અમેરિકામાં ભારતીય મૂળના સુબ્રમણ્યમ વેદમના ડિપોર્ટેશન પર ત્યાંની બે અલગ-અલગ કોર્ટે રોક લગાવી છે. વેદમ 43 વર્ષ સુધી એક ખોટા હત્યાના કેસમાં જેલમાં રહ્યા હતા, પરંતુ હવે તેઓ દોષમુક્ત ઠર્યા છે. તેમ છતાં, યુએસ ઇમિગ્રેશન એન્ડ કસ્ટમ્સ એન્ફોર્સમેન્ટ (ICE) એ તેમના વિરુદ્ધ જૂના નાનકડા ડ્રગ્સના ગુનાના આધારે ડિપોર્ટેશનની પ્રક્રિયા શરૂ કરી હતી. હાલ આ કાર્યવાહી પર તાત્કાલિક રોક લગાવવામાં આવી છે.
રિપોર્ટ્સ મુજબ, બોર્ડ ઑફ ઇમિગ્રેશન અપીલ્સ એ નિર્ણય કર્યો કે કેસની સમીક્ષા પૂર્ણ ન થાય ત્યાં સુધી વેદમને દેશમાંથી બહાર નહીં કાઢવામાં આવે. ત્યારબાદ પેન્સિલવેનિયાની ડિસ્ટ્રિક્ટ કોર્ટ એ પણ ડિપોર્ટેશન પર રોક લગાવી દીધી.
64 વર્ષીય વેદમ પોતાના બાળપણમાં અમેરિકા ગયા હતા અને ત્યાંના પરમેનન્ટ રેસિડન્ટ છે. તેમણે નાગરિકતા માટે અરજી પણ કરી હતી, પરંતુ 1982માં એક હત્યાના કેસમાં તેમની ધરપકડ થઈ. આ કેસમાં 1980માં તેમના મિત્રની હત્યા થઈ હતી અને માત્ર એટલા માટે કે વેદમ મૃતક સાથે છેલ્લે જોવા મળ્યા હતા, તેમની સામે કેસ નોંધાયો. કોઇ મજબૂત પુરાવા ન હોવા છતાં તેમને જીવનકાળની સજા ફટકારાઈ.
દાયકાઓ સુધી ચાલેલા કેસ પછી, પેન્સિલવેનિયાની કોર્ટે ઑગસ્ટ 2025માં તેમની દોષસિદ્ધિ રદ કરી, કારણ કે તપાસ અને ટ્રાયલ દરમ્યાન ગંભીર ભૂલો થઈ હતી. 3 ઑક્ટોબરે આખરે તેમને જેલમાંથી મુક્ત કરવામાં આવ્યા, પરંતુ ત્યારબાદ ICE એ તેમને ફરીથી કસ્ટડીમાં લઈ લીધા, કારણ કે તેઓએ યુવાનીમાં એક નાનો ડ્રગ્સનો ગુનો કર્યો હતો.
સુબ્રમણ્યમના વકીલોએ દલીલ કરી છે કે, “એક વ્યક્તિ જે 43 વર્ષ સુધી ખોટી રીતે જેલમાં રહ્યો છે, તેને હવે નાનકડા ગુના માટે દેશ બહાર કાઢવું માનવ અધિકારો વિરુદ્ધ છે.” બીજી તરફ, ઇમિગ્રેશન એજન્સીનો દાવો છે કે હત્યાના કેસમાં નિર્દોષ ઠરાવાનો નિર્ણય તેમના અન્ય ગુનાને પ્રભાવિત કરતો નથી.
હાલ કેસની કાર્યવાહી ચાલુ છે અને કોર્ટના અંતિમ નિર્ણય સુધી વેદમ કસ્ટડીમાં જ રહેશે, પરંતુ તેમને ડિપોર્ટ નહીં કરી શકાય. આ કેસે અમેરિકામાં ન્યાયવ્યવસ્થાની ખામીઓ અને લાંબા સમયથી ચાલતા ખોટા કેસોના ભોગ બનેલા લોકોને મળતા ન્યાયના પ્રશ્નને ફરી એક વાર ચર્ચામાં લાવ્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
