ગુજરાતમાં ચોમાસું ફરી જોર પકડી રહ્યું છે. વહેલી સવારથી રાજ્યના મધ્ય ગુજરાત, ઉત્તર ગુજરાત સહિતના અનેક વિસ્તારોમાં વરસાદી માહોલ જામ્યો છે. ક્યાંક ધોધમાર વરસાદને કારણે રસ્તાઓ પર પાણી ફરી વળ્યાં છે, તો ક્યાંક લાંબા વિરામ બાદ વરસેલા વરસાદે ખેડૂતોમાં ખુશી ફેલાવી છે. હવામાન વિભાગ (IMD) દ્વારા ગુજરાતમાં આગામી 7 દિવસ દરમિયાન સામાન્યથી લઈને ભારે અને કેટલાક વિસ્તારોમાં અત્યંત ભારે વરસાદ પડવાની આગાહી કરવામાં આવી છે.
ગુજરાતમાં એકસાથે અનેક વરસાદી સિસ્ટમ સક્રિય
હવામાન વિભાગના જણાવ્યા અનુસાર ગુજરાતના હવામાનને અસર કરતી કેટલીક વરસાદી સિસ્ટમ હાલમાં સક્રિય છે. લો પ્રેશર, મોન્સૂન ટ્રફ અને સાયક્લોનિક સર્ક્યુલેશનની અસરને કારણે રાજ્યના અનેક વિસ્તારોમાં વરસાદ માટે અનુકૂળ પરિસ્થિતિ સર્જાઈ છે. આ ઉપરાંત વાતાવરણ પર વેસ્ટર્ન ડિસ્ટર્બન્સની અસર પણ જોવા મળી રહી છે.
આ સિસ્ટમોના કારણે આગામી દિવસોમાં ગુજરાતના અલગ-અલગ ભાગોમાં વરસાદનું જોર વધવાની શક્યતા છે. ખાસ કરીને પંચમહાલ, દાહોદ અને છોટાઉદેપુર જિલ્લામાં અત્યંત ભારે વરસાદની આગાહી કરવામાં આવી છે.
ગુજરાતમાં સરેરાશ કરતાં 9 ટકા વધુ વરસાદ
રાજ્યમાં અત્યાર સુધીમાં મોસમનો કુલ સરેરાશ 491.2 મી.મી. વરસાદ નોંધાયો છે. સામાન્ય રીતે આ સમયગાળા સુધી ગુજરાતમાં સરેરાશ 450.5 મી.મી. જેટલો વરસાદ નોંધાતો હોય છે. આ પ્રમાણે રાજ્યમાં અત્યાર સુધી સામાન્ય કરતાં આશરે 9 ટકા વધુ વરસાદ નોંધાયો છે.
જોકે ગુજરાતના તમામ વિસ્તારોમાં વરસાદની સ્થિતિ એકસરખી નથી. સૌરાષ્ટ્રમાં સામાન્ય કરતાં આશરે 13 ટકા ઓછો વરસાદ નોંધાયો છે. આગામી વરસાદી રાઉન્ડથી સૌરાષ્ટ્રના વરસાદની ઘટમાં કેટલો સુધારો થાય છે તેના પર ખેડૂતોની નજર રહેશે.
દહેગામમાં બે કલાકમાં દોઢ ઇંચ વરસાદ, નીચાણવાળા વિસ્તારોમાં પાણી
ગાંધીનગર જિલ્લાના દહેગામ અને આસપાસના ગ્રામ્ય વિસ્તારોમાં વહેલી સવારથી મેઘરાજાએ જોરદાર બેટિંગ શરૂ કરી હતી. માત્ર બે કલાકના ટૂંકા સમયગાળામાં અંદાજે દોઢ ઇંચ વરસાદ ખાબકતાં અનેક નીચાણવાળા વિસ્તારોમાં પાણી ભરાઈ ગયું હતું.
દહેગામના એમજી અમીન કોમ્પ્લેક્સના પરિસરમાં પાણી ભરાઈ જતાં સ્થાનિકો અને વેપારીઓને મુશ્કેલીનો સામનો કરવો પડ્યો હતો. આ ઉપરાંત મોડાસા રોડ પર આવેલો પૂર્ણિમા ઢાળ પણ પાણીમાં ગરકાવ થતાં વાહનચાલકોને મુશ્કેલી પડી હતી અને વાહનવ્યવહાર પ્રભાવિત થયો હતો.
ગોધરામાં ધોધમાર વરસાદ, રસ્તાઓ પર નદી જેવા દૃશ્યો
પંચમહાલ જિલ્લાના મુખ્ય મથક ગોધરા સહિત આસપાસના વિસ્તારોમાં પણ વહેલી સવારથી વરસાદનું જોર જોવા મળ્યું હતું. ગોધરા શહેર અને આસપાસના ગ્રામ્ય વિસ્તારોમાં ધોધમાર વરસાદ પડતાં અનેક માર્ગો પર પાણીનો ભારે પ્રવાહ જોવા મળ્યો હતો.
શહેરના ભુરાવાવ વિસ્તારની વિવિધ રહેણાંક સોસાયટીઓના માર્ગો પર પાણી ભરાઈ જતાં રહીશોને અવરજવરમાં મુશ્કેલી પડી હતી. સતત વરસાદને કારણે શહેરના જનજીવન અને વાહનવ્યવહાર પર પણ અસર જોવા મળી હતી.
મહીસાગરમાં મેઘમહેર, ડાંગરના પાકને મોટી રાહત
મહીસાગર જિલ્લાના લુણાવાડા, વિરપુર, કડાણા અને કોઠંબા સહિતના વિસ્તારોમાં સવારથી વરસાદી માહોલ જામ્યો હતો. લાંબા વિરામ બાદ આવેલા વરસાદથી ખેડૂતોમાં ખુશી જોવા મળી રહી છે.
ખાસ કરીને ડાંગરના પાક માટે આ વરસાદ સંજીવની સમાન સાબિત થઈ શકે છે. ખેતરોમાં કુદરતી રીતે સિંચાઈનું પાણી મળવાથી ખેડૂતોની સિંચાઈ અંગેની ચિંતા હળવી થઈ છે.
ખેડાના મહેમદાવદ-મહુધામાં વરસાદી ઝાપટાં
ખેડા જિલ્લાના મહેમદાવદ અને મહુધા સહિતના વિસ્તારોમાં પણ વહેલી સવારથી વરસાદી ઝાપટાં નોંધાયા હતા. વરસાદના કારણે વાતાવરણમાં ઠંડક પ્રસરી હતી અને ઉભા પાકને પાણી મળતાં ખેડૂતોમાં આનંદ જોવા મળ્યો હતો.
ડાંગર સહિતના ચોમાસુ પાક માટે હાલનો વરસાદ લાભદાયી માનવામાં આવી રહ્યો છે. આગામી દિવસોમાં સારો વરસાદ ચાલુ રહે તો ખેતીને વધુ ફાયદો થવાની આશા ખેડૂતો રાખી રહ્યા છે.
અમદાવાદમાં કાળા વાદળો, SG Highway સહિતના વિસ્તારોમાં વરસાદ
અમદાવાદમાં પણ વહેલી સવારથી આકાશમાં કાળા વાદળો છવાયેલા જોવા મળ્યા હતા. શહેરના SG Highway, ગોતા, રાણીપ અને ચાંદલોડિયા સહિતના વિસ્તારોમાં હળવાથી મધ્યમ વરસાદી ઝાપટાં નોંધાયા હતા.
વરસાદ અને વાદળછાયા વાતાવરણના કારણે શહેરના તાપમાનમાં રાહત અનુભવાઈ હતી. હવામાન વિભાગની આગાહી મુજબ દિવસ દરમિયાન પણ અમદાવાદમાં વાદળછાયું વાતાવરણ રહેવાની સાથે અલગ-અલગ વિસ્તારોમાં વરસાદી ઝાપટાં પડી શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
