કેવડિયામાં એકતા નગર ખાતે એકતા પરેડનું ગ્રાન્ડ રીહર્સલ, પૂરજોશમાં એકતા પરેડની તૈયારીની જુઓ તસવીર

રાષ્ટ્રીય એકતા દિવસને લઈને કેવડિયા ખાતે શાનદાર ઉજવણીનું આયોજન કરવામાં આવ્યું છે. 31 ઓક્ટોબરના દિવસે એકતા દિવસ પરેડ, જીવંત સાંસ્કૃતિક પ્રદર્શનો અને ભારતની વિવિધતામાં એકતાની ઉજવણી કરતી CAPF ટુકડીઓ પરેડમાં સામેલ થશે.

કેવડિયા ખાતે એકતા પરેડ દિલ્હીમાં 26 જાન્યુઆરી અને 15 ઓગ્સટના રોજ યોજાય છે તેવી ભવ્ય પરેડ હશે. એકતા પરેડમાં સેનાની વિવિધ ટુકડીઓ દ્વારા અદ્ભૂત પ્રદર્શન કરવામાં આવશે. આ પ્રદર્શનને લઈને અત્યારે રીહર્સલ કરવામાં આવી રહ્યું છે.

એકતા પરેડમાં ભારતના વિવિધ પ્રદેશોની સાંસ્કૃતિક ઝાંખી દર્શાવવામાં આવશે. પંજાબના ભાંગડા હોય કે પછી મણિપુરનું નૃત્ય પ્રદેશની ઓળખ બતાવતા નૃત્ય પ્રદર્શિત કરવામાં આવશે. આ પરેડમાં દેશના વિવિધ બેન્ડ પણ જોડાશે.

એકતા પરેડમાં દેશના વિવિધ રાજ્યોના પોલીસ દળો અને સુરક્ષા દળો ઉપરાંત NCC કેડેટ્સથી લઈને આર્મી, નેવી, એરફોર્સ, NSG કમાન્ડો, BSFની ટુકડીઓ પણ ભાગ લેશે. દિલ્હીમાં સેનાની ટુકડીઓ માર્ચ કરે છે તેમ એકતા પરેડમાં પણ સેના દ્વારા માર્ચ કરાશે.

એકતા પરેડમાં સેનાની ટુકડીઓ વિવિધ પ્રકારના કરતબ બતાવશે, સ્વતંત્રતા સેનાની અને લોહ પુરુષ સરદાર વલ્લભભાઈ પટેલની જન્મજયંતી નિમિત્તે, તેમના માનમાં આ વર્ષે પ્રથમવાર કેવડિયા ખાતે ‘એકતા પરેડ’નું આયોજન કરવામાં આવ્યું છે.

આ પરેડમાં સૈનિકો મોટરસાયકલ સ્ટંટ શો મુખ્ય આકર્ષણ રહેશે, જેમાં એક સૈનિક સરદાર પટેલના પોશાક પહેરશે. એકતા પરેડમાં આસામ, ત્રિપુરા, ઓડિશા, છત્તીસગઢ, મધ્યપ્રદેશ, મહારાષ્ટ્ર, પંજાબ, જમ્મુ અને કાશ્મીર, કેરળ અને આંધ્રપ્રદેશની પોલીસ ટીમો પણ પરેડમાં પણ ભાગ લીધો છે.