આજથી જેપી મોર્ગન બોન્ડ ઈન્ડેકસમાં ભારતનો સમાવેશ

શુક્રવાર ૨૮મી જૂન, ૨૦૨૪નો દિવસ ભારતના ડેટ માર્કેટના ઈતિહાસનો એક સુર્વણ દિવસ બનવા જઈ રહ્યો છે. આજથી જેપી મોર્ગન ચેઝ એન્ડ કંપનીના ઈમર્જિંગ માર્કેટ ઈન્ડેકસમાં ભારતની સરકારી જામીનગીરીઓને સ્થાન આપવામાં આવશે. ભારતીય અર્થતંત્રની આ ઐતિહાસિક સિદ્ધિનો અગાઉથી જ લાભ ખટવા માટે વિદેશી રોકાણકારોએ ૨૦૨૪ના પ્રથમ અર્ધવાર્ષિક ગાળામાં લગભગ ૮ અબજ ડોલર ભારતીય બોન્ડ માર્કેટમાં ઠાલવ્યા છે. ગત વર્ષની સરખામણીમાં આ નાણાપ્રવાહ નોંધપાત્ર વધારે છે.

જોકે નિષ્ણાતોના મતે આ માત્ર શરૂઆત છે કારણકે સ્થાનિક બોન્ડ માર્કેટ આગામી ૧૦ મહિનામાં લગભગ ૩૦ અબજ ડોલરનો ઈન્ફલો આવશે. સ્થાનિક ડેટ માર્કેટમાં વિદેશી પોર્ટફોલિયો રોકાણકારો દ્વારા ચોખ્ખું રોકાણ ૨૦૨૩ના પ્રથમ છ મહિનામાં માત્ર ૨.૧ અબજ ડોલર હતું. બોન્ડ માર્કેટમાં ભારતના ઉમેરણની ઘોષણા બાદથી ૧૧.૨ અબજ ડોલરના પ્રવાહને જોતાં અમે આગામી ૧૦ મહિનામાં વધુ ૩૦ અબજ ડોલર એટલેકે સરેરાશ દર મહિને ૩ અબજ ડોલરનું રોકાણ આવી શકે છે તેમ ગોલ્ડમન સાક્સના ડેની સુવાનપ્રુતિ સહિતના વિશ્લેષકોએ એક નોટમાં જણાવ્યું હતું.

જેપી મોર્ગન ચેઝ એન્ડ કંપનીએ ગત વર્ષે સપ્ટેમ્બરમાં જાહેરાત કરી હતી કે તેના બેન્ચમાર્ક ગ્લોબલ બોન્ડ ઇન્ડેક્સ ઇમર્જિંગ માર્કેટ્સ ઇન્ડેક્સમાં ભારતીય સરકારી બોન્ડ ઉમેરશે. જીબીઆઈ-ઈમર્જિંગ માર્કેટ વૈશ્વિક ઈન્ડેકસની શ્રેણીમાં પ્રવેશનાર ભારત ૨૫મું બજાર હશે.