NEET-UG 2026 પેપર લીક કૌભાંડમાં તપાસ તેજ બનતી જાય છે. આ મામલે સેન્ટ્રલ બ્યુરો ઓફ ઇન્વેસ્ટિગેશન (CBI)એ વધુ એક મુખ્ય આરોપીની ધરપકડ કરી છે. પુણેની રહેવાસી અને વરિષ્ઠ બોટની શિક્ષિકા મનીષા ગુરુનાથ મંડહરેને દિલ્હીમાંથી ઝડપવામાં આવી છે. તપાસમાં સામે આવ્યું છે કે તે નેશનલ ટેસ્ટિંગ એજન્સી (NTA)ની પેનલનો ભાગ હતી અને આ સમગ્ર પેપર લીક કાંડની માસ્ટરમાઈન્ડ તરીકે કામ કરી રહી હતી.
NTA સાથે સીધી સંડોવણી
CBIની તપાસમાં સામે આવ્યું છે કે મનીષા મંડહરેને NTA દ્વારા નિષ્ણાત તરીકે નિમવામાં આવી હતી. તેને NEET-UG 2026ના બોટની અને ઝુઓલોજી પેપર તૈયાર કરવાની જવાબદારી સોંપવામાં આવી હતી. આ કારણે તેની પાસે પ્રશ્નપત્ર સુધી સીધી પહોંચ હતી.
‘કોચિંગ ક્લાસ’ મારફતે પેપર લીક
તપાસમાં ચોંકાવનારો ખુલાસો થયો છે કે મનીષા મંડહરે અને તેની સહયોગી મનીષા વાઘમારે મળીને પુણેમાં એક ગુપ્ત કોચિંગ ક્લાસ ચલાવતા હતા.
આ ક્લાસમાં વિદ્યાર્થીઓને પ્રશ્નો, જવાબો અને મહત્વપૂર્ણ મુદ્દાઓ સમજાવવામાં આવતા હતા. વિદ્યાર્થીઓને આપવામાં આવેલી માહિતી NEET-UGના મૂળ પ્રશ્નપત્ર સાથે મેળ ખાતી હોવાનું ફોરેન્સિક તપાસમાં સામે આવ્યું છે.
CBIના દરોડા અને તપાસ
CBIએ છેલ્લા 24 કલાકમાં દેશભરમાં 6 સ્થળોએ દરોડા પાડ્યા છે. આ દરમિયાન અનેક મહત્વપૂર્ણ દસ્તાવેજો, લેપટોપ, મોબાઈલ ફોન અને બેંક સ્ટેટમેન્ટ જપ્ત કરવામાં આવ્યા છે.
શિક્ષણ મંત્રાલય તરફથી મળેલી ફરિયાદ બાદ 12 મેના રોજ કેસ નોંધવામાં આવ્યો હતો, ત્યારબાદ ઝડપથી તપાસ શરૂ કરવામાં આવી છે.
અત્યાર સુધી 9 આરોપીઓ ઝડપાયા
આ કેસમાં અત્યાર સુધીમાં દિલ્હી, જયપુર, ગુરુગ્રામ, નાસિક, પુણે અને અહિલ્યાનગર સહિતના શહેરોમાંથી કુલ 9 આરોપીઓને ઝડપવામાં આવ્યા છે.
આમાંથી કેટલાક આરોપીઓને કોર્ટ દ્વારા 7 દિવસના રિમાન્ડ પર મોકલવામાં આવ્યા છે.
મુખ્ય સૂત્રધાર પહેલેથી જ ઝડપાયો
આ પહેલા CBIએ આ કેસના મુખ્ય સૂત્રધાર પી.વી. કુલકર્ણીની ધરપકડ કરી હતી. તે કેમિસ્ટ્રી લેક્ચરર છે અને NTA સાથે જોડાયેલ હોવાથી પ્રશ્નપત્ર સુધી સીધી પહોંચ ધરાવતો હતો.
પેપર લીક કૌભાંડ સામે આવ્યા બાદ NEET-UG 2026 પરીક્ષા હવે 21 જૂને ફરી યોજવામાં આવશે. અગાઉ આ પરીક્ષા 3 મેના રોજ યોજાવાની હતી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
