીને NSA હેઠળ અટકાયત જરૂરી હતી.
ધરપકડનું કારણ અને સમગ્ર મામલો
સોનમ વાંગચુક લદ્દાખને રાજ્યનો દરજ્જો આપવા અને સિક્સ્થ શેડ્યુલ હેઠળ વિશેષ રક્ષણની માંગ સાથે આંદોલનનું નેતૃત્વ કરી રહ્યા હતા. સપ્ટેમ્બર 2025માં લેહમાં થયેલા પ્રદર્શનો હિંસક બન્યા હતા, જેમાં 4 લોકોનાં મોત થયા અને 150થી વધુ લોકો ઘાયલ થયા હતા. આ હિંસા બાદ 26 સપ્ટેમ્બર 2025ના રોજ તેમને NSA હેઠળ અટકાયત કરવામાં આવી અને બાદમાં જોધપુર જેલમાં ખસેડવામાં આવ્યા હતા.
હાલમાં સુપ્રીમ કોર્ટ આ મામલે સુનાવણી કરી રહી છે અને કેન્દ્ર સરકારને વિગતવાર જવાબ રજૂ કરવા જણાવ્યું છે. આ કેસ લદ્દાખની રાજકીય માંગણીઓ, રાષ્ટ્રીય સુરક્ષા અને નાગરિક સ્વતંત્રતા વચ્ચેના સંતુલન અંગે મહત્વપૂર્ણ ચર્ચાનો વિષય બન્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
