રશિયાએ પાકિસ્તાનના અંગ્રેજી અખબાર ‘ધ ફ્રન્ટિયર પોસ્ટ’ પર ગંભીર આક્ષેપો લગાવ્યા છે, તેને રશિયા-વિરોધી પ્રચારનું સાધન ગણાવ્યું છે. પાકિસ્તાનમાં સ્થિત રશિયન દૂતાવાસે 6 નવેમ્બર 2025ના રોજ સોશિયલ મીડિયા પ્લેટફોર્મ X (પૂર્વે ટ્વિટર) પર એક લાંબું નિવેદન જાહેર કર્યું હતું, જેમાં તેણે આ અખબાર પર પશ્ચિમ દેશોના એજન્ડાને આગળ ધપાવવાનો આરોપ મૂક્યો છે. દૂતાવાસે કહ્યું છે કે આ અખબાર નિષ્પક્ષ પત્રકારિતાથી દૂર જઈને પશ્ચિમ પ્રચારનું માધ્યમ બની ગયું છે.
રશિયન દૂતાવાસના નિવેદન મુજબ, “‘ધ ફ્રન્ટિયર પોસ્ટ’માં છેલ્લા કેટલાક મહિનાઓથી રશિયા-વિરોધી લેખોની શ્રેણી પ્રકાશિત થઈ રહી છે. આ અખબારને ‘પાકિસ્તાની’ કહેવુ મુશ્કેલ છે, કારણ કે તેનું આંતરરાષ્ટ્રીય ન્યૂઝ વિભાગ વોશિંગ્ટનમાં કાર્યરત છે. ત્યાંની અમેરિકન ટીમ જ એવા લેખકોને પસંદ કરે છે, જે રશિયા અને તેના નેતૃત્વની સતત ટીકા કરે છે.” દૂતાવાસે વધુમાં ઉમેર્યું કે અખબારના આંતરરાષ્ટ્રીય વિભાગમાં રશિયા અંગે કોઈ સકારાત્મક કે તટસ્થ લેખ નથી, જે બતાવે છે કે તે પશ્ચિમી દેશોના એજન્ડાને અનુસરે છે.
✒️ We have taken note of a series of anti-Russian articles published in the English-language Pakistani newspaper, the Frontier Post. To start with, we would like to emphasize that this periodical can hardly be called "Pakistani," given that its global news service is… pic.twitter.com/JRMUpoXs6a
— Embassy of Russia in Pakistan (@RusEmbPakistan) November 6, 2025
રશિયાએ અખબારના દાવાઓનો જવાબ આપતાં પોતાની આર્થિક મજબૂતી અને પ્રગતિ પર ભાર મૂક્યો છે. દૂતાવાસે જણાવ્યું કે, “યુક્રેન યુદ્ધ અને પશ્ચિમના પ્રતિબંધો છતાં રશિયાની અર્થવ્યવસ્થા મજબૂત છે. 2024માં રશિયાનો GDP 4.1% વધ્યો, જ્યારે ઉત્પાદન ક્ષેત્રે 8.5%નો વિકાસ નોંધાયો છે. બેરોજગારીનો દર માત્ર 2.5% છે અને 2025માં સરેરાશ મોંઘવારી 6.5%થી 7% વચ્ચે રહેશે.” દૂતાવાસે કહ્યું કે, “આ આંકડા એવા દેશના નથી જેની અર્થવ્યવસ્થા ‘પતનના કિનારે’ હોય.”
રશિયન દૂતાવાસે આગળ જણાવ્યું કે તાજેતરમાં રશિયાએ નવા આધુનિક હથિયારોના સફળ પરીક્ષણો કર્યા છે, જે તેની સૈન્ય ક્ષમતા અને ટેક્નોલોજીકલ પ્રગતિ દર્શાવે છે. તેમ છતાં, ‘ધ ફ્રન્ટિયર પોસ્ટ’એ આ મુદ્દાઓ પર એકેય વાર કવરેજ નથી આપી. વધુમાં દૂતાવાસે આક્ષેપ લગાવ્યો કે અખબારે 7 ઑક્ટોબર 2025ના મૉસ્કો ફોર્મેટ ઑફ કન્સલ્ટેશન્સ – જેમાં અફઘાનિસ્તાન સંબંધિત ચર્ચાઓ થઈ હતી – તે બેઠકને પણ અવગણી દીધી, જ્યારે અન્ય પાકિસ્તાની મીડિયાએ તેને પૂરતું મહત્વ આપ્યું હતું.
રશિયન દૂતાવાસે પાકિસ્તાની નાગરિકોને અપીલ કરી છે કે તેઓ વિવિધ સ્ત્રોતોમાંથી માહિતી મેળવવી જોઈએ અને એવા પ્રકાશનો પર વિશ્વાસ ન કરવો જોઈએ જે વિદેશી હિતો માટે કાર્ય કરે છે. નિવેદનના અંતે દૂતાવાસે જણાવ્યું કે રશિયા હંમેશા પાકિસ્તાન સાથે સમાનતા અને પરસ્પર આદરના આધારે સંબંધો મજબૂત કરવા પ્રતિબદ્ધ છે, પરંતુ કેટલીક મીડિયા સંસ્થાઓ દ્વારા ચાલી રહેલા ભ્રામક પ્રચારથી બે દેશો વચ્ચેના વિશ્વાસને નુકસાન થઈ શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
