અમેરિકાના જસ્ટિસ ડિપાર્ટમેન્ટ (DOJ) દ્વારા યૌન અપરાધી જેફ્રી એપસ્ટીન સાથે સંબંધિત દસ્તાવેજોમાંથી રાષ્ટ્રપતિ ડોનાલ્ડ ટ્રમ્પ અને તેમની પત્ની મેલાનિયા ટ્રમ્પની તસવીર ફરીથી જાહેર કરાતા અમેરિકન રાજકારણમાં ભારે ચર્ચા શરૂ થઈ છે. DOJનું કહેવું છે કે આ તસવીરમાં એપસ્ટીન કેસના કોઈપણ પીડિતને દર્શાવવામાં આવ્યા નથી. અગાઉ ન્યૂયોર્કના સરકારી વકીલોએ આશંકા વ્યક્ત કરી હતી કે આ તસવીરથી પીડિતોની ઓળખ જાહેર થવાની શક્યતા છે, તેથી સાવચેતીના ભાગરૂપે કુલ 16 ફાઇલો સાથે આ તસવીર પણ વેબસાઇટ પરથી હટાવી દેવામાં આવી હતી. જોકે તપાસ બાદ આવો કોઈ ખતરો ન હોવાનું સ્પષ્ટ થતાં, કોઈ ફેરફાર કર્યા વિના તસવીરો ફરી જાહેર કરવામાં આવી છે.
આ મુદ્દે ડેમોક્રેટ નેતાઓએ સરકાર પર ટ્રમ્પને બચાવવાનો પ્રયાસ કરવાનો આરોપ મૂક્યો છે. તેમનું કહેવું છે કે ટ્રમ્પ સાથે જોડાયેલા દસ્તાવેજો ખાસ કરીને હટાવવામાં આવ્યા હતા. જોકે ડેપ્યુટી એટર્ની જનરલ ટોડ બ્લાન્શે આ આરોપોને નકારી કાઢતાં જણાવ્યું કે આ નિર્ણયનો ટ્રમ્પ સાથે કોઈ સંબંધ નથી અને પીડિતોના અધિકારો સાથે સંકળાયેલા જૂથોની સલાહ બાદ આ પગલું લેવામાં આવ્યું હતું. DOJએ પણ સ્પષ્ટ કર્યું છે કે વિભાગ સંપૂર્ણ પારદર્શિતા જાળવે છે અને કાયદા મુજબ જરૂરી હોય તે જ માહિતી હટાવવામાં આવે છે, જેમાં પીડિતો, સગીરો અને સંવેદનશીલ વિગતોની ઓળખ છુપાવવી ફરજિયાત છે.
આ મામલે પીડિતોના વકીલ ગ્લોરિયા ઓલરેડે ગંભીર ચિંતા વ્યક્ત કરી છે. તેમનું કહેવું છે કે કેટલાક દસ્તાવેજોમાં પીડિતોના નામ અને તસવીરો યોગ્ય રીતે છુપાવવામાં આવી નથી, જેના કારણે પીડિતોને ફરી માનસિક પીડા પહોંચી છે. એક પીડિતાએ તો આરોપ લગાવ્યો કે તેનું નામ જાહેર કરવામાં આવ્યું, જ્યારે તેને પોતાની જ ફાઇલ જોવાની મંજૂરી આપવામાં આવી નહોતી.
આ સમગ્ર વિવાદ વચ્ચે DOJએ શુક્રવારે રાત્રે લગભગ ત્રણ લાખ એપસ્ટીન સંબંધિત દસ્તાવેજો જાહેર કર્યા, જેમાં પૂર્વ રાષ્ટ્રપતિ બિલ ક્લિન્ટન અને પોપ સ્ટાર માઈકલ જેક્સન જેવા જાણીતા લોકોની તસવીરો પણ સામેલ હતી. જોકે મહત્વપૂર્ણ FBI ઇન્ટરવ્યૂ, પીડિતોની સંપૂર્ણ જુબાનીઓ અને એપસ્ટીનને હળવી સજા કેમ મળી તે અંગેના મુખ્ય દસ્તાવેજો હજુ જાહેર ન થતાં સરકારની નિષ્ઠા અને પારદર્શિતાને લઈને સવાલો ઊભા થયા છે.
આ મુદ્દો હવે સંપૂર્ણ રીતે રાજકીય વિવાદ બની ગયો છે અને બંને પક્ષો એકબીજા પર સત્ય છુપાવવાના આરોપ લગાવી રહ્યા છે, જ્યારે DOJનું કહેવું છે કે આવનારા સમયમાં એપસ્ટીન કેસ સાથે જોડાયેલી વધુ ફાઇલો અને તસવીરો ધીમે ધીમે જાહેર કરવામાં આવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
