ભારતીય વાયુસેના (IAF)ની શક્તિ વધારવા માટે 114 વધુ રફાલ ફાઈટર જેટ્સ ખરીદવાનો પ્રસ્તાવ ઝડપથી આગળ વધી રહ્યો છે. અંદાજે ₹3.25 લાખ કરોડની આ ડીલ ભારતના ઈતિહાસમાં સૌથી મોટો હથિયારોનો સોદો બનવાની સંભાવના વ્યક્ત કરવામાં આવી રહી છે. અહેવાલો મુજબ, આ પ્રસ્તાવને ફ્રાન્સના રાષ્ટ્રપતિ એમાન્યુઅલ મેક્રોનની ભારત મુલાકાત પહેલાં મંજૂરી મળી શકે છે.
18 ફ્લાય-અવે જેટ્સ અને 96 ‘મેક ઇન ઇન્ડિયા’ હેઠળ ઉત્પાદન
પ્રસ્તાવ મુજબ કુલ 114 રફાલ જેટ્સમાંથી 18 જેટ્સ ફ્લાય-અવે કન્ડિશનમાં સીધા ફ્રાન્સની ડસોલ્ટ એવિએશન પાસેથી ખરીદવામાં આવશે. બાકીના 96 જેટ્સ ભારતમાં જ ‘મેક ઇન ઇન્ડિયા’ પહેલ હેઠળ ખાનગી કંપનીઓ સાથે ભાગીદારીમાં બનાવવામાં આવશે. આ પ્રોજેક્ટમાં સિંગલ-સીટર અને ટ્વિન-સીટર બંને વેરિઅન્ટ્સનો સમાવેશ થશે.
આ સાથે ટેક્નોલોજી ટ્રાન્સફર, સ્ટ્રેટેજિક પાર્ટનરશિપ અને સ્થાનિક ઉત્પાદનને પ્રોત્સાહન આપવાની યોજના પણ સામેલ છે.
સ્થાનિક ઉત્પાદન અને ટેક્નોલોજી ટ્રાન્સફર પર ભાર
ડસોલ્ટ એવિએશન ભારતીય ખાનગી કંપનીઓ સાથે સહકાર કરશે અને ભારતમાં ફ્યુઝલેજ વિભાગોનું ઉત્પાદન થવાની શક્યતા છે. અહેવાલો મુજબ સ્થાનિક કન્ટેન્ટ 60% સુધી પહોંચી શકે છે, જે ‘આત્મનિર્ભર ભારત’ અને સ્થાનિક ડિફેન્સ ઇન્ડસ્ટ્રીને મોટો પ્રોત્સાહન આપશે.
મંજૂરી પ્રક્રિયા અને આગળના પગલાં
ડિફેન્સ પ્રોક્યોરમેન્ટ બોર્ડ દ્વારા ગયા મહિને આ પ્રસ્તાવને મંજૂરી આપવામાં આવી છે. હવે ડિફેન્સ એક્વિઝીશન કાઉન્સિલ (DAC) દ્વારા ‘એક્સેપટન્સ ઓફ નેસેસિટી’ (AoN) માટે બેઠક યોજાશે. AoN મળ્યા બાદ વાણિજ્યિક વાટાઘાટો શરૂ થશે અને અંતે કેબિનેટ કમિટી ઓન સિક્યુરીટી (CCS)ની મંજૂરી લેવામાં આવશે, જેની અધ્યક્ષતા વડાપ્રધાન નરેન્દ્ર મોદી કરે છે.
મેક્રોનની ભારત મુલાકાત પહેલાં નિર્ણય શક્ય
અહેવાલો મુજબ, ફ્રાન્સના રાષ્ટ્રપતિ એમાન્યુઅલ મેક્રોનની આગામી ભારત મુલાકાત પહેલાં આ પ્રક્રિયાઓ પૂર્ણ થઈ શકે છે. મેક્રોન 15-17 અથવા 18-20 ફેબ્રુઆરી દરમિયાન નવી દિલ્હીમાં યોજાનારી AI સમિટમાં ભાગ લેવા આવવાના છે.
વાયુસેનાની શક્તિમાં થશે મોટો વધારો
ભારત પાસે હાલમાં 36 રફાલ ફાઈટર જેટ્સ છે. નવા 114 જેટ્સ ઉમેરાયા બાદ ભારતીય વાયુસેનાની ક્ષમતામાં નોંધપાત્ર વધારો થશે અને દેશની રક્ષા શક્તિ વધુ મજબૂત બનશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
