ભારતે 13 જાન્યુઆરીએ BRICS પ્રેસિડેન્સી 2026 માટે સત્તાવાર વેબસાઈટ અને લોગોનું ભવ્ય રીતે લોન્ચિંગ કર્યું છે. વર્ષ 2026માં ભારત BRICS જેવા મહત્વના બહુપક્ષીય વૈશ્વિક મંચની અધ્યક્ષતા સંભાળશે, જે ભારતની વૈશ્વિક કૂટનીતિક ભૂમિકાને વધુ મજબૂત બનાવે છે. આ અવસરે વિદેશ મંત્રી ડૉ. એસ. જયશંકર ઉપસ્થિત રહ્યા હતા અને તેમણે BRICS 2026 માટે ભારતની દૃષ્ટિ, પ્રાથમિકતાઓ અને લક્ષ્યો વિશે વિગતવાર માહિતી આપી હતી.
વિદેશ મંત્રી જયશંકરે જણાવ્યું કે ભારતના અધ્યક્ષપદ દરમિયાન BRICS મંચને વધુ લોકો-કેન્દ્રિત, સમાવિષ્ટ અને પરિણામલક્ષી બનાવવાનો પ્રયાસ કરવામાં આવશે. તેમણે કહ્યું કે BRICS 2026ની થીમ “ક્ષમતાઓમાં વધારો, નવીનતાને પ્રોત્સાહન અને બધાના લાભ માટે ટકાઉ વિકાસ” પર આધારિત છે. આ થીમ માત્ર આર્થિક વિકાસ સુધી સીમિત નથી, પરંતુ વૈશ્વિક પડકારો જેમ કે હવામાન પરિવર્તન, સપ્લાય ચેઇન સ્થિરતા, ટેકનોલોજી સુધી સમાન પહોંચ અને વૈશ્વિક દક્ષિણના દેશોની અવાજને મજબૂત બનાવવા પર પણ ભાર મૂકે છે.
Launched preparations for BRICS India 2026 with the unveiling of website, theme and logo, alongside MoS’ @KVSinghMPGonda and @PmargheritaBJP.
🇮🇳’s chairship of BRICS will adopt a ‘Humanity-first’ and ‘people-centric’ approach to build for resilience, innovation, cooperation and… pic.twitter.com/zhLIIzrokf
— Dr. S. Jaishankar (@DrSJaishankar) January 13, 2026
જયશંકરે સમજાવ્યું કે લોન્ચ કરાયેલ નવો લોગો ભારતની આ દૃષ્ટિને સ્પષ્ટ રીતે પ્રતિબિંબિત કરે છે. લોગો કમળથી પ્રેરિત છે, જે ભારતની સંસ્કૃતિમાં પવિત્રતા, સ્થિરતા અને નવી શરૂઆતનું પ્રતીક માનવામાં આવે છે. કમળની પાંખડીઓમાં તમામ BRICS સભ્ય દેશોના રંગો સમાવિષ્ટ કરવામાં આવ્યા છે, જે જૂથની વિવિધતા વચ્ચેની એકતા અને સહકારની ભાવનાને દર્શાવે છે. લોગોના કેન્દ્રમાં ‘નમસ્તે’નું પ્રતીક છે, જે ભારતની સંસ્કૃતિમાં આદર, સંવાદ અને સહયોગનું પ્રતીક છે. આથી સ્પષ્ટ થાય છે કે ભારત પોતાના અધ્યક્ષપદ દરમિયાન સહકાર અને પરસ્પર સન્માનને કેન્દ્રમાં રાખશે.
BRICS જૂથનું નેતૃત્વ મૂળ પાંચ મુખ્ય ઉભરતી અર્થવ્યવસ્થાઓ—બ્રાઝિલ, રશિયા, ભારત, ચીન અને દક્ષિણ આફ્રિકા—દ્વારા થાય છે. ત્યારબાદ ઈજિપ્ત, ઈથિઓપિયા, ઈરાન, યુએઈ અને ઈન્ડોનેશિયા જોડાતા હવે BRICS 11 દેશોનું શક્તિશાળી મંચ બની ગયું છે. વિદેશ મંત્રીએ જણાવ્યું કે ભારતની અધ્યક્ષતા દરમિયાન આ વિસ્તૃત BRICSને વધુ સંકલિત અને અસરકારક બનાવવા પર ધ્યાન આપવામાં આવશે, જેથી વૈશ્વિક નિર્ણય પ્રક્રિયામાં વિકાસશીલ દેશોની ભૂમિકા વધુ મજબૂત બને.
આ સાથે BRICS Indiaની સત્તાવાર વેબસાઈટ પણ લોન્ચ કરવામાં આવી છે, જે ભારતના અધ્યક્ષપદ દરમિયાન તમામ બેઠકો, પહેલો, નીતિ દસ્તાવેજો અને પરિણામો માટે એક સામાન્ય ડિજિટલ પ્લેટફોર્મ તરીકે કાર્ય કરશે. આ વેબસાઈટ પારદર્શિતા વધારશે, સભ્ય દેશો વચ્ચે સંચારને સરળ બનાવશે અને જનતાને પણ BRICSની પ્રવૃત્તિઓ સાથે જોડશે.
વિદેશ મંત્રાલયના જણાવ્યા અનુસાર BRICS આજે માત્ર એક આર્થિક જૂથ નથી, પરંતુ વૈશ્વિક સ્તરે એક મહત્વપૂર્ણ પ્લેટફોર્મ બની ગયું છે. હાલ BRICS દેશો વિશ્વની લગભગ 49.5 ટકા વસ્તી, વૈશ્વિક GDPના આશરે 40 ટકા અને વૈશ્વિક વેપારના લગભગ 26 ટકાનું પ્રતિનિધિત્વ કરે છે. 2026માં BRICS પોતાની 20મી વર્ષગાંઠ ઉજવશે અને ભારતના નેતૃત્વ હેઠળ આ મંચ વૈશ્વિક સુખાકારી, સહકાર અને ટકાઉ વિકાસને નવી દિશા આપશે, એવી આશા વ્યક્ત કરવામાં આવી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
