નેપાળના વડાપ્રધાન પુષ્પ કમલ દહલ પ્રચંડ આજથી ભારતના સત્તાવાર પ્રવાસ પર આવ્યા છે. પ્રચંડની સાથે એક ઉચ્ચ સ્તરીય પ્રતિનિધિમંડળ પણ ભારત આવ્યું છે. પ્રચંડની ભારત મુલાકાતને મહત્વ માનવામાં આવી રહી છે. ખાસ કરીને ચીન સાથેના રાજદ્વારી સંબંધો અને નેપાળ અને ચીન વચ્ચે વધી રહેલી નિકટતા વચ્ચે આ મુલાકાત ખુબ જ મહત્વની છે.
નેપાળમાં ગયા વર્ષે ડિસેમ્બરમાં ત્રીજી વખત વડાપ્રધાન બન્યા બાદ પુષ્પ કમલ દહલ પ્રચંડની આ પ્રથમ વિદેશ યાત્રા છે. નેપાળના વડાપ્રધાન પ્રચંડે ચીનના આમંત્રણ છતાં ભારતની પસંદગી કરી છે. આ મુલાકાતને લઈને બંને પક્ષે ભારે ઉત્સુકતા છે. છેલ્લા કેટલાક સમયથી નેપાળ જે રીતે સતત ચીનની નજીક આવી રહ્યું છે. આ સ્થિતિમાં નેપાળના વડાપ્રધાનની આ યાત્રા સંબંધોમાં ઉષ્મા લાવી શકે છે. નેપાળના પીએમ પ્રચંડ દ્વિપક્ષીય સંબંધોને મજબૂત કરવા માટે પીએમ નરેન્દ્ર મોદી અને અન્ય નેતાઓ સાથે વાતચીત કરશે. આ દરમિયાન બંને દેશો વચ્ચે ઘણા કરારો પર હસ્તાક્ષર પણ થશે.
ભારતના વિદેશ મંત્રાલયે એક નિવેદનમાં જણાવ્યું હતું કે નેપાળના વડાપ્રધાનની આ મુલાકાત અમારી ‘નેબરહુડ ફર્સ્ટ’ નીતિને આગળ વધારવા માટે નિયમિત ઉચ્ચ સ્તરીય આદાનપ્રદાનની પરંપરાને ચાલુ રાખે છે. બંને દેશો વચ્ચેના દ્વિપક્ષીય સંબંધો છેલ્લા કેટલાક વર્ષોમાં સહકારના તમામ ક્ષેત્રોમાં નોંધપાત્ર રીતે મજબૂત થયા છે. પ્રચંડ બહુપક્ષીય દ્વિપક્ષીય સંબંધોને મજબૂત કરવા માટે પીએમ નરેન્દ્ર મોદી અને અન્ય નેતાઓ સાથે વાતચીત કરશે. નેપાળના વિદેશ મંત્રાલયે શનિવારે એક નિવેદનમાં જણાવ્યું હતું કે આ મુલાકાત નેપાળ અને ભારત વચ્ચે વર્ષો જૂના, બહુપક્ષીય અને સૌહાર્દપૂર્ણ સંબંધોને વધુ મજબૂત કરશે. આ ઉપરાંત ભારતીય નેતાઓ સાથેની તેમની વાટાઘાટોમાં દ્વિપક્ષીય સંબંધોને પ્રોત્સાહન અને વેપાર, ઉર્જા, કૃષિ, સંસ્કૃતિ અને હવાઈ સેવાઓ સંબંધિત ચર્ચાઓ મુખ્ય રીતે થઈ શકે છે.
