ખેડા જિલ્લાના નવરચિત ફાગવેલ તાલુકા મથકે 15 ઓગસ્ટ, 2026ના રોજ 80મા સ્વાતંત્ર્ય દિનની ગૌરવભેર ઉજવણી કરવામાં આવી હતી. ખેડા જિલ્લા કલેક્ટર એન.વી. ઉપાધ્યાયની મુખ્ય ઉપસ્થિતિમાં યોજાયેલા આ જિલ્લાકક્ષાના કાર્યક્રમમાં તેમણે રાષ્ટ્રધ્વજ ફરકાવી તિરંગાને સલામી આપી હતી. આ પ્રસંગે ખેડાના સાંસદ દેવુસિંહ ચૌહાણ, કપડવંજના ધારાસભ્ય રાજેશ ઝાલા સહિત જિલ્લાના પદાધિકારીઓ, વહીવટી અધિકારીઓ અને મોટી સંખ્યામાં નાગરિકો ઉપસ્થિત રહ્યા હતા.
રાષ્ટ્રીય ગીત ‘વંદે માતરમ્’ના 150 વર્ષની ઉજવણીને ધ્યાનમાં રાખીને કાર્યક્રમની શરૂઆત ‘વંદે માતરમ્’ના ગાનથી કરવામાં આવી હતી, જ્યારે સમાપન ‘જન ગણ મન’ સાથે કરવામાં આવ્યું હતું. ધ્વજવંદન, પરેડ નિરીક્ષણ, સાંસ્કૃતિક કાર્યક્રમો, શ્રેષ્ઠ કામગીરી કરનારાઓનું સન્માન અને વૃક્ષારોપણ સહિતના વિવિધ કાર્યક્રમો સાથે સ્વાતંત્ર્ય પર્વની હર્ષોલ્લાસભેર ઉજવણી થઈ હતી.
કલેક્ટર અને જિલ્લા પોલીસ અધિક્ષકે પરેડનું નિરીક્ષણ કર્યું
ધ્વજવંદન બાદ જિલ્લા કલેક્ટર એન.વી. ઉપાધ્યાય અને જિલ્લા પોલીસ અધિક્ષક વિજય પટેલે પરેડનું નિરીક્ષણ કર્યું હતું અને ઉપસ્થિત નાગરિકોનું અભિવાદન ઝીલ્યું હતું. શિસ્તબદ્ધ પરેડ અને દેશભક્તિપૂર્ણ માહોલે સમગ્ર કાર્યક્રમને ગૌરવપૂર્ણ બનાવ્યો હતો.
કલેક્ટર એન.વી. ઉપાધ્યાયે સ્વાતંત્ર્ય સંગ્રામમાં મહાત્મા ગાંધી, સરદાર વલ્લભભાઈ પટેલ, મોહનલાલ પંડ્યા સહિતના મહાપુરુષોના યોગદાન અને બલિદાનને યાદ કરતાં જિલ્લાવાસીઓને સ્વાતંત્ર્ય પર્વની શુભેચ્છાઓ પાઠવી હતી.
‘વિકસિત ભારત @2047ના રોડમેપ પર સૌએ આગળ વધવું પડશે’
કલેક્ટર એન.વી. ઉપાધ્યાયે જણાવ્યું હતું કે સ્વાતંત્ર્ય સેનાનીઓના બલિદાનથી મળેલી આઝાદીને હવે વિકાસના નવા શિખરો સુધી લઈ જવાની જવાબદારી આજની પેઢીની છે. તેમણે સૌને ‘વિકસિત ભારત @2047’ના રોડમેપ પર સંકલ્પબદ્ધ રીતે આગળ વધવા અપીલ કરી હતી.
તેમણે કહ્યું કે કૃષિ, શિક્ષણ, આરોગ્ય, રોજગાર, પર્યટન, પરિવહન અને પર્યાવરણ સહિતના તમામ ક્ષેત્રોમાં ખેડા જિલ્લાએ નોંધપાત્ર પ્રગતિ કરી છે. સરકારની વિવિધ યોજનાઓ અને વહીવટી તંત્રના પ્રયત્નોથી લોકોની સુખાકારીમાં વધારો થયો છે.
ભારે વરસાદ બાદ રાહત-બચાવમાં અસરકારક કામગીરી
તાજેતરમાં પડેલા ભારે વરસાદ દરમિયાન ખેડા જિલ્લા આપત્તિ વ્યવસ્થાપન તંત્ર દ્વારા અસરકારક રાહત અને બચાવ કામગીરી હાથ ધરવામાં આવી હતી. કલેક્ટરે જણાવ્યું કે જાનમાલના નુકસાન બદલ અત્યાર સુધીમાં રૂ.47 લાખથી વધુની સહાય ચૂકવવામાં આવી છે.
આ સાથે કુદરતી આફતોનો સામનો કરવા જિલ્લા તંત્રની તૈયારીઓ વધુ મજબૂત કરવામાં આવી રહી હોવાનું પણ તેમણે જણાવ્યું હતું.
જિલ્લામાં 10.12 લાખથી વધુ આયુષ્માન કાર્ડ
આરોગ્ય ક્ષેત્રની કામગીરી વિશે માહિતી આપતાં કલેક્ટરે જણાવ્યું કે ખેડા જિલ્લામાં અત્યાર સુધીમાં 10,12,850થી વધુ પ્રધાનમંત્રી આયુષ્માન કાર્ડ જારી કરવામાં આવ્યા છે.
નડિયાદ સિવિલ હોસ્પિટલ ખાતે ‘જિલ્લા આરોગ્ય સ્વાગત’ કાર્યક્રમ શરૂ કરીને આરોગ્ય સેવાઓને વધુ પારદર્શક અને લોકાભિમુખ બનાવવાનો પ્રયાસ કરવામાં આવ્યો છે. જિલ્લામાં ટીબીના દર્દીઓને વહીવટી તંત્ર અને દાતાઓના સહયોગથી દર મહિને ન્યુટ્રિશન કિટ પૂરી પાડવામાં આવી રહી છે.
આ ઉપરાંત જિલ્લામાં 18,700થી વધુ દીકરીઓને સર્વાઇકલ કેન્સર વિરોધી રસી આપવામાં આવી હોવાનું પણ જણાવાયું હતું.
કુપોષણ સામે ‘પોષણ સંગમ’ની અસરકારક કામગીરી
ખેડા જિલ્લામાં કુપોષણ નાબૂદી માટે ‘પોષણ સંગમ’ કાર્યક્રમ અંતર્ગત દરરોજ આશરે 6,200 આંગણવાડી બાળકોને સરેરાશ 610 લીટર દૂધનો લાભ આપવામાં આવે છે. આંગણવાડીની વિવિધ પોષણલક્ષી યોજનાઓ દ્વારા અત્યાર સુધીમાં આશરે 4,160 બાળકોને કુપોષણમાંથી બહાર લાવવામાં સફળતા મળી હોવાનું કલેક્ટરે જણાવ્યું હતું.
શાળા પ્રવેશોત્સવમાં હજારો બાળકોનો પ્રવેશ
શૈક્ષણિક વર્ષ 2026-27 દરમિયાન શાળા પ્રવેશોત્સવ અંતર્ગત ખેડા જિલ્લામાં બાલવાટિકામાં કુલ 20,829 બાળકો અને ધોરણ-1માં 2,424 બાળકોએ પ્રવેશ મેળવ્યો છે. કન્યા શિક્ષણને પ્રોત્સાહન આપવા ‘નમો લક્ષ્મી યોજના’ હેઠળ જિલ્લામાં 39,595 દીકરીઓ અને ‘નમો સરસ્વતી યોજના’ હેઠળ 2,931 દીકરીઓને લાભ મળ્યો છે.
14 રોજગાર ભરતી મેળામાં 2,615 યુવાનોની પ્રાથમિક પસંદગી
જિલ્લાના યુવાનોને રોજગારીની તકો ઉપલબ્ધ કરાવવા વર્ષ 2026 દરમિયાન કુલ 14 રોજગાર ભરતી મેળાઓનું આયોજન કરવામાં આવ્યું હતું, જેમાં 2,615 જેટલા રોજગારવાંચ્છુઓની પ્રાથમિક પસંદગી કરવામાં આવી હતી.
ગોબલેજ ખાતે યોજાયેલી મધ્ય ગુજરાત વાઇબ્રન્ટ રીજનલ કોન્ફરન્સ-2026 દરમિયાન વિવિધ ઉદ્યોગો સાથે રૂ.1,763 કરોડના કુલ 43 સમજૂતી કરારો કરવામાં આવ્યા હતા. આ કરારો દ્વારા જિલ્લામાં ઔદ્યોગિક વિકાસ અને રોજગારીની નવી તકો ઉભી થવાની અપેક્ષા છે.
નડિયાદ મહાનગરપાલિકાને રૂ.55 કરોડની ફાળવણી
શહેરી વિસ્તારોમાં ‘ઈઝ ઓફ લિવિંગ’ વધારવાના હેતુથી નડિયાદ મહાનગરપાલિકાને રૂ.55 કરોડની ફાળવણી કરવામાં આવી હોવાનું કલેક્ટરે જણાવ્યું હતું. આ રકમનો ઉપયોગ શહેરની વિવિધ નાગરિક સુવિધાઓ, માળખાકીય વિકાસ અને લોકોની જીવનશૈલીમાં સુધારો લાવવા માટે કરવામાં આવશે.
PM-Kisan હેઠળ ખેડૂત ખાતામાં રૂ.1,180 કરોડથી વધુ જમા
ખેડા જિલ્લામાં પ્રધાનમંત્રી કિસાન સન્માન નિધિ યોજના અંતર્ગત અત્યાર સુધીમાં ખેડૂતોના ખાતામાં રૂ.1,180 કરોડથી વધુની રકમ જમા કરવામાં આવી છે. ખેડૂતોને ટ્રેક્ટર સહિતના સાધનો ખરીદવા માટે રૂ.33 કરોડ જેટલી સહાય આપવામાં આવી છે. જિલ્લામાં હાલમાં 19,150થી વધુ ખેડૂતો પ્રાકૃતિક ખેતી સાથે જોડાયેલા છે.
દેશી ગાયના નિભાવ માટે ચાલુ વર્ષ દરમિયાન રૂ.4.97 કરોડની સહાય ચૂકવવામાં આવી છે, જેથી પ્રાકૃતિક ખેતીને પ્રોત્સાહન મળી રહ્યું છે.
માતર સેવા સહકારી મંડળીને રાષ્ટ્રીય સ્તરે સન્માન
ખેતી વિષયક ધિરાણ અને CSC સેન્ટર તરીકે ઉત્કૃષ્ટ કામગીરી બદલ ખેડા જિલ્લાની માતર સેવા સહકારી મંડળીને ભારત સરકાર તરફથી એવોર્ડ આપવામાં આવ્યો હોવાનું પણ કાર્યક્રમ દરમિયાન જણાવાયું હતું. PACS અંતર્ગત શ્રેષ્ઠ કામગીરી કરનાર વિવિધ મંડળીઓ માટે કુલ રૂ.19 લાખના ઈનામ જાહેર કરવામાં આવ્યા છે.
જિલ્લામાં 10 લાખથી વધુ વૃક્ષોનું વાવેતર
પર્યાવરણ સંવર્ધન માટે ચાલુ વર્ષ દરમિયાન ખેડા જિલ્લામાં 10 લાખથી વધુ વૃક્ષોનું વાવેતર કરવામાં આવ્યું છે. ગળતેશ્વર ખાતે વિકસાવાયેલું સાંસ્કૃતિક વન તેમજ માતર તાલુકાનું પરીએજ તળાવ પર્યટકો માટે આકર્ષણનું કેન્દ્ર બની રહ્યું હોવાનું કલેક્ટરે જણાવ્યું હતું.
1,000 કિમીથી વધુ રસ્તાઓને મંજૂરી
જિલ્લામાં પરિવહન અને માર્ગ સુવિધાઓ વધુ મજબૂત કરવા માર્ગ અને મકાન વિભાગ તથા પંચાયત વિભાગ હેઠળ કુલ 1,000 કિલોમીટરથી વધુ લંબાઈના રસ્તાઓને મંજૂરી આપવામાં આવી છે. આથી ગ્રામ્ય અને શહેરી વિસ્તારો વચ્ચેનું કનેક્ટિવિટી નેટવર્ક વધુ મજબૂત બનશે અને લોકો માટે આવાગમન સરળ બનશે.
રમતગમત ક્ષેત્રે ખેડાના ખેલાડીઓએ જીત્યા 91 મેડલ
નડિયાદ સ્પોર્ટ્સ કોમ્પ્લેક્સ ખાતે આપવામાં આવતી અદ્યતન તાલીમના પરિણામે ખેડા જિલ્લાના ખેલાડીઓએ રાજ્ય, રાષ્ટ્રીય અને આંતરરાષ્ટ્રીય કક્ષાની વિવિધ સ્પર્ધાઓમાં કુલ 91 મેડલ મેળવી જિલ્લાનું નામ રોશન કર્યું હોવાનું કાર્યક્રમમાં જણાવાયું હતું.
‘વિકાસની ઝાંખી- ખેડા જિલ્લો 2026’ પુસ્તિકાનું વિમોચન
કાર્યક્રમ દરમિયાન જિલ્લા માહિતી કચેરી અને જિલ્લા આયોજન કચેરીના સંયુક્ત પ્રયાસથી તૈયાર કરાયેલી ખેડા જિલ્લાના વિકાસની માહિતી આપતી પુસ્તિકા ‘વિકાસની ઝાંખી- ખેડા જિલ્લો 2026’નું વિમોચન કરવામાં આવ્યું હતું.
જિલ્લાના વિકાસ કાર્યોને વધુ વેગ આપવા કલેક્ટર એન.વી. ઉપાધ્યાયે જિલ્લા આયોજન અધિકારીને રૂ.25 લાખનો ચેક પણ અર્પણ કર્યો હતો.
વિવિધ ક્ષેત્રે શ્રેષ્ઠ કામગીરી કરનાર કર્મયોગીઓનું સન્માન
સ્વાતંત્ર્ય પર્વના અવસરે આરોગ્ય, પોલીસ, ડિઝાસ્ટર મેનેજમેન્ટ, વન વિભાગ, ચૂંટણી, વસ્તી ગણતરી, ડિજિટલ સેવા, ફાયર વિભાગ અને અન્ય ક્ષેત્રોમાં ઉત્કૃષ્ટ કામગીરી કરનાર અધિકારીઓ અને કર્મચારીઓને પ્રમાણપત્ર આપી સન્માનિત કરવામાં આવ્યા હતા.
PMJAY હેઠળ વધુ ક્લેઇમ નોંધાવવાના કારણે નડિયાદ જનરલ હોસ્પિટલના સીડીએમઓ ડૉ. કવિતા શાહ અને આરએમઓ ડૉ. ડી.આર. પટેલનું સન્માન કરવામાં આવ્યું હતું.
કાયદો અને વ્યવસ્થામાં અસરકારક કામગીરી બદલ સેવાલિયા પોલીસ સ્ટેશનના પોલીસ ઇન્સ્પેક્ટર એસ.કે. કાંબડ, એએસઆઈ બીના જે. પટેલ અને એલસીબીના અનાર્મ પોલીસ કોન્સ્ટેબલ કુલદીપસિંહ દયાનું પણ સન્માન કરાયું હતું. માર્ગ અકસ્માતમાં ગોલ્ડન અવર દરમિયાન ઘાયલોને મદદ કરીને જીવન બચાવનાર નાગરિકોને પણ વિશેષ રીતે સન્માનિત કરવામાં આવ્યા હતા.
ખેલાડીઓને પણ અપાયું વિશેષ બહુમાન
રમતગમત ક્ષેત્રે ઉત્કૃષ્ટ પ્રદર્શન બદલ યુવા ખેલાડીઓનું સન્માન કરવામાં આવ્યું હતું. રાષ્ટ્રીય યોગાસન ટુર્નામેન્ટમાં બ્રોન્ઝ મેડલ મેળવનાર મીત કંસારિયા, કરાટેમાં ગોલ્ડ મેડલ મેળવનાર અતિક મિર્ઝા, સિલ્વર મેડલ મેળવનાર માધવ બારોટ અને ખેલ મહાકુંભમાં ગોલ્ડ મેડલ મેળવનાર વિશાલ માવીનું સન્માન કરાયું હતું.
ફાગવેલના ઐતિહાસિક મહત્વને પણ યાદ કરાયું
રાજ્ય સરકારે 31 ડિસેમ્બર, 2025ના રોજ ફાગવેલને નવા તાલુકા તરીકે રચ્યો હતો. તાલુકાની રચનાથી વહીવટી કામગીરીનું વિકેન્દ્રીકરણ થયું છે અને સ્થાનિક લોકોને જાહેર સેવાઓ વધુ સરળતાથી ઉપલબ્ધ થઈ રહી છે.
ફાગવેલ વીર ભાથીજી મહારાજની જન્મભૂમિ અને શૌર્યભૂમિ તરીકે પણ જાણીતું છે. ગૌરક્ષા માટે પોતાના પ્રાણ ન્યોછાવર કરનાર ભાથીજી મહારાજ ગુજરાતમાં લોકદેવતા તરીકે પૂજાય છે.
દેશભક્તિપૂર્ણ સાંસ્કૃતિક કાર્યક્રમોએ જમાવ્યું આકર્ષણ
સ્વાતંત્ર્ય પર્વની ઉજવણીમાં વિવિધ શાળાઓ અને સાંસ્કૃતિક જૂથોએ દેશભક્તિપૂર્ણ કાર્યક્રમો રજૂ કર્યા હતા. કઠલાલની એમ.આર. હાઇસ્કૂલના વિદ્યાર્થીઓએ રાણી લક્ષ્મીબાઈના શૌર્ય પર આધારિત ગીત રજૂ કર્યું હતું. શ્રી ભાથીજી હાઇસ્કૂલ ફાગવેલની બાળાઓએ કચ્છી ગરબો રજૂ કર્યો હતો.
ભારત વિદ્યા ભવન એમ.કે. પટેલ સ્કૂલ, એસ.એન.વી. સ્કૂલ, નમ્રતાબેન ગ્રુપ નડિયાદ અને શ્રી સંતરામ વિદ્યાલયના વિદ્યાર્થીઓએ વિવિધ લોકનૃત્ય અને દેશભક્તિ આધારિત કાર્યક્રમો રજૂ કર્યા હતા. રંગુભાઈ રાઠવા અને તેમના ગ્રુપ દ્વારા રજૂ કરાયેલું પરંપરાગત આદિવાસી રાઠવા નૃત્ય પણ વિશેષ આકર્ષણનું કેન્દ્ર બન્યું હતું.
‘એક પેડ મા કે નામ’ હેઠળ વૃક્ષારોપણ
કાર્યક્રમના અંતે ઉપસ્થિત મહાનુભાવોએ ‘એક પેડ મા કે નામ’ અભિયાન અંતર્ગત વૃક્ષારોપણ કરીને પર્યાવરણ સંવર્ધનનો સંદેશ આપ્યો હતો.
આ પ્રસંગે ખેડાના સાંસદ દેવુસિંહ ચૌહાણ, કપડવંજના ધારાસભ્ય રાજેશ ઝાલા, જિલ્લા પંચાયત પ્રમુખ હિતેશ તડવી, જિલ્લા વિકાસ અધિકારી જયંત કિશોર, પોલીસ અધિક્ષક વિજય પટેલ, જિલ્લા ભાજપ પ્રમુખ નયનાબેન પટેલ, નાયબ વન સંરક્ષક અભિષેક સામરિયા, નિવાસી અધિક કલેક્ટર જે.બી. દેસાઈ, એડિશનલ કલેક્ટર વિમલ બારોટ, કપડવંજ પ્રાંત અધિકારી એ.પી. ઝાલા સહિત જિલ્લા વહીવટી તંત્રના અધિકારીઓ, સ્થાનિક પદાધિકારીઓ, નાગરિકો અને શાળા-કોલેજના વિદ્યાર્થીઓ મોટી સંખ્યામાં ઉપસ્થિત રહ્યા હતા.
રીપોર્ટર – સુરેશ પારેખ (ખેડા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
