નરેન્દ્ર મોદી સરકારની હેટ્રિક બાદ પ્રથમ GST કાઉન્સિલની બેઠક આજે શનિવારે 22 જૂન 2024 એ યોજાશે. જેમાં ઓનલાઈન ગેમિંગ પર ટેક્સ લગાવવા અને ખાતર પર ટેક્સ ઘટાડવા અંગે સંસદીય સમિતિની ભલામણ સહિત વિવિધ મુદ્દાઓ પર ચર્ચા થવાની અપેક્ષા છે.
8 મહિના પછી બેઠક મળશે
કેન્દ્રીય નાણાપ્રધાન નિર્મલા સીતારમણની અધ્યક્ષતામાં યોજાનારી આ બેઠકમાં રાજ્યો અને કેન્દ્રશાસિત પ્રદેશોના નાણાં પ્રધાનો પણ ભાગ લેશે. આ બેઠક આઠ મહિનાના અંતરાલ બાદ થઈ રહી છે. GST કાઉન્સિલની છેલ્લી બેઠક 7 ઓક્ટોબર 2023ના રોજ મળી હતી.
આ બેઠકમાં કાઉન્સિલના અગાઉના નિર્ણયોના આધારે ગુડ્સ એન્ડ સર્વિસ ટેક્સ (જીએસટી)ના દરને તર્કસંગત બનાવવા અને જીએસટી કાયદામાં સુધારા અંગેના અહેવાલને અંતિમ સ્વરૂપ આપવા માટે રચાયેલા ‘પ્રધાનોના જૂથ’ (જીઓએમ) ની પ્રગતિ અંગે પણ ચર્ચા થવાની સંભાવના છે એક શક્યતા છે. નિષ્ણાતોનું માનીએ તો સરકાર સંપૂર્ણ બજેટ રજૂ કરે તે પહેલા આ બેઠક ખૂબ જ મહત્વપૂર્ણ માનવામાં આવે છે.
ખાતર વેરા અંગે ચર્ચા થશે
કાઉન્સિલ ખાતર કંપનીઓ અને ખેડૂતોના હિતમાં પોષક તત્ત્વો અને કાચા માલ પર GST ઘટાડવા ફેબ્રુઆરીમાં રસાયણ અને ખાતર અંગેની સંસદીય સ્થાયી સમિતિ દ્વારા કરવામાં આવેલી ભલામણો પર પણ ચર્ચા કરી શકે છે. હાલમાં, ખાતરો પર પાંચ ટકાના દરે GST લાગે છે, જ્યારે સલ્ફ્યુરિક એસિડ અને એમોનિયા જેવા કાચા માલ પર 18 ટકાના ઊંચા દરે ટેક્સ લાગે છે.
ઓનલાઈન ગેમિંગના ટેક્સ પર ચર્ચા થશે
કાઉન્સિલ ઓનલાઈન ગેમિંગ કંપનીઓ માટે બેટ્સના સંપૂર્ણ મૂલ્ય પર 28 ટકા GST લાદવાના નિર્ણયની સમીક્ષા કરી શકે છે. આ નિર્ણય 1 ઓક્ટોબર, 2023થી અમલમાં આવ્યો છે. તેની જુલાઈ અને ઓગસ્ટની બેઠકોમાં, GST કાઉન્સિલે ઓનલાઈન ગેમિંગ, કેસિનો અને હોર્સ રેસિંગને કરપાત્ર દાવાઓ તરીકે સમાવવા માટે કાયદામાં સુધારાને મંજૂરી આપી હતી. આ નિર્ણય પછી, નાણાકીય વર્ષ 2022-23 અને 2023-24 દરમિયાન 1.12 લાખ કરોડ રૂપિયાથી વધુની GST ચોરીના આરોપમાં ઑનલાઇન ગેમિંગ કંપનીઓને 70 થી વધુ નોટિસ જારી કરવામાં આવી છે. તેમાંથી ઘણી કંપનીઓ નોટિસ વિરુદ્ધ કોર્ટમાં ગઈ છે.
આ મામલે પણ સમીક્ષા કરવામાં આવશે
કોર્પોરેટ ગેરંટીના સંદર્ભમાં, કાઉન્સિલ કંપનીઓ દ્વારા તેમની પેટાકંપનીઓને આપવામાં આવેલી ગેરંટી પર 18 ટકા GST લાદવાના નિર્ણયની પણ સમીક્ષા કરી શકે છે. આ ઉપરાંત, GST કાઉન્સિલ દરોના તર્કસંગતકરણ પર GOM ને રિપોર્ટ સબમિટ કરવા માટે સમય મર્યાદા નક્કી કરી શકે છે. છેલ્લા એક વર્ષમાં GOMની બે વખત પુનઃરચના કરવામાં આવી છે અને હવે તેનું નેતૃત્વ બિહારના નાયબ મુખ્યમંત્રી સમ્રાટ ચૌધરી કરી રહ્યા છે.
સ્પેક્ટ્રમ શુલ્ક અંગે ચર્ચા કરાશે
સૂત્રોના જણાવ્યા અનુસાર, GST કાઉન્સિલ સ્પષ્ટતા કરી શકે છે કે ટેલિકોમ કંપનીઓએ સ્પેક્ટ્રમ ચાર્જિસ માટે ચૂકવવામાં આવેલા હપ્તાઓ સાથે GST ચૂકવવો પડશે. હાલમાં, GST સિસ્ટમ હેઠળ શૂન્ય, પાંચ, 12, 18 અને 28 ટકાના દર સાથે પાંચ ટેક્સ સ્લેબ છે. 28 ટકાના દર ઉપરાંત લક્ઝરી સામાન પર સેસ પણ વસૂલવામાં આવે છે.
