બિહારના બેગુસરાય જિલ્લામાંથી મહિલાની સાથે ગંભીર અત્યાચાર અને સામૂહિક દુષ્કર્મના આરોપોનો ચોંકાવનારો મામલો સામે આવ્યો છે. મીડિયા અહેવાલો મુજબ, 11 જૂન 2026ની રાત્રે 28 વર્ષીય મહિલા પર પાંચ શખ્સોએ હુમલો કરીને તેની સાથે સામૂહિક દુષ્કર્મ કર્યું હોવાનો આરોપ છે. ઘટનાએ સમગ્ર વિસ્તારમાં ભારે ચકચાર મચાવી છે અને પોલીસ દ્વારા તપાસ તેજ કરવામાં આવી છે.
અહેવાલો અનુસાર ઘટના બેગુસરાય જિલ્લાના ચકિયા પોલીસ સ્ટેશન વિસ્તારની છે. પીડિતાના જણાવ્યા મુજબ તે રાત્રે લગભગ 11:30 વાગ્યે શૌચ માટે ઘરની બહાર ગઈ હતી. આ દરમિયાન કેટલાક લોકો તેના ઘરમાં ઘૂસી ગયા અને તેના પતિને એક રૂમમાં બંધ કરી દીધા હતા. મહિલા પરત ફરતાં જ આરોપીઓએ તેને કાબૂમાં લીધી અને નજીકના એક સૂમસામ સ્થળે લઈ ગયા હતા.
પીડિતાએ આરોપ લગાવ્યો છે કે ત્યાં પાંચ લોકોએ તેની સાથે સામૂહિક દુષ્કર્મ કર્યું હતું. તેણે વિરોધ કરવાનો પ્રયાસ કરતાં આરોપીઓએ તેના પર હુમલો કર્યો હતો અને તેને ગંભીર શારીરિક ઈજાઓ પહોંચાડી હતી. મહિલાના જણાવ્યા અનુસાર સમગ્ર ઘટનાક્રમ દરમિયાન તેને શારીરિક તેમજ માનસિક રીતે ભારે યાતનાઓનો સામનો કરવો પડ્યો હતો.
ઘટના બાદ મહિલાએ પરિવારજનોને જાણ કરી હતી, જેના પગલે તેને તાત્કાલિક સારવાર માટે હોસ્પિટલમાં ખસેડવામાં આવી હતી. પ્રથમ તબક્કાની સારવાર બાદ પણ તેને સતત પીડા અને ઈજાની ફરિયાદ રહેતાં તેની વધુ તબીબી તપાસ કરવામાં આવી હતી. ત્યારબાદ ફરી તપાસ કરવામાં આવતાં ડૉક્ટરોએ તેના ગુપ્તાંગમાંથી એક કારતૂસ, પથ્થર અને લાકડાનો ટુકડો બહાર કાઢ્યો હોવાનું તેણે જણાવ્યું હતું. આ દરમિયાન કેટલીક ગંભીર બાબતો સામે આવી હોવાનું અહેવાલોમાં જણાવાયું છે, જેની પોલીસ અને તબીબી અધિકારીઓ દ્વારા તપાસ કરવામાં આવી રહી છે.
પીડિતાએ એવો પણ દાવો કર્યો છે કે તેના પરિવારને અગાઉ પણ નિશાન બનાવવામાં આવ્યો હતો. તેના જણાવ્યા અનુસાર લગભગ ત્રણ મહિના પહેલાં કેટલાક લોકો ઘરમાં ઘૂસ્યા હતા અને મારપીટ તેમજ યૌન ઉત્પીડન કરવાનો પ્રયાસ કર્યો હતો. જોકે તે મામલે ફરિયાદ કરવા છતાં અસરકારક કાર્યવાહી થઈ ન હોવાનું તેણે જણાવ્યું છે.
મામલાની તપાસ કરી રહેલા અધિકારીઓએ જણાવ્યું છે કે પીડિતાના નિવેદનને ગંભીરતાથી લેવામાં આવ્યું છે અને ઉપલબ્ધ પુરાવાઓના આધારે તપાસ આગળ વધારવામાં આવી રહી છે. DSP આનંદ કુમાર પાંડેના જણાવ્યા અનુસાર પ્રાથમિક તપાસમાં મહિલાના કેટલાક આરોપો સાચા જણાઈ રહ્યા છે અને સમગ્ર ઘટનાની તમામ દિશામાં તપાસ ચાલી રહી છે.
પોલીસે જણાવ્યું છે કે આરોપીઓની ઓળખ અને તેમની સંડોવણી અંગે પુરાવા એકત્રિત કરવામાં આવી રહ્યા છે. તબીબી અહેવાલો, ફોરેન્સિક તપાસ અને અન્ય સાક્ષ્યોના આધારે આગળની કાર્યવાહી કરવામાં આવશે. હાલ આરોપીઓની ધરપકડ માટે વિવિધ સ્થળોએ દરોડાની કાર્યવાહી પણ હાથ ધરવામાં આવી રહી છે.
આ ઘટના મહિલાઓની સુરક્ષા, કાયદો-વ્યવસ્થા અને પીડિતોને ઝડપી ન્યાય મળે તે અંગે ગંભીર પ્રશ્નો ઉભા કરે છે. સ્થાનિક લોકો અને સામાજિક સંગઠનોએ પણ દોષિતો સામે કડક કાર્યવાહી કરવાની માંગ કરી છે.
પોલીસના જણાવ્યા અનુસાર તપાસ પૂર્ણ થયા બાદ તમામ તથ્યો જાહેર કરવામાં આવશે અને જે કોઈ પણ વ્યક્તિ દોષિત સાબિત થશે તેની સામે કડક કાનૂની કાર્યવાહી કરવામાં આવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
