વિનેશ ફોગાટે કુસ્તીમાં સેમીફાઈનલમાં જગ્યા બનાવી, હવે મેડલથી માત્ર એક જીત દૂર

પ્રી-ક્વાર્ટર ફાઈનલ પૂર્વ ચેમ્પિયનને હરાવી

વિનેશ ફોગટે પ્રી-ક્વાર્ટર ફાઈનલ મેચમાં રોમાંચક રીતે જાપાનની કુસ્તીબાજ યુઈ સુસાકીને 3-2થી હરાવી હતી, આ સાથે તે હવે ક્વાર્ટર ફાઈનલ માટે ક્વોલિફાઈ થઈ હતી. વિનેશની આ જીત ઘણી મોટી હતી, કારણ કે તેણે ઓલિમ્પિક ચેમ્પિયન અને જાપાનની નંબર 1 ખેલાડીને હરાવી હતી. આટલું જ નહીં, યૂઈ સુસાકીએ તેની કારકિર્દીમાં આજ સુધી એકપણ આંતરરાષ્ટ્રીય મેચ હારી ન હતી. એવામાં આ જીતથી વિનેશ ફોગટનું મનોબળ વધ્યું હતું.

ક્વાર્ટર ફાઈનલમાં 7-5 થી જીત મેળવી

પ્રી-ક્વાર્ટર ફાઈનલમાં પૂર્વ ઓલિમ્પિક ચેમ્પિયનને હરાવ્યા બાદ વિનેશે ક્વાર્ટર ફાઈનલમાં યુક્રેનની ઓક્સાના લિવાચનો સામનો કર્યો હતો. તેણે શરૂઆતમાં જ તેની ચાલ સાથે 2-0ની લીડ મેળવી હતી. ત્યારપછી 3 મિનિટનો પહેલો ભાગ પૂરો થતાં વિનેશે 4-0ની સરસાઈ મેળવી લીધી હતી. આ પછી વિનેશે યુક્રેનિયન બોક્સર સામે સતત દબાણ જાળવી રાખ્યું અને મેચ 7-5 થી જીતી અને મજબૂત રીતે સેમીફાઈનલમાં જગ્યા બનાવી હતી.

મંગળવારે સેમીફાઈનલ મુકાબલો

વિનેશ ફોગટ હવે ઓલિમ્પિક મેડલથી માત્ર એક જીત જ દૂર છે. હવે સેમીફાઈનલમાં વિનેશ ફોગાટનો મુકાબલો ક્યુબાની ગુઝમેન લોપેઝ સામે થશે. ગુઝમેન લોપેઝે તેની ક્વાર્ટર ફાઈનલ મેચમાં લિથુનિયન કુસ્તીબાજને ટેકનિકલ શ્રેષ્ઠતા (10-0) દ્વારા હરાવી હતી. મંગળવારે 6 ઓગસ્ટે રાત્રે 10.25 કલાકે વિનેશ ફોગટનો સેમીફાઈનલ મુકાબલો થશે.