કેન્દ્રીય મંત્રી નીતિન ગડકરીએ ઇલેક્ટ્રિક વ્હીકલ (EV) નિર્માતાઓને સરકાર તરફથી મળતી સબસિડીને લઈને મોટું નિવેદન આપ્યું છે. રોડ ટ્રાન્સપોર્ટ અને હાઈવે મિનિસ્ટરે કહ્યું છે કે ઈવી ઉત્પાદકોને સબસિડી આપવાની જરૂર નથી.
ગડકરીએ BNEF સમિટમાં કહ્યું, ‘લોકો હવે EV અથવા CNG વાહનો જાતે જ પસંદ કરી રહ્યા છે. શરૂઆતમાં ઈલેક્ટ્રિક વાહનોના ઉત્પાદનની કિંમત વધુ હતી, પરંતુ માંગ વધવાથી ઉત્પાદન ખર્ચમાં ઘટાડો થયો, જેના કારણે વધુ સબસિડીની જરૂરિયાત દૂર થઈ.
કેન્દ્રીય મંત્રીએ વધુમાં કહ્યું, ‘મને નથી લાગતું કે આપણે ઇલેક્ટ્રિક વાહનો માટે વધુ સબસિડી આપવાની જરૂર છે. પેટ્રોલ અને ડીઝલ વાહનો કરતાં ઇલેક્ટ્રિક વાહનો પર જીએસટી ઓછો છે. મારા મતે, ઇલેક્ટ્રિક વાહનોના ઉત્પાદનને હવે સરકારી સબસિડીની જરૂર નથી. સબસિડીની માંગ હવે વ્યાજબી નથી. હાલમાં, હાઇબ્રિડ સહિત આંતરિક કમ્બશન એન્જિન દ્વારા સંચાલિત વાહનો પર 28 ટકા GST લાદવામાં આવ્યો છે. તે જ સમયે, ઇલેક્ટ્રિક વાહનો પર GST 5 ટકા છે.
જોકે, નીતિન ગડકરીએ પેટ્રોલ અને ડીઝલ વાહનો પર વધારાનો ટેક્સ લાદવાની શક્યતાને પણ નકારી કાઢી હતી. તેમણે કહ્યું, ‘ભારતની અર્થવ્યવસ્થાના કદ અને ઉર્જા જરૂરિયાતોને ધ્યાનમાં રાખીને, અશ્મિભૂત ઇંધણમાંથી વૈકલ્પિક ઇંધણમાં સંક્રમણ એક ક્રમિક પ્રક્રિયા હશે. લિથિયમ-આયન બેટરીની કિંમતમાં વધુ ઘટાડો ઇલેક્ટ્રિક વાહનોની કિંમતમાં ઘટાડો કરશે.
EV વાહનોની કિંમત સમાન બની જશે
તેમણે કહ્યું, ‘2 વર્ષમાં ડીઝલ, પેટ્રોલ અને ઇલેક્ટ્રિક વાહનોની કિંમત સમાન થઈ જશે. શરૂઆતના સમયમાં EVની કિંમત ઘણી વધારે હતી. એટલા માટે અમારે EV ઉત્પાદકોને સબસિડી આપવાની જરૂર હતી. જ્યારે તેમને પૂછવામાં આવ્યું કે શું સરકાર FAME સ્કીમનો વિસ્તાર કરશે. ગડકરીએ કહ્યું કે FAME યોજના સબસિડી એક સારો વિષય છે, પરંતુ તે તેમના મંત્રાલયનો નથી.
FAME પર કુમારસ્વામીએ શું કહ્યું?
માત્ર બે દિવસ પહેલા, કેન્દ્રીય ભારે ઉદ્યોગ મંત્રી એચડી કુમારસ્વામીએ કહ્યું હતું કે સરકાર તેની ફ્લેગશિપ ઇલેક્ટ્રિક મોબિલિટી એડોપ્શન પ્લાન FAMEના ત્રીજા તબક્કાને એક કે બે મહિનામાં અંતિમ સ્વરૂપ આપશે. એક આંતર-મંત્રાલય જૂથ આ યોજના માટે મળેલા સૂચનો પર કામ કરી રહ્યું છે.
