દિલ્હી હાઈકોર્ટમાં શુક્રવારે બપોરે મળેલી બોમ્બની ધમકીથી ભારે હડકંપ મચ્યો. પોલીસે જણાવ્યું કે હાઈકોર્ટના રજિસ્ટ્રી વિભાગને એક ઈ-મેઈલ મળ્યો હતો, જેમાં દાવો કરવામાં આવ્યો કે કોર્ટ પરિસરમાં ત્રણ બોમ્બ મુકવામાં આવ્યા છે અને બપોરે બે વાગ્યા સુધી સમગ્ર હાઈકોર્ટ ખાલી કરવાનું રહેશે. મેઈલમાં માત્ર ધમકી જ નહોતી પરંતુ અમુક જાણીતા રાજકીય નેતાઓના નામ લઈ તેમને નિશાન બનાવતાં આક્ષેપાત્મક નિવેદનો પણ સામેલ હતા. પોલીસ સૂત્રો મુજબ, મેઈલ મળતાની સાથે જ કોર્ટમાં બેઠેલા તમામ જજોને તેમની ચેમ્બરમાંથી તાત્કાલિક સુરક્ષિત સ્થળે ખસેડવામાં આવ્યા.
સાથે જ વકીલ, કોર્ટ સ્ટાફ અને અન્ય હાજર લોકોને પણ હાઈકોર્ટમાંથી બહાર કાઢવામાં આવ્યા. સુરક્ષાને ધ્યાનમાં રાખીને બોમ્બ સ્ક્વોડ, સ્પેશિયલ સેલ અને દિલ્હી પોલીસની મોટી ટીમ તાત્કાલિક કોર્ટ પરિસરમાં તૈનાત કરી દેવામાં આવી. હાલ કોર્ટ પરિસરમાં સઘન ચેકિંગ અને સર્ચ ઓપરેશન ચાલી રહ્યું છે અને આસપાસના વિસ્તારોને પણ સુરક્ષિત બનાવવામાં આવ્યા છે.
મેઈલમાં દાવો કરવામાં આવ્યો હતો કે બપોરે ઈસ્લામી નમાજ બાદ જજની ચેમ્બરમાં બ્લાસ્ટ થશે અને આ ઘટના એજન્સીઓને આંતરિક કાવતરું હોવાની વાત સાબિત કરી દેશે. મેઈલમાં ચોંકાવનારી રીતે તમિલનાડુની રાજકીય પાર્ટી ડીએમકેનો ઉલ્લેખ પણ કરવામાં આવ્યો હતો અને સાથે સલાહ આપવામાં આવી હતી કે ડો. એઝિલન નાગનાથન પાર્ટીની કમાન સંભાળે. એ ઉપરાંત, મેઈલમાં ઉદયનિધિ સ્ટાલિનના પુત્ર ઈનબાનિધિ ઉદયનિધને એસિડથી હુમલો કરવાની ધમકી પણ સામેલ હતી.
પોલીસે આ ઈ-મેઈલને અત્યંત ગંભીરતાથી લઈને તેની ફોરેન્સિક તપાસ શરૂ કરી છે. કયા આઈપી એડ્રેસ અથવા સર્વર પરથી મેઈલ મોકલાયો છે, તેના હેડરમાં શું છેડછાડ કરવામાં આવી છે, તે અંગે સઘન તપાસ ચાલી રહી છે. મેઈલમાં ઉલ્લેખિત તમામ નામોના લોકોની સુરક્ષા તાત્કાલિક વધારી દેવામાં આવી છે. અધિકારીઓનું કહેવું છે કે મેઈલની ભાષા, ટોન અને તેમાં આપેલા સંકેતો આ ધમકી કોઈ “ઇનસાઈડ જોબ” હોવાની શક્યતા તરફ ઇશારો કરે છે, તેથી તપાસ બહુ જ સાવચેતીપૂર્વક આગળ વધારી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
