કેન્દ્ર સરકારના Right to Education Act 2009 હેઠળ ગુજરાતમાં ખાનગી સ્કૂલોમાં ધોરણ 1માં 25 ટકા બેઠકો માટે મફત પ્રવેશની ઓનલાઈન કેન્દ્રિય પ્રક્રિયા આજથી (4 એપ્રિલ) શરૂ થઈ ગઈ છે. 2026-27ના શૈક્ષણિક વર્ષ માટે આ પ્રવેશ પ્રક્રિયા 4 એપ્રિલથી 17 એપ્રિલ સુધી ચાલુ રહેશે, જેમાં વાલીઓ ઓનલાઈન અરજી કરી શકશે.
આ વર્ષે રાજ્યમાં કુલ 9709 ખાનગી સ્કૂલોમાં 84,228 બેઠકો ઉપલબ્ધ છે, જે ગયા વર્ષની તુલનામાં ઓછી છે. તેમાં ગુજરાતી માધ્યમની 41,411, અંગ્રેજી માધ્યમની 40,262, હિન્દી માધ્યમની 2,235 અને અન્ય માધ્યમની 320 બેઠકોનો સમાવેશ થાય છે.
પ્રવેશ પ્રક્રિયામાં આ વર્ષે કેટલીક મહત્વપૂર્ણ બદલાવ પણ કરવામાં આવ્યા છે. ખાસ કરીને પાળી પદ્ધતિમાં ચાલતી 56 સ્કૂલોમાં વાલીઓને હવે સવાર કે બપોરની પાળી પસંદ કરવાની અલગથી તક મળશે. જોકે, એકવાર પ્રવેશ ફાળવાયા પછી તે જ વિકલ્પમાં પ્રવેશ કન્ફર્મ કરવો ફરજિયાત રહેશે.
RTE હેઠળ કુલ 13 કેટેગરીના બાળકોને મેરિટ આધારિત અગ્રતાક્રમ મુજબ પ્રવેશ આપવામાં આવે છે. તેમાં અનાથ બાળકો, સંભાળની જરૂરિયાત ધરાવતા બાળકો, બાળમજૂરોના બાળકો, વિકલાંગ બાળકો, શહીદ જવાનોના બાળકો, એક જ દીકરી ધરાવતા માતા-પિતા, BPL કુટુંબોના બાળકો સહિત વિવિધ વર્ગોનો સમાવેશ થાય છે.
આ વર્ષે સૌથી મહત્વપૂર્ણ ફેરફાર અગ્રતાક્રમમાં થયો છે. ગત વર્ષે આંગણવાડીના બાળકોને નવમા ક્રમે પ્રાથમિકતા આપવામાં આવતી હતી, જ્યારે હવે તેમને 12મા ક્રમે રાખવામાં આવ્યા છે, જે EWS કેટેગરીથી પણ પાછળ છે. આ ઉપરાંત, SEBC સાથે અન્ય પછાત વર્ગની જગ્યાએ હવે EWS (આર્થિક રીતે નબળા વર્ગ)નો સમાવેશ કરવામાં આવ્યો છે.
ગત વર્ષે આશરે 34 હજાર આંગણવાડીના બાળકોને પ્રવેશ મળ્યો હતો, પરંતુ કેટલીક ગેરરીતિઓ સામે આવતા આ વર્ષે સરકાર દ્વારા આ ફેરફાર કરવામાં આવ્યો છે. કેટલીક ફરિયાદો હતી કે કેટલાક વાલીઓ આંગણવાડીમાં ભણ્યા વગર પણ પ્રવેશ માટે ખોટા દાખલા રજૂ કરતા હતા.
આ નવા નિયમો સાથે સરકાર પ્રવેશ પ્રક્રિયામાં પારદર્શિતા અને યોગ્ય લાભાર્થીઓ સુધી યોજનાનો લાભ પહોંચે તે સુનિશ્ચિત કરવા પ્રયત્ન કરી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
