‘દરેક દેશને પોતાની રક્ષા કરવાનો અધિકાર’, આતંકવાદ મુદ્દે ભારતને વધુ એક દેશનું સમર્થન

ભારતના વિદેશ મંત્રી એસ. જયશંકર હાલમાં ત્રણ દેશોના યુરોપિયન પ્રવાસ પર છે. તેમણે બર્લિનમાં એક પ્રેસ કોન્ફરન્સમાં સ્પષ્ટપણે જણાવ્યું કે આતંકવાદ પ્રત્યે ભારતનું વલણ ખૂબ જ સ્પષ્ટ છે. ભારત આતંકવાદને બિલકુલ સહન કરશે નહીં.

આ દરમિયાન વિદેશ મંત્રી એસ જયશંકરે કહ્યું, ‘પહેલગામ આતંકવાદી હુમલા પર ભારતની જવાબી કાર્યવાહી બાદ હું તરત જ બર્લિન આવ્યો છું. ભારત આતંકવાદ સામે શૂન્ય સહિષ્ણુતા ધરાવે છે. ભારત ક્યારેય પરમાણુ બ્લેકમેલ સામે ઝૂકશે નહીં અને ભારત પાકિસ્તાન સાથે સંપૂર્ણપણે દ્વિપક્ષીય રીતે વ્યવહાર કરશે. આ અંગે કોઈને પણ કોઈ સમસ્યા કે મૂંઝવણ ન હોવી જોઈએ. અમે જર્મનીની આ સમજને પણ મહત્ત્વ આપીએ છીએ કે દરેક દેશને આતંકવાદ સામે પોતાનો બચાવ કરવાનો અધિકાર છે. જણાવી દઈએ કે વિદેશ મંત્રીની જર્મનીની મુલાકાત સાથે, ભારતને આતંકવાદના મુદ્દા પર આંતરરાષ્ટ્રીય મંચ પર બીજી મોટી જીત મળી છે. આતંકવાદ સામેના યુદ્ધમાં જર્મનીએ ભારતને ખુલ્લેઆમ ટેકો આપ્યો છે.

ભારત માટે જર્મનીનો ટેકો મહત્વપૂર્ણ

જયશંકરે જર્મનીના સમર્થનનું સ્વાગત કર્યું અને કહ્યું કે અમે પ્રશંસા કરીએ છીએ કે જર્મની ભારતના સ્વ-બચાવના અધિકારને સમજે છે. દરેક દેશને આતંકવાદ સામે પોતાનો બચાવ કરવાનો અધિકાર છે. આ ભાગીદારી અને પરસ્પર વિશ્વાસની નિશાની છે.

સરહદ પારની આતંકવાદી ઘટનાને એક્ટ ઓફ વોર માનશે ભારત

 22 એપ્રિલે જમ્મુ અને કાશ્મીરના પહેલગામમાં આતંકવાદી હુમલો થયો હતો, જેમાં 26 પ્રવાસીઓનો ધર્મ પૂછીને મારી નાખવામાં આવ્યા હતા. આ પછી ભારતે પલટવાર કરીને 6-7 મેની રાત્રે ઓપરેશન સિંદૂર હાથ ધર્યું. આ ઓપરેશન હેઠળ, ભારતીય દળોએ પાકિસ્તાન અને પાકિસ્તાન અધિકૃત કાશ્મીર (POK) માં 9 આતંકવાદી ઠેકાણાઓ પર હવાઈ હુમલા કર્યા. આ ઓપરેશન રાતે લગભગ 1:30 વાગ્યે હાથ ધરવામાં આવ્યું હતું અને તેનો ઉદ્દેશ્ય આતંકવાદીઓના લોન્ચપેડ અને હથિયારોના ડેપોનો નાશ કરવાનો હતો. વડા પ્રધાન નરેન્દ્ર મોદીએ સ્પષ્ટ કર્યું છે કે હવેથી ભારત સરહદ પારની કોઈપણ આતંકવાદી ઘટનાને એક્ટ ઓફ વોર માનશે.