રાષ્ટ્રીય સ્વયંસેવક સંઘ (RSS)ના ગુજરાત પ્રાંત કાર્યાલય ડૉ. હેડગેવાર ભવન, કર્ણાવતી ખાતે 80મા સ્વાતંત્ર્ય પર્વ નિમિત્તે ધ્વજવંદન અને ભારતમાતા પૂજનનો કાર્યક્રમ યોજાયો હતો. આ પ્રસંગે જાણીતા પોડકાસ્ટર અને એન્ટ્રપ્રેન્યોર જયભાઈ થડેશ્વરના હસ્તે રાષ્ટ્રધ્વજ ફરકાવવામાં આવ્યો હતો. કાર્યક્રમમાં સંઘના પદાધિકારીઓ, સ્વયંસેવકો અને નગરજનો મોટી સંખ્યામાં ઉપસ્થિત રહ્યા હતા.
કાર્યક્રમના મુખ્ય વક્તા અને રાષ્ટ્રીય સ્વયંસેવક સંઘ ગુજરાત પ્રાંતના પ્રાંત બૌદ્ધિક પ્રમુખ જશુભાઈ ચૌધરીએ સ્વાતંત્ર્ય પર્વના ઐતિહાસિક અને રાષ્ટ્રીય મહત્વ અંગે પોતાના વિચારો વ્યક્ત કર્યા હતા. તેમણે સરદાર વલ્લભભાઈ પટેલની 150મી જન્મજયંતી અને ‘વંદે માતરમ્’ના 150 વર્ષના સંદર્ભમાં રાષ્ટ્રીય એકતા, સ્વદેશી અને સ્વરાજ્યના વિચારો પર ભાર મૂક્યો હતો.
સરદાર પટેલના યોગદાનને યાદ કર્યા
જશુભાઈ ચૌધરીએ જણાવ્યું કે આજનું અખંડ અને એકતાબદ્ધ ભારત સરદાર વલ્લભભાઈ પટેલના અવિસ્મરણીય યોગદાનને કારણે શક્ય બન્યું છે. તેમણે સરદાર પટેલના 150મા જન્મવર્ષ નિમિત્તે તેમના રાષ્ટ્રનિર્માણના કાર્યોને યાદ કરી શ્રદ્ધાપૂર્વક વંદન કર્યું હતું.
તેમણે કહ્યું કે સ્વતંત્રતા બાદ દેશના અનેક રજવાડાઓને એકસૂત્રમાં બાંધવામાં સરદાર પટેલની ભૂમિકા ઐતિહાસિક રહી છે. ભારતની એકતા અને અખંડિતતા જાળવી રાખવા માટે તેમની દૃઢતા અને રાષ્ટ્રભાવના આજની પેઢી માટે પણ પ્રેરણારૂપ છે.
‘વંદે માતરમ્’ના 150 વર્ષનો ઉલ્લેખ
જશુભાઈ ચૌધરીએ પોતાના સંબોધનમાં ‘વંદે માતરમ્’ના 150 વર્ષ પૂર્ણ થવાના પ્રસંગનો પણ ઉલ્લેખ કર્યો હતો. તેમણે જણાવ્યું કે બંકિમચંદ્ર ચટ્ટોપાધ્યાયે 1875માં ‘વંદે માતરમ્’ની રચના કરી હતી અને તેમાં ભારતને માત્ર ભૂખંડ નહીં, પરંતુ એક જીવંત રાષ્ટ્રરૂપે પ્રસ્તુત કરવામાં આવ્યું છે.
તેમણે કહ્યું કે સ્વાતંત્ર્ય ચળવળ દરમિયાન ‘વંદે માતરમ્’ ક્રાંતિકારીઓ માટે પ્રેરણાનો મહામંત્ર બન્યું હતું. આજે પણ ‘વંદે માતરમ્’ દેશભક્તિ, રાષ્ટ્રીય ગૌરવ અને એકતાની ભાવનાને મજબૂત કરે છે.
સ્વતંત્રતામાં સ્વધર્મ, સ્વદેશી અને સ્વરાજ્યનો વિચાર જરૂરી
જશુભાઈ ચૌધરીએ દેશની આઝાદી માટે સંઘર્ષ કરનાર જાણીતા અને અજાણ્યા તમામ ક્રાંતિવીરો તથા બલિદાન આપનાર સ્વાતંત્ર્ય સેનાનીઓને યાદ કર્યા હતા.
તેમણે પ્રશ્ન ઉઠાવ્યો કે આપણે રાજકીય રીતે સ્વાધીન થયા છીએ, પરંતુ સાચા અર્થમાં સ્વતંત્ર બનવા માટે જીવનમાં સ્વધર્મ, સ્વદેશી અને સ્વરાજ્યના વિચારોને સ્થાન આપવું જરૂરી છે. તેમના મતે સ્વતંત્રતા માત્ર શાસન પરિવર્તન પૂરતી સીમિત ન રહેવી જોઈએ, પરંતુ વિચારો, સંસ્કૃતિ અને જીવનપદ્ધતિમાં પણ સ્વબોધ જરૂરી છે.
‘વૈચારિક સ્વતંત્રતા જાળવવી આજના સમયની મોટી જવાબદારી’
કાર્યક્રમના અધ્યક્ષ જય થડેશ્વરે પોતાના સંબોધનમાં જણાવ્યું કે દેશને ક્રાંતિવીરોના બલિદાનથી સ્વાધીનતા મળી છે અને હવે નવી પેઢીએ વૈચારિક સ્વતંત્રતા જાળવવાની જવાબદારી નિભાવવી પડશે.
તેમણે કહ્યું કે સ્વતંત્રતા માત્ર ભૌગોલિક કે રાજકીય સ્વરૂપમાં નહીં, પરંતુ પોતાની વિચારશક્તિ અને નિર્ણયક્ષમતામાં પણ હોવી જોઈએ. આજના ડિજિટલ યુગમાં વ્યક્તિએ માહિતીનો સ્વતંત્ર રીતે વિચાર કરીને સ્વીકાર કે અસ્વીકાર કરવો જરૂરી છે.
સોશિયલ મીડિયા અલ્ગોરિધમ્સ અંગે જયભાઈ થડેશ્વરની ચિંતા
જયભાઈ થડેશ્વરે સોશિયલ મીડિયા અને ઈન્ટરનેટના વધતા પ્રભાવ અંગે પણ વાત કરી હતી. તેમણે જણાવ્યું કે સોશિયલ મીડિયા અલ્ગોરિધમ્સ ઘણી વખત વ્યક્તિને તે જ પ્રકારનું કન્ટેન્ટ વારંવાર બતાવે છે, જેના કારણે વ્યક્તિની વિચારસરણી, પસંદગી અને અભિપ્રાય પર અસર થઈ શકે છે.
તેમણે કહ્યું કે માત્ર અલ્ગોરિધમ્સ શું બતાવે છે તેના આધારે વિચારવાના બદલે વ્યક્તિએ પોતાની બુદ્ધિ અને સમજણથી નિર્ણય લેવો જોઈએ. તેમના મતે આ જ આજના ડિજિટલ યુગમાં વૈચારિક સ્વતંત્રતાનો મહત્વપૂર્ણ ભાગ છે.
‘સોશિયલ અને કલ્ચરલ Identityને અસર કરવાનો પ્રયાસ’
જય થડેશ્વરે જણાવ્યું કે ઈન્ટરનેટ પર દ્વેષ, ગુસ્સો, હિંસા, અશ્લીલતા અને દેશવિરોધી પ્રકારના કન્ટેન્ટનું વધતું પ્રમાણ સમાજની સામાજિક અને સાંસ્કૃતિક ઓળખ પર અસર કરી શકે છે.
તેમણે યુવાનો અને નાગરિકોને ડિજિટલ માધ્યમનો ઉપયોગ કરતી વખતે સાવચેતી રાખવા અને પોતાની વિચારશક્તિને મજબૂત બનાવવા અપીલ કરી હતી. તેમણે કહ્યું કે સોશિયલ મીડિયા પર મળતી દરેક માહિતી સાચી હોય એવું માનવાને બદલે તેનું વિશ્લેષણ અને ચકાસણી કરવી જરૂરી છે.
‘સાચો દેશભક્ત કેવો હોય તો RSSના સ્વયંસેવકને મળી લો’
જય થડેશ્વરે RSSના સ્વયંસેવકોના કાર્યનો ઉલ્લેખ કરતાં કહ્યું કે જો કોઈ પૂછે કે સાચો દેશભક્ત કેવો હોય, તો રાષ્ટ્રીય સ્વયંસેવક સંઘના સ્વયંસેવકને મળવું જોઈએ.
તેમણે જણાવ્યું કે સંઘના સ્વયંસેવકો સામાજિક સેવા, રાષ્ટ્રભાવના અને સંગઠનના માધ્યમથી સમાજજીવનમાં પોતાનું યોગદાન આપતા રહ્યા છે.
મોટી સંખ્યામાં સ્વયંસેવકો અને નગરજનો જોડાયા
આ કાર્યક્રમમાં કર્ણાવતી મહાનગરના માનનીય સંઘચાલક મહેશભાઈ પરીખ, ગુજરાત પ્રાંતના પ્રચાર પ્રમુખ તેજસભાઈ પટેલ અને કર્ણાવતી મહાનગરના કાર્યવાહ હાર્દિકભાઈ પરીખ સહિતના સંઘના પદાધિકારીઓ ઉપસ્થિત રહ્યા હતા.
મોટી સંખ્યામાં સ્વયંસેવકો અને નગરજનોએ ધ્વજવંદન અને ભારતમાતા પૂજનમાં ભાગ લીધો હતો. સમગ્ર કાર્યક્રમ દરમિયાન રાષ્ટ્રભક્તિ, રાષ્ટ્રીય એકતા અને સ્વદેશી વિચારને કેન્દ્રમાં રાખીને સંદેશ આપવામાં આવ્યો હતો.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
