અમેરિકામાં આવનારી મધ્યસત્ર (Midterm) ચૂંટણી પહેલા ઇન્ડો-અમેરિકન સમુદાયમાં ડરનો માહોલ સર્જાયો છે. Donald Trump દ્વારા પ્રસ્તાવિત ફોટો આઈડી આધારિત વોટિંગ નીતિ અને સેવ એક્ટના સમર્થનને કારણે અનેક ઇમિગ્રન્ટ સમુદાયોમાં ચિંતા વધી છે. જો આ બિલ સેનેટમાં પસાર થશે, તો નવેમ્બરમાં યોજાનારી ચૂંટણીમાં નવા નિયમો લાગૂ થઈ શકે છે.
ખાસ કરીને Texas અને Florida જેવા રિપબ્લિકન શાસિત રાજ્યોમાં રહેતા ભારતીય-અમેરિકનોમાં વધુ ભય જોવા મળી રહ્યો છે. મતદાન મથકો પર કડક દસ્તાવેજ ચકાસણીને કારણે તેઓને આશંકા છે કે પોલીસ અથવા ઇમિગ્રેશન એજન્સી (ICE)ના રડારમાં આવી શકે છે. આ પરિસ્થિતિને કારણે અંદાજે 12.5 લાખ ઇન્ડો-અમેરિકન મતદાનથી દૂર રહી શકે છે.
નવા નિયમો હેઠળ મતદાર નોંધણી સમયે નાગરિકતાનો પુરાવો આપવો ફરજિયાત બની શકે છે. ઘણા ભારતીય-અમેરિકનો માને છે કે જો સરકાર તેમની નાગરિકતા પર સવાલ ઉઠાવે તો તેને સાબિત કરવું મુશ્કેલ બની શકે છે. ખાસ કરીને વૃદ્ધ ઇમિગ્રન્ટ્સ પાસે અપડેટેડ દસ્તાવેજો અથવા જન્મ પ્રમાણપત્ર ન હોવાને કારણે તેમની મુશ્કેલીઓ વધી શકે છે.
ટેક્સાસમાં રહેતા ભારતીયોની ચિંતા વધી
ટેક્સાસમાં રહેતા ઉદ્યોગપતિ મનજીત સિંહે જણાવ્યું કે તેઓએ અગાઉ ટ્રમ્પને મત આપ્યો હતો, પરંતુ હાલની પરિસ્થિતિમાં તેઓ મતદાનથી દૂર રહેવાનો વિચાર કરી રહ્યા છે. લાંબી પ્રક્રિયા બાદ નાગરિકતા મેળવ્યા હોવા છતાં હવે તેઓ કોઈ ફેડરલ અધિકારીને દસ્તાવેજ બતાવવા ઇચ્છતા નથી.
તેમજ તેમના ભાઈ ગુરશાબાદે પણ જણાવ્યું કે ટ્રમ્પના સમયમાં માસ્કડ ICE એજન્ટ્સની તૈનાતીને કારણે લોકોમાં ભય વધ્યો છે. તેમના મત અનુસાર મતદાન બૂથ પર નાગરિકતા સાબિત કરવી ઇમિગ્રન્ટ્સ માટે જોખમરૂપ બની શકે છે.
ફ્લોરિડામાં પણ સમાન સ્થિતિ
ફ્લોરિડામાં રહેતા અરુણાભ સૈકિયાએ જણાવ્યું કે આ મુદ્દો માત્ર મતદાનનો નથી, પરંતુ ઇમિગ્રન્ટ ઓળખ પર સવાલ ઉઠાવવાનો છે. જો મતદાન કેન્દ્રો પર ઇમિગ્રેશન એજન્ટ્સ હાજર રહેશે તો સ્થિતિ વધુ ગંભીર બની શકે છે.
H-1B વિઝા પર કડકાઈથી ભારતીયો પર અસર
ટેક્સાસ અને ફ્લોરિડાએ H-1B visa ધારકો માટે પણ કડકાઈ વધારી છે. ટેક્સાસના ગવર્નર ગ્રેગ એબોર્ટ દ્વારા રાજ્યમાં H-1B વિઝા પર વિદેશી નાગરિકોની ભરતી ઘટાડવાની જાહેરાત કરવામાં આવી છે. ફ્લોરિડામાં પણ આવો જ અભિગમ અપનાવવામાં આવ્યો છે.
આ પગલાંઓનો સૌથી વધુ પ્રભાવ ભારતીયો પર પડી શકે છે, ખાસ કરીને હેલ્થકેર, રિસર્ચ અને એજ્યુકેશન સેક્ટરમાં. હાયરિંગ પ્રક્રિયાની તપાસ કરવામાં આવશે, જેમાં વિઝાધારકોની સંખ્યા અને પગાર માળખું પણ સામેલ રહેશે.
સમુદાયમાં વધતી અનિશ્ચિતતા
આ તમામ પરિસ્થિતિઓને કારણે ઇન્ડો-અમેરિકન સમુદાયમાં અનિશ્ચિતતા અને ભય વધ્યો છે. ચૂંટણી પ્રક્રિયામાં ભાગ લેવાની ઇચ્છા હોવા છતાં, દસ્તાવેજ ચકાસણી અને ઇમિગ્રેશન કાર્યવાહીનો ડર લોકોને મતદાનથી દૂર રાખી શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
