ઉત્તર પ્રદેશના મિર્ઝાપુર જિલ્લામાં અવૈધ ધર્માંતરણના એક મોટા નેટવર્કનો ખુલાસો થયો છે. દેહાત કોટવાલી પોલીસે ખરહરા ગામમાં આવેલી એક ચર્ચમાં દરોડા પાડીને હિંદુ પરિવારોને પ્રલોભન આપીને ઈસાઈ ધર્મમાં ફેરવવાના આરોપસર કુલ 11 લોકોની ધરપકડ કરી છે. ધરપકડમાં ચર્ચના પાદરી ભોલાનાથ પટેલ અને તેની પત્ની માયા પટેલ પણ સામેલ છે. પોલીસ કાર્યવાહી બાદ સમગ્ર વિસ્તારમાં ભારે ચર્ચા શરૂ થઈ છે.
પોલીસ મુજબ, ધરપકડ કરાયેલા 11 આરોપીઓમાં ત્રણ પુરુષ અને આઠ મહિલાઓનો સમાવેશ થાય છે. દરોડા દરમિયાન પોલીસને ચર્ચમાંથી ચાર બાઇબલ, 10 કોપી-પુસ્તકો, ત્રણ સ્માર્ટ મોબાઇલ ફોન અને એક કી-પેડ મોબાઇલ ફોન મળ્યા છે. શરૂઆતમાં 10 લોકો ઝડપાયા હતા, જ્યારે એક મહિલા દરોડા સમયે નાસી છૂટી હતી, પરંતુ બાદમાં તેને પણ પકડી લેવામાં આવી હતી, જેના કારણે ધરપકડની સંખ્યા 11 થઈ ગઈ. તમામ આરોપીઓને ન્યાયિક કસ્ટડીમાં જેલ મોકલી દેવામાં આવ્યા છે.
આ સમગ્ર કાર્યવાહી રવિવાર (14 ડિસેમ્બર 2025)ના રોજ કુરકુઠિયા ગામના રહેવાસી આનંદ દુબેની ફરિયાદના આધારે કરવામાં આવી હતી. ફરિયાદમાં આનંદ દુબેએ જણાવ્યું હતું કે ચર્ચના પાદરી અને તેના સાગરિતો દ્વારા તેમને આર્થિક સહાય, બાળકોના શિક્ષણ અને મફત તબીબી સારવાર જેવા લાલચ આપી ચર્ચમાં બોલાવવામાં આવ્યા હતા. પ્રાર્થના સભાના નામે ગરીબ અને નિરાધાર લોકોને ધર્માંતરણ માટે પ્રેરિત કરવામાં આવતું હોવાનું જણાતા તેઓ ત્યાંથી બચીને બહાર નીકળી ગયા અને પોલીસને જાણ કરી. ફરિયાદમાં પાદરી સહિત 11 લોકોના નામ સ્પષ્ટ રીતે ઉલ્લેખિત હતા.
15 ડિસેમ્બરે બાતમીદારની સૂચનાના આધારે પોલીસે ચર્ચમાં દરોડા પાડ્યા ત્યારે ત્યાં અંદાજે 30થી 40 લોકો હાજર હોવાનું સામે આવ્યું હતું અને ધર્માંતરણની પ્રવૃત્તિ ચાલી રહી હોવાનો આરોપ પોલીસ દ્વારા લગાવવામાં આવ્યો છે. ધરપકડ કરાયેલા આરોપીઓમાં ભોલાનાથ પટેલ (ગાઝીપુર), માયા પટેલ, કૃષ્ણકાંત તિવારી (બઢૌલી), અંગનુ પ્રસાદ (લેઢૂ), ફૂલપત્તી (જસોહર પહાડી), સુશીલા દેવી (કિરતાર તારા), હીરાવતી દેવી, રેણુ, લક્ષ્મી અને સાધના (વિશ્વનાથપુર)નો સમાવેશ થાય છે.
આ મામલે વરિષ્ઠ પોલીસ અધિક્ષક સોમેન બર્માએ જણાવ્યું હતું કે, “અવૈધ ધર્માંતરણની પ્રવૃત્તિમાં સંડોવાયેલા લોકોની ધરપકડ કરવામાં આવી છે. આરોપીઓ લોકો પ્રલોભન આપી ધર્મ પરિવર્તન કરાવતા હતા. તપાસ દરમિયાન તેમની પાસેથી ધાર્મિક પુસ્તકો અને મોબાઇલ ફોન સહિત પુરાવા મળ્યા છે.” હાલ પોલીસ સમગ્ર નેટવર્કની કડીઓ તપાસી રહી છે અને આ ગેંગ સાથે જોડાયેલા અન્ય લોકોની ભૂમિકા પણ ચકાસવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
