થાઈલેન્ડના ઉત્તર-પૂર્વીય મુકદહન પ્રાંતમાંથી એક અત્યંત ચોંકાવનારો અને દર્દનાક માર્ગ અકસ્માત સામે આવ્યો છે. અહીં માત્ર 11 વર્ષના સગીર બાળકે પિકઅપ ટ્રક ચલાવતા તીર્થયાત્રા પર પગપાળા જઈ રહેલા બૌદ્ધ ભિક્ષુઓના સમૂહને અડફેટે લીધો હતો. આ ભયાનક અકસ્માતમાં ઓછામાં ઓછા 9 બૌદ્ધ ભિક્ષુઓના મોત થયા હોવાના અહેવાલો સામે આવ્યા છે, જ્યારે અનેક લોકો ઘાયલ થયા છે. કેટલાક આંતરરાષ્ટ્રીય અહેવાલોમાં મૃત્યુઆંક 8થી 10 વચ્ચે જણાવાયો છે, તેથી અંતિમ સત્તાવાર આંકડા તપાસ બાદ સ્પષ્ટ થશે.
260 કિલોમીટરની પદયાત્રા દરમિયાન દુર્ઘટના
અહેવાલો મુજબ, મુકદહન પ્રાંતના આશરે 35 બૌદ્ધ ભિક્ષુઓનો સમૂહ ઉબોન રત્ચાથાની પ્રાંત સુધીની લગભગ 260 કિલોમીટર લાંબી ધાર્મિક પદયાત્રા પર નીકળ્યો હતો. યાત્રા શરૂ થયાને આશરે 30 મિનિટ જ થયા હતા, ત્યાં જ પાછળથી આવી રહેલી પિકઅપ ટ્રક બેકાબૂ થઈને ભિક્ષુઓના સમૂહ સાથે અથડાઈ હતી.
સ્થાનિક બચાવ જૂથો અને મીડિયા અહેવાલો અનુસાર, ભિક્ષુઓ રસ્તાની એક બાજુ શાંતિથી લાઈનમાં ચાલી રહ્યા હતા. તે દરમિયાન પિકઅપ ટ્રક અચાનક રોડ પરથી નીચે ઉતરીને સીધી તેમના સમૂહમાં ઘૂસી ગઈ હતી. અકસ્માત બાદ ઘટનાસ્થળે અફરાતફરી અને ચીસાચીસ મચી ગઈ હતી.
5 ભિક્ષુઓનાં ઘટનાસ્થળે મોત
મુકદહન પ્રાંતના ગવર્નર વોરયાન બૂનનારતના હવાલાથી આવેલા અહેવાલો મુજબ, અકસ્માત એટલો ભીષણ હતો કે 5 ભિક્ષુઓનાં ઘટનાસ્થળે જ મોત થયા હતા. અન્ય ભિક્ષુઓને ગંભીર ઇજાઓ સાથે હોસ્પિટલ ખસેડવામાં આવ્યા, જ્યાં સારવાર દરમિયાન વધુ ભિક્ષુઓએ દમ તોડ્યો. કેટલાક અહેવાલો મુજબ 13થી વધુ લોકોને હોસ્પિટલમાં દાખલ કરવામાં આવ્યા છે અને કેટલાકની હાલત ગંભીર છે.
અકસ્મતમાં ઘાયલ ભિક્ષુઓને તાત્કાલિક નજીકની હોસ્પિટલોમાં ખસેડવામાં આવ્યા હતા. સ્થાનિક પ્રશાસન, પોલીસ અને બચાવદળોએ ઘટનાસ્થળે પહોંચીને રાહત કામગીરી શરૂ કરી હતી અને માર્ગ પરની અવરજવર નિયંત્રિત કરવામાં આવી હતી.
11 વર્ષના છોકરાએ બૌદ્ધ સાધુઓ પર પિકઅપ ટ્રક ચડાવી દીધી, 9 ના મોત
જુઓ આ ભયાનક વીડિયો….#thailand #Accidentpic.twitter.com/OXHqow52i6
— MG Vimal ✍️ – વિમલ પ્રજાપતિ (@mgvimal_12) July 2, 2026
11 વર્ષનો સગીર પોલીસ કસ્ટડીમાં
અકસ્મત બાદ પિકઅપ ટ્રક ચલાવનાર 11 વર્ષના સગીર બાળકને પોલીસે કસ્ટડીમાં લીધો છે. થાઈલેન્ડના કાયદા મુજબ, સગીર હોવાથી તેની પૂછપરછ બાળ સંરક્ષણ અધિકારીઓની હાજરીમાં કરવામાં આવશે. પોલીસ હાલમાં એ તપાસી રહી છે કે બાળકને વાહન સુધી પહોંચ કેવી રીતે મળી અને તે આટલું અંતર એકલો કેવી રીતે ચલાવી શક્યો.
Reutersના અહેવાલ મુજબ, પોલીસ અધિકારીઓએ જણાવ્યું કે બાળક પરિવારના ઘરમાંથી પિકઅપ ટ્રક લઈને નીકળી ગયો હતો અને આશરે 10 કિલોમીટર ચલાવ્યા બાદ આ અકસ્માત સર્જાયો. હાલ સુધી આરોપ નક્કી કરવામાં આવ્યા નથી, કારણ કે તપાસકર્તાઓ અકસ્માતની પરિસ્થિતિ અને જવાબદારી નક્કી કરી રહ્યા છે.
સાક્ષી ભિક્ષુઓએ શું કહ્યું?
અકસ્મતમાંથી બચેલા ભિક્ષુઓએ પોલીસને જણાવ્યું કે વાહન અકસ્માત પહેલાંથી જ રસ્તા પર લહેરાતું અને બેકાબૂ રીતે આગળ વધી રહ્યું હતું. થોડા જ પળોમાં ટ્રક ભિક્ષુઓના સમૂહ સાથે અથડાઈ ગઈ. CCTV અને સાક્ષીઓના નિવેદનોના આધારે પોલીસ અકસ્માતનું પુનર્નિર્માણ કરી રહી છે.
માતા-પિતાની બેદરકારીની પણ તપાસ
સ્થાનિક પોલીસ હવે બાળકના માતા-પિતાની ભૂમિકા અને સંભવિત બેદરકારીની પણ તપાસ કરી રહી છે. અધિકારીઓ એ જાણવા માંગે છે કે ચાવી બાળકને કેવી રીતે મળી, વાહન ઘરમાં કઈ સ્થિતિમાં પાર્ક હતું અને સગીર વયના બાળકને વાહન ચલાવવાની તક કેવી રીતે મળી. APના અહેવાલ મુજબ, બાળકના માતા-પિતાને બેદરકારી સંબંધિત કાર્યવાહીનો સામનો કરવો પડી શકે છે.
થાઈલેન્ડમાં રોડ સેફ્ટી પર ફરી સવાલ
આ દુર્ઘટનાએ થાઈલેન્ડમાં રોડ સેફ્ટી, સગીરો દ્વારા વાહન ચલાવવાના જોખમ અને પરિવારીય જવાબદારી અંગે ગંભીર પ્રશ્નો ઊભા કર્યા છે. ધાર્મિક પદયાત્રા પર નીકળેલા ભિક્ષુઓ સાથે થયેલી આ ઘટના બાદ સમગ્ર વિસ્તારમાં શોકની લાગણી ફેલાઈ ગઈ છે.
થાઈલેન્ડમાં માર્ગ અકસ્માતો લાંબા સમયથી મોટી સમસ્યા રહ્યા છે. આ ઘટનાએ ફરી એકવાર બતાવ્યું છે કે વાહન સલામતી, બાળકોની દેખરેખ અને ટ્રાફિક કાયદાના કડક અમલની કેટલી જરૂર છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
