એપલે એક મોટું પગલું ઉઠાવ્યું છે. જેમાં તેના એપ સ્ટોરમાંથી એક લાખથી વધુ એપ્સ દૂર કરવામાં આવી છે. એપ સ્ટોર પર ટ્રાન્સપરન્સીને પ્રોત્સાહન આપવા માટે આવી એપ્સ દૂર કરવામાં આવી છે. એવું કહેવાઈ રહ્યું છે કે છેલ્લા બે દિવસમાં કંપનીએ એપ સ્ટોરમાંથી 1.35 લાખ એપ્સ હટાવી છે. આ એપ્સ ટ્રેડર્સ ઇન્ફર્મેશન આપવામાં નિષ્ફળ ગઈ હતી. ત્યાર બાદ એપલે આ કાર્યવાહી હાથ ધરી હતી.
-
ડેવલપર્સને 17 ફેબ્રુઆરી સુધીનો અપાયો હતો સમય
એપલે એપ ડેવલપર્સને ટ્રેડરની માહિતી આપવા માટે 17 ફેબ્રુઆરી સુધીનો સમય આપ્યો હતો. કંપનીએ જણાવ્યું હતું કે, નક્કી કરેલા સમય મુજબ માહિતી ન મળવાને કારણે આવી એપ્સ પર પ્રતિબંધ મૂકવામાં આવ્યો છે. હવે યુરોપિયન યુનિયન (EU)ના નિયમોનું પાલન કરીને કંપનીએ છેલ્લા બે દિવસમાં યુરોપિયન દેશોમાં 1.35 લાખ એપ્સ હટાવી છે. હવે જ્યાં સુધી તેના સંબંધિત માહિતી પ્રાપ્ત ન થાય અને એપલ તેની વેરિફાઈ ન કરી લે ત્યાં સુધી આ એપ્સ પરનો પ્રતિબંધ યથાવત રહેશે. એપ સ્ટોર લોન્ચ થયા બાદ આને અત્યાર સુધીની સૌથી મોટી કાર્યવાહી માનવામાં આવી રહી છે.
-
EUએ કર્યા છે કડક નિયમ
EUના નિયમો મુજબ એપ્લિકેશન ડેવલપર્સને “ટ્રેડ સ્ટેટસ” જાહેર કરવુ જરૂરી છે. મતલબ કે એપ સ્ટોર પર તેમની એપ લિસ્ટેડ કરાવવા માટે ડેવલપર્સને તેમનું સરનામું, ફોન નંબર અને ઈમેલ જેવી માહિતી આપવાની રહે છે. જો આ માહિતી આપવામાં નહીં આવે તો એપ પર પાબંદી લગાવવામાં આવશે. ઉલ્લેખનીય છે કે, યુરોપમાં ઓનલાઈન પ્લેટફોર્મ માટે ડિજિટલ સર્વિસ એક્ટ રજૂ કરવામાં આવ્યો છે. તેને ટેમ્પરરી રીતે 2023 માં લાગુ કરવામાં આવ્યો હતો અને 17 ફેબ્રુઆરી 2025 થી સંપૂર્ણ રીતે અમલમાં લવાયો છે. આથી એપલે તેનું પાલન કરવા માટે એપ ડેવલપર્સને 17 ફેબ્રુઆરી સુધીનો સમય આપ્યો હતો.
