ઈરાન સાથેની મંત્રણા નિષ્ફળ ગયા બાદ અમેરિકાના રાષ્ટ્રપ્રમુખ ડોનાલ્ડ ટ્રમ્પ ફરી એકવાર કડક વલણમાં જોવા મળી રહ્યા છે. જોકે, સ્ટ્રેટ ઑફ હોર્મુઝને લઈને તેમના તાજેતરના નિવેદનમાં નોંધપાત્ર ફેરફાર જોવા મળ્યો છે.
શરૂઆતમાં ટ્રમ્પે હોર્મુઝ સ્ટ્રેટને સંપૂર્ણપણે બ્લોક કરવાની ધમકી આપી હતી, પરંતુ હવે તેમણે સ્પષ્ટ કર્યું છે કે અમેરિકી નૌસેના ફક્ત ઈરાનિયન બંદરોથી આવતાં-જતાં જહાજોને જ રોકશે.
સોશિયલ મીડિયા પર જાહેરાત
ડોનાલ્ડ ટ્રમ્પ એ પોતાના સોશિયલ મીડિયા પ્લેટફોર્મ Truth Social પર પોસ્ટ કરીને જણાવ્યું કે, અમેરિકા 13 એપ્રિલ સવારે 10 વાગ્યાથી (ઈસ્ટર્ન ટાઇમ) ઈરાનિયન બંદરો સાથે જોડાયેલા જહાજોની નાકાબંધી શરૂ કરશે. ભારતીય સમય પ્રમાણે આ સાંજે લગભગ 7:30 વાગ્યે શરૂ થાય છે.
આ નિવેદનથી સ્પષ્ટ થાય છે કે અન્ય દેશોના જહાજોને, જે સ્ટ્રેટ ઑફ હોર્મુઝ મારફતે પસાર થાય છે, તેમને હાલ માટે કોઈ અવરોધ નહીં થાય.
US સેન્ટ્રલ કમાન્ડની સ્પષ્ટતા
ટ્રમ્પના નિવેદન બાદ United States Central Command (CENTCOM) એ પણ સત્તાવાર રીતે જણાવ્યું કે અમેરિકી નૌસેના માત્ર પર્શિયન ગલ્ફ વિસ્તારમાં ઈરાનિયન બંદરો સાથે સંકળાયેલા જહાજોને જ ટાર્ગેટ કરશે.
અન્ય દેશોના વેપાર જહાજોને રોકવાનો કોઈ ઇરાદો નથી, જે વૈશ્વિક વેપાર માટે મહત્વપૂર્ણ સંદેશ માનવામાં આવે છે.
હોર્મુઝમાં વધતો તણાવ
સ્ટ્રેટ ઑફ હોર્મુઝ વિશ્વના સૌથી મહત્વપૂર્ણ તેલ માર્ગોમાંનો એક છે, જ્યાંથી વૈશ્વિક તેલ પુરવઠાનો મોટો ભાગ પસાર થાય છે.
હાલમાં ચાલી રહેલા તણાવને કારણે અહીં ટ્રાફિક પહેલાથી જ પ્રભાવિત થયો છે. ઘણા દેશોના જહાજો અટવાઈ ગયા છે, જ્યારે ઈરાને પણ પોતાની તરફથી મર્યાદિત નાકાબંધી લાગુ કરી છે.
જોકે, ઈરાને ભારત સહિત પાંચ મિત્ર દેશોને જહાજોની અવરજવર માટે છૂટ આપી છે, જેનાથી કેટલીક હદે સ્થિતિ સંતુલિત રહી છે.
નિવેદનમાં ફેરફાર કેમ મહત્વનો?
ઉલ્લેખનીય છે કે થોડા સમય પહેલા ડોનાલ્ડ ટ્રમ્પએ એવો સંકેત આપ્યો હતો કે અમેરિકા હોર્મુઝમાંથી કોઈ પણ દેશના જહાજોને પસાર થવા નહીં દે.
પરંતુ તાજેતરની સ્પષ્ટતા વૈશ્વિક વેપાર અને ઊર્જા બજાર માટે રાહતરૂપ બની શકે છે. તેમ છતાં, ટ્રમ્પના સતત બદલાતા નિવેદનોને કારણે આંતરરાષ્ટ્રીય સ્તરે અનિશ્ચિતતા યથાવત છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
