ઇન્સ્ટાગ્રામ પર ‘તન્વી જોશી’ નામથી ચાલતું એક અકાઉન્ટ છેલ્લા કેટલાક સમયથી સોશિયલ મીડિયામાં ભારે ચર્ચામાં છે. આ અકાઉન્ટમાં અંદાજે 1.78 લાખ ફોલોઅર્સ છે અને તેમાં પોસ્ટ કરાયેલા શાયરીના વીડિયો લાખો નહીં પરંતુ કરોડો વ્યૂઝ મેળવી ચૂક્યા છે. ખાસ કરીને “જો ખાનદાની રઈસ હે, વો મિજાજ રખતે હૈ”, “નર્મ અપના.. તુમ્હારા લહજા બતા રહા હૈ, તુમ્હારી દૌલત નઈ નઈ હૈ” જેવી શાયરી, જે શબીના અદીબની રચના હોવાનું કહેવાય છે, તન્વી જોશીના નામે રજૂ કરાયેલા વીડિયોમાં લગભગ ત્રણ કરોડ વ્યૂઝ સુધી પહોંચી ગઈ હતી. વીડિયોમાં યુવતીની રજૂઆત, અવાજ અને સ્ટેજ પ્રેઝન્ટેશન એટલી વાસ્તવિક લાગી કે મોટાભાગના લોકો તેને સાચી વ્યક્તિ માની બેઠા હતા.
પરંતુ હવે આ મામલે ચોંકાવનારો ખુલાસો થયો છે કે ‘તન્વી જોશી’ તરીકે દેખાતી યુવતી હકીકતમાં એઆઈથી બનાવવામાં આવેલી મોડલ હોઈ શકે છે. ઇન્સ્ટાગ્રામ અને ફેસબુક પર વાયરલ થયેલા વીડિયોમાં તેની અભિવ્યક્તિ, હાવભાવ અને શાયરી રજૂ કરવાની રીત એટલી નેચરલ હતી કે એ આર્ટિફિશિયલ ઇન્ટેલિજન્સથી બનેલી છે તે ઓળખવું મુશ્કેલ હતું. અકાઉન્ટમાં કુલ 26 જેટલા વીડિયો પોસ્ટ થયેલા છે, જેમાંથી ઘણા વીડિયો મુશાયરા અથવા સ્ટેજ પર શાયરી રજૂ કરતી યુવતી જેવા લાગે છે.
મામલો વધુ ચર્ચામાં ત્યારે આવ્યો જ્યારે થાણે નગરપાલિકાની મહિલા કોર્પોરેટર મરજિયા શાનુ પઠાણે કમેન્ટ કરીને દાવો કર્યો કે વાયરલ વીડિયોમાં ઉપયોગમાં લેવાયેલો અવાજ તેનો છે. તેણે પોતાનો અસલી વીડિયો પોસ્ટ કરીને જણાવ્યું કે તેની પરવાનગી વિના અવાજનો ઉપયોગ કરવામાં આવ્યો છે. તેના આ દાવા બાદ સોશિયલ મીડિયા યુઝર્સે ક્રોસચેક શરૂ કર્યું અને શંકા ઊભી થઈ કે ‘તન્વી જોશી’ નામની કોઈ વાસ્તવિક વ્યક્તિ કદાચ અસ્તિત્વમાં જ નથી.
આ ઘટનાએ કોપીરાઈટ અને ડિજિટલ એથિક્સ અંગે નવી ચર્ચા શરૂ કરી છે. કોઈ વ્યક્તિનો અવાજ અથવા શાયરી તેની મંજૂરી વગર ઉપયોગ કરવો કેટલું યોગ્ય છે, તે મુદ્દે પ્રશ્નો ઉઠી રહ્યા છે. સાથે જ, મૂળ શાયરી લખનારને યોગ્ય ક્રેડિટ ન આપવાના મુદ્દે પણ ચર્ચા ચાલી રહી છે. એઆઈ ટેકનોલોજીનો ઉપયોગ કરીને બનાવેલા આવા વીડિયો અસલી અને નકલી વચ્ચેનો ભેદ ઓળખવો સામાન્ય લોકો માટે મુશ્કેલ બનાવી રહ્યા છે, જે સોશિયલ મીડિયા યુઝર્સ માટે નવી ચિંતાનો વિષય બની રહ્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
