અમેરિકા જવા ઇચ્છતા ભારતીયો માટે સારા સમાચાર છે. આ વખતે અમેરિકા ભારતીયોને બમ્પર સંખ્યામાં વિઝા આપશે. જણાવી દઈએ કે ગયા વર્ષે અમેરિકાએ રેકોર્ડ 1,40,000 સ્ટુડન્ટ વિઝા જારી કર્યા હતા. આ પછી, ભારતમાં યુએસ કોન્સ્યુલેટ હવે આ વર્ષે ભારતીય વિદ્યાર્થીઓની અરજીઓમાં સંભવિત વધારાને પહોંચી વળવા માટે સંપૂર્ણ રીતે તૈયાર છે. દૂતાવાસના એક વરિષ્ઠ અધિકારીએ જણાવ્યું કે આ વર્ષે અંદાજિત કુલ સંખ્યા ગયા વર્ષ જેટલી અથવા તેના કરતા વધારે હશે.
ભારતમાં યુએસ મિશન દ્વારા ગુરુવારે સમગ્ર દેશમાં આઠમો વાર્ષિક સ્ટુડન્ટ વિઝા દિવસ ઉજવવામાં આવ્યો. આ અંતર્ગત નવી દિલ્હી, ચેન્નઈ, હૈદરાબાદ, કોલકાતા અને મુંબઈના કોન્સ્યુલર અધિકારીઓએ સ્ટુડન્ટ વિઝા અરજદારોનો ઈન્ટરવ્યુ લીધો. દિલ્હીમાં યુએસ એમ્બેસીમાં સવારથી વિદ્યાર્થીઓની લાંબી કતારો જોવા મળી. મોટી સંખ્યામાં ભારતીય વિદ્યાર્થીઓ યુએસ યુનિવર્સિટીઓમાં અભ્યાસ કરે છે અને ગયા વર્ષે ભારતમાં યુએસ કોન્સ્યુલેટે 1,40,000 કરતાં વધુ વિદ્યાર્થી વિઝા જારી કર્યા હતા, જે અન્ય કોઈપણ દેશ કરતાં વધુ હતા.
એક દિવસમાં થશે 4 હજાર વિદ્યાર્થીઓના ઇન્ટરવ્યુ
યુએસ એમ્બેસીના કાર્યવાહક કોન્સ્યુલ જનરલ સૈયદ મુજતબા અંદ્રાબીએ કહ્યું કે અંદાજ છે કે આખા દિવસ દરમિયાન લગભગ 4,000 વિદ્યાર્થીઓના ઇન્ટરવ્યુ લેવામાં આવશે. તેમણે કહ્યું કે સ્ટુડન્ટ વિઝા અમારી ટોચની પ્રાથમિકતાઓમાંની એક છે. બંને દેશો વચ્ચે શૈક્ષણિક આદાનપ્રદાન આ વહીવટીતંત્ર અને અમારા મિશનની ટોચની પ્રાથમિકતાઓમાંની એક છે. ગયા વર્ષે, અમે 1,40,000ની સંખ્યામાં વિદ્યાર્થી વિઝા જારી કર્યા હતા, જે એક રેકોર્ડ છે. અમે આ ક્ષેત્ર પર ધ્યાન કેન્દ્રિત કરવાનું ચાલુ રાખીશું. 2024માં સ્ટુડન્ટ વિઝામાં સંભવિત વધારા વિશે પૂછવામાં આવતાં તેમણે કહ્યું હતું કે, તે ગયા વર્ષ જેટલા અથવા એના કરતા વધારે જશે.
