ગુજરાત હાઈકોર્ટે નાણાંકીય વર્ષ 2024-25 માટે આવકવેરા રિટર્ન (ITR) ફાઈલ કરવાની નિર્દિષ્ટ તારીખ લંબાવવાના એક મહત્વપૂર્ણ આદેશમાં સેન્ટ્રલ બોર્ડ ઓફ ડાયરેક્ટ ટેક્સ (CBDT)ને તાત્કાલિક નિર્દેશ આપ્યો છે. ખંડપીઠ, જસ્ટિસ ભાર્ગવ ડી. કારીયા અને જસ્ટિસ પ્રણવ ત્રિવેદી દ્વારા, આ વર્ષ માટે ITR ફાઇલિંગની નવી તારીખ 30 નવેમ્બર, 2025 સુધી લંબાવવા જણાવ્યું છે. હાઈકોર્ટે નોંધ્યું કે, અગાઉ ટેક્સ ઓડિટ રિપોર્ટ ફાઈલ કરવાની તારીખ 31 ઓક્ટોબર, 2025 સુધી લંબાવવામાં આવી હતી, અને આવકવેરા કાયદાની જોગવાઈઓ અનુસાર ઓડિટ રિપોર્ટ અને ITR ફાઈલિંગ વચ્ચે એક મહિનાનો સમયગાળો જાળવવો અનિવાર્ય છે.
હાઈકોર્ટે ઈન્કમટેક્સ બાર એસોસિયેશન દ્વારા દાખલ કરાયેલી રિટ અરજીની સુનાવણી દરમિયાન CBDTને સ્પષ્ટતા કરવા માટે પૂછ્યું હતું કે, જ્યારે ઓડિટ રિપોર્ટ ફાઈલ કરવાની તારીખ લંબાવવામાં આવી છે, ત્યારે ITR ફાઈલ કરવાની તારીખ કેમ લંબાવવામાં આવી નથી. કોર્ટે કલમ-44એબીના નુક્સાન અને હેતુને આધારે સ્પષ્ટ કર્યું કે, ઓડિટ રિપોર્ટ ફાઈલિંગ અને આવકવેરા રિટર્ન ફાઈલિંગ વચ્ચે એક મહિનાનો સમયગાળો રાખવાનો ઉદ્દેશ્ય એ છે કે, કરદાતાઓને વ્યવસાય અથવા બિઝનેસની આવકના આધારે સરળતાથી રિટર્ન ફાઈલ કરવાની સગવડ મળી શકે. હાઈકોર્ટે જણાવ્યું કે, આ સમયગાળો હંમેશા જાળવવામાં આવ્યો છે અને નિયત તારીખ લંબાવવા પર કોઈ પ્રતિબંધ નથી.
કોર્ટે CBDTને તાત્કાલિક પરિપત્ર જાહેર કરવા અને તે રિતે નિર્ધારિત કરદાતાઓ માટે ITR ફાઈલિંગની નવી સમયમર્યાદા 30 નવેમ્બર, 2025 સુધી લંબાવવામાં આવે તે સુનિશ્ચિત કરવા જણાવ્યું છે. તેમજ, આ હુકમના પાલન અંગે CBDT દ્વારા પ્રગતિ અહેવાલ પણ સુનાવણી પહેલા રજૂ કરવાને લઇને કોર્ટે તાકીદ કરી છે. આગળની સુનાવણી 16 ઑક્ટોબર, 2025 માટે મુકરર કરવામાં આવી છે. આ મહત્વપૂર્ણ નિર્ણય ટેક્સ ઓડિટ કરાવતા કરદાતાઓ માટે મોટી રાહત લાવે છે, કારણ કે હવે તેઓને ITR રિટર્ન સમયસર અને સરળતાથી ફાઈલ કરવાની પૂરતી તક મળશે અને અગાઉના ટાઈમિંગના દબાણને દૂર કરવામાં મદદ મળશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
