પાસપોર્ટના અરજીકર્તાઓ માટે સારા સમાચાર આવ્યા છે. પાસપોર્ટમાં વેઈટિંગ પીરિયડ ઘટાડવા તેમજ ઝડપથી મળે તે માટે મહત્વનો નિર્ણય લેવાયો છે. હવે પાસપોર્ટ માટે અમદાવાદની ગુલબાઈ ટેકરા ઓફિસથી પણ અરજી સ્વીકારવામાં આવશે. આ ઉપરાંત જિલ્લા પાસપોર્ટ કેન્દ્રો દર શનિવારે પણ કાર્યરત રહેશે.
અમદાવાદમાંથી વિદેશ પ્રવાસે તેમજ હાયર એજ્યુકેશન માટે વિદ્યાર્થીઓ વિદેશમાં જવાની સંખ્યામાં દિવસેને દિવસે વધારો થઈ રહ્યો છે. આ ઘસારાને કારણે પાસપોર્ટ અરજદારોને નવો પાસપોર્ટ તેમજ રિન્યૂ પાસપોર્ટ માટે ઘણી મુશ્કેલીઓનો સામનો કરવો પડતો હોય છે. હાલ પાસપોર્ટ માટેની અરજી કર્યાના કેટલાય દિવસો સુધી અરજદારોને પાસપોર્ટ મળતો નથી. આ માટે આ સમસ્યાને નિવારવા માટે એક મહત્વનો નિર્ણય કરવામાં આવ્યો છે. અમદાવાદ પાસપોર્ટ ઓફિસે અંદાજે દરરોજ 3 હજાર કરતા પણ વધુ અરજીઓ આવે છે. હાલના સમયમાં પાસપોર્ટ માટે એક મહિના જેટલો વેઈટિંગ પીરિયડ છે. આ વેઈટિંગ પીરિયડ ઘટાડવા માટે અને અરજદારોને ઝડપથી પાસપોર્ટ મળે તે માટે હવે અમદાવાદની ગુલબાઈ ટેકરા ઓફિસથી પણ અરજી સ્વીકારવામાં આવશે. આ નિર્ણયથી અનેક પાસપોર્ટ અરજદારોને રાહત મળશે.
વિદેશ મંત્રાલયે થોડા દિવસ પહેલા જ એક નિર્ણય કર્યો હતો જેમાં અરજદારોની પાસપોર્ટ માટેની એપોઈન્ટમેન્ટ ઝડપી મળે તે માટે જિલ્લા પોસ્ટ ઓફિસમાં બનેલા પાસપોર્ટ સેવા કેન્દ્રો હવે દર શનિવારે પણ કાર્યરત રહેશે. આગામી આદેશ ન થાય ત્યા સુધી દર શનિવારે જિલ્લા પોસ્ટ ઓફિસોમાં પાસપોર્ટ કેન્દ્રો ચાલુ રહેશે. આ નિર્ણયથી પણ અરજીકર્તાઓને રાહત મળશે. અરજદારોએ પાસપોર્ટ બનાવવા માટે જરુરી આધાર તેમજ પુરતા ડોક્યુમેન્ટસની જરુર પડશે. આ માટે પાસપોર્ટની ઓફિસિયલ વેબસાઈટ પર વધુ જાણકારી ઉપલબ્ધ કરવામાં આવી છે.
