ભારત અને ફ્રાન્સ વચ્ચે વધતી વૈશ્વિક અનિશ્ચિતતા વચ્ચે વ્યૂહાત્મક સહકારને મજબૂત બનાવવાના હેતુથી વડાપ્રધાન નરેન્દ્ર મોદી અને ફ્રાન્સના પ્રમુખ ઈમેન્યુઅલ મેક્રોંએ મુંબઈના લોકભવન ખાતે મહત્વપૂર્ણ દ્વિપક્ષીય બેઠક યોજી હતી. બંને નેતાઓએ ભારત-ફ્રાન્સ ભાગીદારીને નવી ઊંચાઈ પર લઈ જવાની પ્રતિબદ્ધતા વ્યક્ત કરતાં વૈશ્વિક સ્થિરતા અને વિકાસ માટે સહકાર વધારવા પર ભાર મૂક્યો હતો. બેઠક દરમિયાન સંરક્ષણ, ટેક્નોલોજી, ઊર્જા અને વેપાર સહિત અનેક મહત્વના મુદ્દાઓ પર ચર્ચા થઈ હતી.
વેમાગલમાં H-125 હેલિકોપ્ટર એસેમ્બલી લાઈનનું વર્ચ્યુઅલ ઉદ્ઘાટન
મોદી અને મેક્રોંએ કર્ણાટકના વેમાગલમાં સ્થાપિત એરબસ H-125 હેલિકોપ્ટરની એસેમ્બલી લાઈનનું મુંબઈથી વર્ચ્યુઅલ ઉદ્ઘાટન કર્યું હતું. આ પ્રોજેક્ટ ટાટા એડવાન્સ સિસ્ટમ્સ અને ફ્રાન્સની એરબસ કંપનીની ભાગીદારીમાં વિકસાવવામાં આવ્યો છે. વડાપ્રધાન મોદીએ જણાવ્યું કે ભારતમાં બનેલું આ હેલિકોપ્ટર માઉન્ટ એવરેસ્ટની ઊંચાઈએ પણ ઉડાન ભરવાની ક્ષમતા ધરાવે છે અને તેની વૈશ્વિક બજારમાં નિકાસ થવાની સંભાવના છે. તેમણે આ પ્રોજેક્ટને ભારત-ફ્રાન્સ સંબંધોની ગાઢતા અને ટેક્નોલોજીકલ સહકારનું પ્રતીક ગણાવ્યું.
21 કરારો દ્વારા સહકારનો વિસ્તાર
બેઠક દરમિયાન બંને દેશોએ કુલ 21 કરારો કર્યા, જેમાં સંરક્ષણ, દુર્લભ ખનીજો, આર્ટિફિશિયલ ઇન્ટેલિજન્સ (AI), હાઈ ટેક્નોલોજી, ક્લિન એનર્જી, વૈકલ્પિક ઊર્જા અને સ્વાસ્થ્ય ક્ષેત્રોમાં સહકાર વધારવાનો સમાવેશ થાય છે. ભારત અને ફ્રાન્સે બેવડા વેરાને દૂર કરવાની દિશામાં પણ આગળ વધવાનું નક્કી કર્યું છે, જેનાથી દ્વિપક્ષીય વેપાર, રોકાણ અને પરિવહન ક્ષેત્રે ગતિ મળશે.
‘યર ઓફ ઈનોવેશન’થી સંશોધન અને ઉદ્યોગને પ્રોત્સાહન
વડાપ્રધાન મોદીએ જણાવ્યું કે ભારત અને ફ્રાન્સ વચ્ચે શરૂ થયેલું ‘યર ઓફ ઈનોવેશન’ માત્ર ઉજવણી નહીં પરંતુ ઈનોવેશન અને વૈશ્વિક નેતૃત્વ માટેની સંયુક્ત પ્રતિબદ્ધતા છે. આ પહેલથી સંશોધકો, સ્ટાર્ટઅપ્સ અને ઈન્ડસ્ટ્રી વચ્ચે સહકાર વધશે તેમજ સ્પેસ, નવી ટેક્નોલોજી અને ક્લિન એનર્જી ક્ષેત્રોમાં નવી તકો ઉભી થશે.
ભારત વિશ્વાસપાત્ર ભાગીદાર: મેક્રોં
ફ્રાન્સના પ્રમુખ ઈમેન્યુઅલ મેક્રોંએ જણાવ્યું કે ભારત અને ફ્રાન્સના સંબંધો વિશ્વાસ, નિખાલસતા અને સહિયારી આશાઓ પર આધારિત છે. તેમણે ભાર મૂક્યો કે ફ્રાન્સ ભારતનો વિશ્વસનીય સાથી દેશ તરીકે રહેવા ઈચ્છે છે અને બંને દેશો સ્પેસ, એરોનોટિક્સ, રેલવે, સોલાર એનર્જી અને ટેક્નોલોજીમાં સંયુક્ત દ્રષ્ટિ ધરાવે છે. ફ્રાન્સે 2030 સુધીમાં 30,000 ભારતીય વિદ્યાર્થીઓને આવકારવાનું લક્ષ્ય પણ જાહેર કર્યું.
બંને નેતાઓએ ઈન્ડિયા-ફ્રાન્સ ઈનોવેશન ફોરમનું ઉદ્ઘાટન કર્યું. મેક્રોંએ ભારતીય ટેક ટેલેન્ટ અને સ્ટાર્ટઅપ્સ માટે ખાસ કરીને ગ્રીન ટેક્નોલોજી અને સ્પેસ ક્ષેત્રોમાં નવી સહયોગી તકો અને પ્રોત્સાહનોની જાહેરાત કરી. આ પહેલથી વિચારો અને ટેક્નોલોજીનું વૈશ્વિક સ્તરે આદાનપ્રદાન વધવાની અપેક્ષા છે.
મુંબઈ પ્રવાસ દરમિયાન મેક્રોંએ 26/11ના આતંકવાદી હુમલાના સ્મારક પર જઈ શ્રદ્ધાંજલિ અર્પણ કરી અને આતંકવાદ સામેની લડતમાં ભારત સાથે ઉભા રહેવાની પ્રતિબદ્ધતા વ્યક્ત કરી. તેમણે બોલિવૂડ અને ઉદ્યોગ જગતની કેટલીક અગત્યની હસ્તીઓને પણ મળ્યા અને દ્વિપક્ષીય સહકારના નવા માર્ગો પર ચર્ચા કરી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
