ભારતના ચંદ્રયાન-3ના ઐતિહાસિક સફળ ઉતરાણની યાદમાં 23 ઑગસ્ટે ઉજવાતા રાષ્ટ્રીય અવકાશ દિવસ (National Space Day 2026) નિમિત્તે ગુજરાતમાં વિદ્યાર્થીઓ માટે વિશેષ ‘સ્પેસ ક્વિઝ’નું આયોજન કરવામાં આવ્યું છે. ગુજરાત કાઉન્સિલ ઓન સાયન્સ એન્ડ ટેક્નોલોજી (GUJCOST) દ્વારા રાજ્યના તમામ 34 જિલ્લાઓમાં યોજાનારી આ ક્વિઝમાં ધોરણ 6થી 12ના વિદ્યાર્થીઓ નિઃશુલ્ક ભાગ લઈ શકશે. ક્વિઝ દ્વારા વિદ્યાર્થીઓને ભારતના અવકાશ કાર્યક્રમ, ISRO, ચંદ્રયાન અને અવકાશ ટેક્નોલોજી અંગે વધુ જાણકારી મેળવવાની તક મળશે.
23 ઑગસ્ટે સવારે 9થી બપોરે 12 વાગ્યા સુધી યોજાશે ક્વિઝ
GUJCOST દ્વારા આયોજિત ‘સ્પેસ ક્વિઝ’ 23 ઑગસ્ટે સવારે 9 વાગ્યાથી બપોરે 12 વાગ્યા સુધી યોજાશે. રાજ્યભરના જિલ્લા લોકવિજ્ઞાન કેન્દ્રો (Community Science Centres-CSC) અને પ્રાદેશિક વિજ્ઞાન કેન્દ્રો (Regional Science Centres-RSC)ના નેટવર્ક મારફતે આ ક્વિઝનું આયોજન કરવામાં આવશે.
ખાસ વાત એ છે કે વિદ્યાર્થીઓએ ક્વિઝમાં ભાગ લેવા માટે કોઈ નોંધણી ફી ચૂકવવાની રહેશે નહીં. ધોરણ 6થી 12માં અભ્યાસ કરતા વિદ્યાર્થીઓ પોતાના નજીકના RSC અથવા CSCનો સંપર્ક કરીને ક્વિઝમાં ભાગ લઈ શકશે.
રાષ્ટ્રીય અવકાશ દિવસ નિમિત્તે ગુજરાતના તમામ જિલ્લા લોક વિજ્ઞાન કેન્દ્રો તેમજ અમદાવાદ સાયન્સ સિટી ખાતે વિદ્યાર્થીઓ માટે વિશેષ “સ્પેસ ક્વિઝ” નું આયોજન કરવામાં આવ્યું છે.
અવકાશ વિજ્ઞાન પ્રત્યે જિજ્ઞાસા, જ્ઞાન અને સંશોધનાત્મક દૃષ્ટિકોણને પ્રોત્સાહન આપતી આ અનોખી ક્વિઝમાં વધુમાં વધુ… pic.twitter.com/93hLtIGjso
— Arjun Modhwadia (@arjunmodhwadia) August 19, 2026
ISROથી ચંદ્રયાન સુધીના વિષયો પર પૂછાશે પ્રશ્નો
સ્પેસ ક્વિઝમાં વિદ્યાર્થીઓના અવકાશ વિજ્ઞાન અંગેના જ્ઞાનની ચકાસણી કરવામાં આવશે. તેમાં ભારતીય અવકાશ કાર્યક્રમ, ISRO, ચંદ્રયાન મિશન, ઉપગ્રહો, અવકાશ ટેક્નોલોજી, મૂળભૂત અવકાશ વિજ્ઞાન, ભારતની અવકાશ ક્ષેત્રની સિદ્ધિઓ અને ભારતીય અવકાશ વૈજ્ઞાનિકોના યોગદાન જેવા વિવિધ વિષયોનો સમાવેશ કરવામાં આવશે.
આ ક્વિઝ માત્ર વિદ્યાર્થીઓના જ્ઞાનની કસોટી પૂરતી સીમિત નહીં રહે, પરંતુ તેમને ભારતની અવકાશ યાત્રા, વૈજ્ઞાનિક સિદ્ધિઓ અને અવકાશ ક્ષેત્રમાં દેશના વધતા પ્રભાવ વિશે જાણવાની તક પણ આપશે.
વિદ્યાર્થીઓમાં અવકાશ વિજ્ઞાન પ્રત્યે રસ વધારવાનો હેતુ
GUJCOSTના ડાયરેક્ટર જનરલ દિગ્વિજયસિંહ ડી. જાડેજા, IASએ જણાવ્યું હતું કે આ સ્પેસ ક્વિઝનું આયોજન વિદ્યાર્થીઓમાં વૈજ્ઞાનિક જિજ્ઞાસા, નવીન વિચારસરણી અને અવકાશ વિજ્ઞાન પ્રત્યે રસ વધારવાના હેતુથી કરવામાં આવ્યું છે.
અવકાશ ક્ષેત્રમાં ભારતે છેલ્લા કેટલાક વર્ષોમાં નોંધપાત્ર સિદ્ધિઓ મેળવી છે. ખાસ કરીને ચંદ્રયાન-3ની સફળતાએ નવી પેઢીમાં અવકાશ વિજ્ઞાન અને ટેક્નોલોજી પ્રત્યે ઉત્સુકતા વધારી છે. આવા કાર્યક્રમો દ્વારા વિદ્યાર્થીઓને નાની ઉંમરથી વિજ્ઞાન, સંશોધન અને ટેક્નોલોજી સાથે જોડવાનો પ્રયાસ કરવામાં આવી રહ્યો છે.
દરેક વિદ્યાર્થીને મળશે પ્રમાણપત્ર
ક્વિઝમાં ભાગ લેનારા તમામ વિદ્યાર્થીઓને પાર્ટિસિપેશન સર્ટિફિકેટ આપવામાં આવશે. જ્યારે દરેક કેન્દ્ર અથવા સ્પર્ધામાં પ્રથમ ત્રણ ક્રમે આવનારા વિદ્યાર્થીઓને મેરિટ પ્રમાણપત્ર આપવામાં આવશે. આ રીતે વિદ્યાર્થીઓને માત્ર પોતાનું જ્ઞાન અજમાવવાની જ નહીં પરંતુ પોતાની પ્રતિભાને માન્યતા અપાવવાની તક પણ મળશે.
દરેક જિલ્લાના ટોપ-3 વિદ્યાર્થીઓને Science Cityની ફ્રી મુલાકાત
સ્પેસ ક્વિઝમાં શ્રેષ્ઠ પ્રદર્શન કરનારા વિદ્યાર્થીઓ માટે વિશેષ પ્રોત્સાહન પણ જાહેર કરવામાં આવ્યું છે. દરેક જિલ્લામાંથી ટોચના ત્રણ વિદ્યાર્થીઓને તેમના પરિવાર સાથે ગુજરાત સાયન્સ સિટી, અમદાવાદની નિઃશુલ્ક મુલાકાત કરવાની તક આપવામાં આવશે.
આ મુલાકાત દરમિયાન વિદ્યાર્થીઓને વિજ્ઞાન અને ટેક્નોલોજી સાથે જોડાયેલા વિવિધ પ્રદર્શનો અને આકર્ષણોને નજીકથી સમજવાની તક મળશે. ક્વિઝમાં મળેલા જ્ઞાનને પ્રાયોગિક અને રસપ્રદ અનુભવ સાથે જોડવાનો આ પ્રયાસ વિદ્યાર્થીઓ માટે વિશેષ પ્રેરણાદાયી બની શકે છે.
અમદાવાદના વિદ્યાર્થીઓ ગુજરાત સાયન્સ સિટીમાં આપી શકશે ક્વિઝ
રાજ્યના અન્ય જિલ્લાઓના વિદ્યાર્થીઓ પોતાના નજીકના Regional Science Centre અથવા Community Science Centreનો સંપર્ક કરીને સ્પેસ ક્વિઝમાં જોડાઈ શકશે. જ્યારે અમદાવાદ જિલ્લાના વિદ્યાર્થીઓ માટે ગુજરાત સાયન્સ સિટી ખાતે ક્વિઝનું આયોજન કરવામાં આવશે.
વિદ્યાર્થીઓ અને વાલીઓ ક્વિઝમાં ભાગ લેવા માટે નજીકના RSC અથવા CSCનો સંપર્ક કરીને સ્થળ અને અન્ય જરૂરી વિગતો મેળવી શકશે.
ચંદ્રયાન-3ની સફળતાની યાદમાં ઉજવાય છે રાષ્ટ્રીય અવકાશ દિવસ
ભારતના ચંદ્રયાન-3 મિશનના વિક્રમ લેન્ડરે 23 ઑગસ્ટ 2023ના રોજ ચંદ્રના દક્ષિણ ધ્રુવીય વિસ્તારમાં સફળ સોફ્ટ લેન્ડિંગ કરીને ઇતિહાસ રચ્યો હતો. આ ઐતિહાસિક સિદ્ધિની યાદમાં ભારતમાં દર વર્ષે 23 ઑગસ્ટે રાષ્ટ્રીય અવકાશ દિવસ ઉજવવામાં આવે છે.
રાષ્ટ્રીય અવકાશ દિવસના માધ્યમથી દેશની નવી પેઢીને અવકાશ વિજ્ઞાન, સંશોધન અને ટેક્નોલોજી ક્ષેત્રે ભારતની સિદ્ધિઓથી પરિચિત કરાવવાની સાથે વિદ્યાર્થીઓને ભવિષ્યમાં વિજ્ઞાન અને અવકાશ ક્ષેત્રે કારકિર્દી બનાવવા માટે પ્રેરિત કરવાનો પ્રયાસ કરવામાં આવે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
