ગણતંત્ર દિવસ 2026 નિમિત્તે રાષ્ટ્રપતિ ભવન માટે મોકલાતા નિમંત્રણ પત્રો આ વખતે અમદાવાદ સ્થિત નેશનલ ઇન્સ્ટિટ્યૂટ ઓફ ડિઝાઇન (NID) દ્વારા તૈયાર કરાયેલા છે, જે છેલ્લા ત્રણ વર્ષથી સતત આ જવાબદારી નિભાવતી આવી રહી છે. આ વર્ષના નિમંત્રણ પત્રોની વિશેષતા એ છે કે તેમાં ભારતના ઉત્તર-પૂર્વીય રાજ્યોની પરંપરાગત હસ્તકલાને સમાયોજિત કરીને તેમની સંસ્કૃતિ અને કળા પ્રદર્શિત કરવામાં આવી છે. NID ટીમે આ પ્રોજેક્ટ પર લગભગ 90 દિવસ કામ કર્યું, જેમાં 45 દિવસ સંશોધન માટે અને 45 દિવસ નિર્માણ માટે લાગ્યા. પ્રોજેક્ટમાં કુલ 350 લોકો જોડાયા, જેમાં 200થી વધુ કારીગરોએ પોતાના ગામમાં બેઠા બેઠા કળાનું કામ કર્યું, જ્યારે NIDના 100 જેટલા ફેકલ્ટી સભ્યો, સ્ટાફ, પૂર્વ વિદ્યાર્થીઓ અને વિદ્યાર્થીઓએ ડિઝાઇન તૈયાર કરવામાં સહયોગ આપ્યો.
નિમંત્રણ પત્રમાં ઉત્તર-પૂર્વના આઠ રાજ્યો (‘અષ્ટલક્ષ્મી’)નું પ્રતિનિધિત્વ કરતું વિશિષ્ટ નમૂનાઓનો સમાવેશ છે. સિક્કિમ માટે વાઈલ્ડ નેટલ ફેબ્રિક પર માઉન્ટ કાંચનજંઘાની એમ્બ્રોઈડરી, મેઘાલય માટે ગ્રીન બેમ્બુ વણાટ, અરુણાચલ પ્રદેશ માટે ‘મોનપા’ હેન્ડમેડ પેપર અને આસામ માટે પરંપરાગત વાજિંત્ર ‘ગોગોના’ સામેલ છે. અન્ય રાજ્યોની કળા પણ નિમંત્રણ પત્રમાં સ્થાન પામી છે, જેમ કે ત્રિપુરાના કેન એમ્બ્રોઈડરી, નાગાલેન્ડનું પરંપરાગત ફેબ્રિક, મિઝોરમના મિલેટ સીડ્સ (બાજરીના દાણા) સાથેની એમ્બ્રોઈડરી અને મણિપુરના લોંગપી હિલ્સની બ્લેક પોટરી. આ તમામ સામગ્રી સીધી ઉત્તર-પૂર્વીય રાજ્યોમાંથી મેળવી હતી, જેનાથી સ્થાનિક કારીગરોની હસ્તકલા માટે વૈશ્વિક સ્તરે માન્યતા મળી શકે.
આ વર્ષના ઇન્વિટેશન પત્રો 950 મહેમાનોને મોકલવામાં આવ્યા છે અને તેનો મુખ્ય હેતુ સ્થાનિક કારીગરોને પ્રોત્સાહન આપવું અને તેમની હસ્તકલા પ્રત્યે જાગૃતિ લાવવી છે. અગાઉના વર્ષોમાં પણ આ પ્રકારના નિમંત્રણ પત્રોને કારણે કારીગરોની કળા અને કારીગરો માટે લોકોમાં રસ વધ્યો છે. આ રીતે, રાષ્ટ્રપતિ ભવન માટે તૈયાર કરાયેલા આ હસ્તકલાવાળા કાર્ડ માત્ર નમંત્રણ નથી, પરંતુ ભારતની વિવિધ સંસ્કૃતિ અને હસ્તકલા પ્રદર્શિત કરતી એક કલા પદાર્થ તરીકે વૈશ્વિક સ્તરે મહત્વ ધરાવે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
