ગુજરાતમાં થોડા દિવસોના વિરામ બાદ મેઘરાજાએ ફરી એકવાર ધમાકેદાર વાપસી કરી છે. રાજ્યભરમાં વરસાદી માહોલ જામતા અનેક જિલ્લાઓમાં ખેડૂતો અને નાગરિકોમાં રાહતનો માહોલ જોવા મળી રહ્યો છે. રાજ્યના સ્ટેટ ઇમરજન્સી ઓપરેશન સેન્ટર (SEOC) દ્વારા જાહેર કરાયેલા આંકડાઓ મુજબ છેલ્લા 24 કલાક દરમિયાન રાજ્યના 98 તાલુકાઓમાં નોંધપાત્ર વરસાદ નોંધાયો છે.
સૌથી વધુ વરસાદ રાજકોટ જિલ્લાના પડધરી તાલુકામાં 2.24 ઈંચ નોંધાયો છે. વરસાદની આ નવી ઇનિંગથી ખેતી માટે અનુકૂળ પરિસ્થિતિ સર્જાઈ છે, જેના કારણે ખેડૂતોમાં ખુશીનો માહોલ જોવા મળી રહ્યો છે.
સુરત અને કચ્છમાં પણ મેઘરાજાની ધમાકેદાર એન્ટ્રી
રાજકોટ બાદ દક્ષિણ ગુજરાત અને કચ્છમાં પણ વરસાદે જોરદાર હાજરી નોંધાવી છે. સુરત જિલ્લાના કામરેજમાં 1.81 ઈંચ જ્યારે કચ્છના રાપરમાં 1.69 ઈંચ વરસાદ નોંધાયો છે.
સુરત જિલ્લાના માંગરોળ અને બારડોલીમાં 1.5-1.5 ઈંચ વરસાદ વરસતાં અનેક નીચાણવાળા વિસ્તારોમાં પાણી ભરાઈ ગયા હતા. કેટલાક વિસ્તારોમાં વાહનવ્યવહાર પર પણ તેની અસર જોવા મળી હતી.
અમદાવાદ અને બોટાદ જિલ્લામાં પણ સારો વરસાદ
અમદાવાદ જિલ્લામાં પણ અનેક વિસ્તારોમાં વરસાદ નોંધાયો છે. ધંધુકામાં 1.22 ઈંચ, જ્યારે ધોલેરામાં 21 મીમી અને સાણંદમાં 16 મીમી વરસાદ પડ્યો હતો.
બીજી તરફ બોટાદ જિલ્લાના બરવાળામાં 23 મીમી અને બોટાદ શહેરમાં 16 મીમી વરસાદ નોંધાતા વાતાવરણમાં ઠંડક પ્રસરી ગઈ હતી.
સૌરાષ્ટ્રના અનેક વિસ્તારોમાં વરસાદથી ઠંડક
સૌરાષ્ટ્રના અન્ય જિલ્લાઓમાં પણ મેઘરાજાએ મહેર વરસાવી છે. ભાવનગર જિલ્લાના ઉમરાળા અને પાલીતાણા, તેમજ સુરેન્દ્રનગર જિલ્લાના દસાડા અને ચોટીલા સહિતના વિસ્તારોમાં અડધા ઈંચથી વધુ વરસાદ નોંધાયો છે. વરસાદના કારણે ગરમીમાંથી લોકોને રાહત મળી છે અને વાતાવરણ ખુશનુમા બન્યું છે.
આગામી દિવસોમાં પણ વરસાદની શક્યતા
ભારતીય હવામાન વિભાગ (IMD)ની આગાહી મુજબ આગામી દિવસોમાં પણ ગુજરાતના વિવિધ જિલ્લાઓમાં વરસાદી માહોલ યથાવત રહેવાની સંભાવના છે. કેટલાક વિસ્તારોમાં મધ્યમથી ભારે વરસાદ પડી શકે છે. હવામાન વિભાગે લોકોને જરૂરી સાવચેતી રાખવા તેમજ સ્થાનિક તંત્ર દ્વારા આપવામાં આવતી સૂચનાઓનું પાલન કરવાની અપીલ કરી છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
