સ્કોટલેન્ડના ગ્લાસગોમાં આયોજિત કોમનવેલ્થ ગેમ્સ 2026નો 11 દિવસની રોમાંચક રમતગમત સ્પર્ધાઓ બાદ ભવ્ય અને રંગારંગ સમાપન સમારોહ સાથે અંત આવ્યો છે. સમાપન સમારોહમાં ભારત માટે ઐતિહાસિક ક્ષણ સર્જાઈ હતી, જ્યારે સ્કોટલેન્ડ દ્વારા કોમનવેલ્થ ગેમ્સનો ધ્વજ અને સેરેમોનિયલ બેટન સત્તાવાર રીતે ભારતને સોંપવામાં આવ્યા હતા.
આ હસ્તાંતરણ સાથે અમદાવાદમાં યોજાનારી 2030 કોમનવેલ્થ ગેમ્સ માટેનું કાઉન્ટડાઉન સત્તાવાર રીતે શરૂ થઈ ગયું છે. વર્ષ 2030માં કોમનવેલ્થ ગેમ્સની સ્થાપનાના 100 વર્ષ પૂર્ણ થવાના હોવાથી અમદાવાદમાં યોજાનારી આ આવૃત્તિ ઐતિહાસિક શતાબ્દી ગેમ્સ બની રહેશે.
નીરજ ચોપરા અને પી.ટી. ઉષાએ સ્વીકાર્યો કોમનવેલ્થ ધ્વજ
ગ્લાસગોના OVO હાઇડ્રો ખાતે યોજાયેલા ભવ્ય સમાપન સમારોહમાં કોમનવેલ્થ ગેમ્સના યજમાન અધિકારોના પ્રતીકરૂપે ધ્વજ અને બેટન ભારતને અર્પણ કરવામાં આવ્યા હતા. સમારોહ દરમિયાન ગ્લાસગોના લોર્ડ પ્રોવોસ્ટ જેકલીન મેકલારેનથી શરૂ થયેલી ધ્વજ હસ્તાંતરણ પ્રક્રિયા કોમનવેલ્થ સ્પોર્ટના પ્રમુખ ડૉ. ડોનાલ્ડ રુકારે, ઓલિમ્પિક ચેમ્પિયન નીરજ ચોપરા, ભારતીય ઓલિમ્પિક એસોસિએશનના પ્રમુખ પી.ટી. ઉષા અને ગુજરાતના નાયબ મુખ્યમંત્રી હર્ષ સંઘવી સુધી પહોંચી હતી.
આ ઐતિહાસિક ક્ષણે ભારતે વર્ષ 2030ની કોમનવેલ્થ ગેમ્સના યજમાન તરીકે પોતાની જવાબદારી સત્તાવાર રીતે સ્વીકારી હતી. ભારત બીજી વખત કોમનવેલ્થ ગેમ્સનું આયોજન કરશે. આ અગાઉ નવી દિલ્હીમાં વર્ષ 2010માં કોમનવેલ્થ ગેમ્સ યોજાઈ હતી.
The flag is home. 🇮🇳
A new chapter in India’s sporting journey begins as we proudly embark on the road to the Centenary Commonwealth Games 2030 in Amdavad.
With the visionary leadership of Hon’ble PM Shri @narendramodi Ji, the guidance of Hon’ble @Bhupendrapbjp Ji, Gujarat is… pic.twitter.com/i6vpy5PmfY
— Harsh Sanghavi (@sanghaviharsh) August 3, 2026
વિશ્વ સમક્ષ રજૂ થઈ ‘અમદાવાદ 2030’ની પ્રથમ ઝલક
ધ્વજ હસ્તાંતરણ બાદ ભારત દ્વારા વિશ્વ સમક્ષ ‘અમદાવાદ 2030’ની સાંસ્કૃતિક અને આધુનિક ઝલક રજૂ કરવામાં આવી હતી. ભારતીય કાર્યક્રમની થીમ ‘વસુધૈવ કુટુમ્બકમ—વિશ્વ એક પરિવાર છે’ પર આધારિત હતી.
આ પ્રસ્તુતિમાં ભારતની સાંસ્કૃતિક વિવિધતા, પ્રાચીન વારસો, સંગીત, નૃત્ય અને આધુનિક રમતગમત ક્ષમતાનું સંયોજન રજૂ કરવામાં આવ્યું હતું. વિશેષ ફિલ્મ દ્વારા અમદાવાદ અને ગુજરાતની ઐતિહાસિક ધરોહર, આધુનિક ઇન્ફ્રાસ્ટ્રક્ચર, રમતગમત સંકુલો અને ભાવિ વિકાસની ઝલક પણ દર્શાવવામાં આવી હતી.
માનુષી છિલ્લરે રજૂ કરી ‘વંદે માતરમ’ની વિશેષ પ્રસ્તુતિ
અભિનેત્રી અને પૂર્વ મિસ વર્લ્ડ માનુષી છિલ્લરે ભારતીય સાંસ્કૃતિક કાર્યક્રમનું નેતૃત્વ કર્યું હતું. તેમણે ‘વંદે માતરમ’ના 150 વર્ષ પૂર્ણ થવાના અવસરને સમર્પિત વિશેષ કાર્યક્રમ રજૂ કર્યો હતો.
સેંકડો કલાકારો, ડિજિટલ બેકડ્રોપ અને ભારતીય સંગીતના સંયોજનથી તૈયાર થયેલી પ્રસ્તુતિએ ભારતની એકતા, વિવિધતા અને દેશપ્રેમની ભાવનાને આંતરરાષ્ટ્રીય મંચ પર રજૂ કરી હતી. સમારોહમાં ભારતીય સિતારવાદક ઋષભ શર્મા અને સ્કોટિશ સંગીતકાર રોસ એન્સ્લી દ્વારા ભારતીય સિતાર તથા સ્કોટિશ પાઇપ્સનું અનોખું સંગીતમય ફ્યુઝન પણ રજૂ કરવામાં આવ્યું હતું.
શંકર મહાદેવનના ગીતોથી ગુંજી ઊઠ્યું ગ્લાસગો
પ્રખ્યાત ગાયક અને સંગીતકાર શંકર મહાદેવને તેમના પુત્રો સિદ્ધાર્થ મહાદેવન અને શિવમ મહાદેવન સાથે ભારતીય સાંસ્કૃતિક કાર્યક્રમમાં ઊર્જાસભર પ્રદર્શન કર્યું હતું.
તેમણે ‘સુનો ગૌર સે દુનિયાવાલો’, ‘ભાગ મિલ્ખા ભાગ’, ‘એ વતન’ અને ‘લહેરા દો’ સહિતનાં દેશભક્તિ અને પ્રેરણાદાયી ગીતો રજૂ કર્યા હતા. ગુજરાતી ગાયિકા ભૂમિ ત્રિવેદીએ પણ ગુજરાત અને ભાવિ યજમાન શહેર અમદાવાદને સમર્પિત વિશેષ પ્રસ્તુતિ આપી હતી.
ॐ नमः पार्वती पतये…..हर हर महादेव 🔱
The energy level of everyone has gone up!#CWG26 pic.twitter.com/lUFWfLyS3r
— Harsh Sanghavi (@sanghaviharsh) August 2, 2026
પ્રિન્સ એડવર્ડે ગેમ્સની સત્તાવાર સમાપ્તિ જાહેર કરી
ડ્યુક ઓફ એડિનબર્ગ પ્રિન્સ એડવર્ડે કિંગ ચાર્લ્સ ત્રીજાના પ્રતિનિધિ તરીકે ગ્લાસગો 2026 કોમનવેલ્થ ગેમ્સની સત્તાવાર સમાપ્તિ જાહેર કરી હતી.
તેમણે કોમનવેલ્થના તમામ દેશો અને પ્રદેશોના ખેલાડીઓને ચાર વર્ષ બાદ અમદાવાદમાં યોજાનારી 24મી કોમનવેલ્થ ગેમ્સમાં ભાગ લેવા માટે આમંત્રણ પાઠવ્યું હતું. 2030ની આવૃત્તિ કોમનવેલ્થ ગેમ્સની શતાબ્દી પૂર્ણ થવાના અવસરે યોજાવાની હોવાથી તેનું વિશેષ ઐતિહાસિક મહત્ત્વ રહેશે.
ભારતે 39 મેડલ સાથે મેળવ્યું ચોથું સ્થાન
ગ્લાસગો કોમનવેલ્થ ગેમ્સમાં ભારતીય ખેલાડીઓએ શાનદાર પ્રદર્શન કરતાં કુલ 39 મેડલ જીત્યા હતા. તેમાં 13 ગોલ્ડ, 17 સિલ્વર અને 9 બ્રોન્ઝ મેડલનો સમાવેશ થાય છે.
આ પ્રદર્શન સાથે ભારત મેડલ ટેલીમાં ઓસ્ટ્રેલિયા, ઇંગ્લેન્ડ અને કેનેડા બાદ ચોથા સ્થાને રહ્યું હતું. યજમાન સ્કોટલેન્ડે પણ 39 મેડલ જીત્યા હતા, પરંતુ ભારત વધુ સિલ્વર મેડલના આધારે મેડલ ટેલીમાં સ્કોટલેન્ડથી આગળ રહ્યું હતું.
બોક્સિંગમાં ભારતનો દબદબો, જીત્યા 10 મેડલ
ભારત માટે બોક્સિંગ સૌથી સફળ રમત સાબિત થઈ હતી. ભારતીય બોક્સરોએ કુલ 10 મેડલ જીત્યા હતા, જેમાં સાત ગોલ્ડ મેડલનો સમાવેશ થાય છે.
બોક્સિંગ ઉપરાંત એથ્લેટિક્સ, પેરા એથ્લેટિક્સ, વેઇટલિફ્ટિંગ અને જુડોમાં પણ ભારતીય ખેલાડીઓએ નોંધપાત્ર સફળતા મેળવી હતી. માત્ર 122 ખેલાડીઓના પ્રમાણમાં નાના ભારતીય દળે ગ્લાસગોમાં ઊંચો મેડલ કન્વર્ઝન રેટ નોંધાવ્યો હતો.
જાસ્મિન લેમ્બોરિયા બની ભારતીય ધ્વજવાહક
મહિલા 57 કિલોગ્રામ બોક્સિંગ સ્પર્ધામાં ગોલ્ડ મેડલ જીતનાર જાસ્મિન લેમ્બોરિયાને સમાપન સમારોહ માટે ભારતની ધ્વજવાહક બનાવવામાં આવી હતી.
જાસ્મિને ત્રિરંગો સંભાળી ભારતીય ખેલાડીઓના દળનું નેતૃત્વ કર્યું હતું. સમાપન પરેડમાં કોમનવેલ્થના 74 દેશો અને પ્રદેશોના ખેલાડીઓએ ભાગ લીધો હતો.
ગુલવીર સિંહ બન્યા ભારતના એકમાત્ર ડબલ મેડલ વિજેતા
ભારતીય એથ્લીટ ગુલવીર સિંહે ગ્લાસગોમાં ઐતિહાસિક પ્રદર્શન કર્યું હતું. તેઓ પુરુષોની 5,000 મીટર સ્પર્ધામાં કોમનવેલ્થ ગેમ્સ મેડલ જીતનાર પ્રથમ ભારતીય બન્યા હતા.
આ પહેલાં તેમણે 10,000 મીટર સ્પર્ધામાં સિલ્વર મેડલ જીત્યો હતો. આ સાથે તેઓ ગ્લાસગો 2026માં બે મેડલ જીતનાર ભારતના એકમાત્ર ખેલાડી બન્યા હતા.
શૂટિંગ, કુસ્તી અને હોકી વગર પણ ભારતનું મજબૂત પ્રદર્શન
ગ્લાસગો 2026નો રમતગમત કાર્યક્રમ અગાઉની કોમનવેલ્થ ગેમ્સની સરખામણીએ ઘણો મર્યાદિત હતો. ભારત પરંપરાગત રીતે જે રમતોમાં મજબૂત રહ્યું છે, તેવી શૂટિંગ, કુસ્તી, બેડમિન્ટન, હોકી અને ટેબલ ટેનિસને આ આવૃત્તિમાં સામેલ કરવામાં આવી નહોતી.
બર્મિંગહામ 2022માં ભારતે જીતેલા 61 મેડલમાંથી 30 મેડલ એવી રમતોમાં આવ્યા હતા, જે ગ્લાસગો 2026ના કાર્યક્રમમાં નહોતી. તેમ છતાં ભારતે 39 મેડલ સાથે પોતાનું ચોથું સ્થાન જાળવી રાખ્યું હતું.
અમદાવાદ 2030માં 15થી 17 રમતોનું આયોજન
કોમનવેલ્થ સ્પોર્ટના જણાવ્યા અનુસાર અમદાવાદ 2030માં કુલ 15થી 17 રમતોનો સમાવેશ કરવામાં આવશે. એથ્લેટિક્સ, પેરા એથ્લેટિક્સ, સ્વિમિંગ, પેરા સ્વિમિંગ, ટેબલ ટેનિસ, પેરા ટેબલ ટેનિસ, વેઇટલિફ્ટિંગ, પેરા પાવરલિફ્ટિંગ, બોક્સિંગ, જિમ્નાસ્ટિક્સ, નેટબોલ અને બાઉલ્સ જેવી રમતો અંગે પ્રાથમિક રૂપરેખા જાહેર કરવામાં આવી છે.
ક્રિકેટ, હોકી, શૂટિંગ, બેડમિન્ટન, કુસ્તી, જુડો, સ્ક્વોશ, તીરંદાજી અને રગ્બી સેવન્સ સહિતની અન્ય રમતો પણ વિચારણા હેઠળ છે. અંતિમ સ્પોર્ટ્સ કાર્યક્રમ બાદમાં જાહેર કરવામાં આવશે.
ભારત માટે વૈશ્વિક રમતગમત શક્તિ દર્શાવવાની તક
અમદાવાદ 2030 કોમનવેલ્થ ગેમ્સ ભારત માટે માત્ર આંતરરાષ્ટ્રીય રમતોત્સવની યજમાની કરવાની તક નથી, પરંતુ આધુનિક રમતગમત ઇન્ફ્રાસ્ટ્રક્ચર, આયોજન ક્ષમતા અને સાંસ્કૃતિક વારસાને વિશ્વ સમક્ષ રજૂ કરવાનું મહત્વપૂર્ણ પ્લેટફોર્મ પણ છે.
કોમનવેલ્થના તમામ 74 સભ્ય દેશો અને પ્રદેશોએ નવેમ્બર 2025માં અમદાવાદને 2030ની શતાબ્દી ગેમ્સના યજમાન તરીકે સર્વાનુમતે મંજૂરી આપી હતી. હવે કોમનવેલ્થ ધ્વજ સત્તાવાર રીતે ભારતના હાથમાં આવતા વિશ્વની નજર અમદાવાદની તૈયારીઓ પર રહેશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
