ગુજરાતમાં દારૂબંધી વચ્ચે જૂનાગઢમાંથી એક અત્યંત ચોંકાવનારો કિસ્સો સામે આવ્યો છે, જેમાં નકલી દેશી દારૂ બનાવવા માટે માનવ જીવન સાથે જોખમી રમત રમાતી હોવાનો પર્દાફાશ થયો છે. પોલીસે કાર્યવાહી કરતા મુખ્ય આરોપીને ઝડપી પાડ્યો છે અને સમગ્ર નેટવર્ક સુધી પહોંચવા માટે તપાસ તેજ કરી છે.
જૂનાગઢના ઇન્ચાર્જ પોલીસ વડા રોહિત ડગરે જણાવ્યું હતું કે આરોપી અગરબત્તી બનાવવામાં વપરાતા લિક્વિડ કેમિકલ અને ઇન્ડસ્ટ્રીયલ આલ્કોહોલનો ઉપયોગ કરીને નકલી દારૂ તૈયાર કરતો હતો. આ ઝેરી કેમિકલ યુક્ત પીણું પીવાના કારણે અત્યાર સુધીમાં ચાર લોકો ગંભીર રીતે બીમાર પડ્યા છે અને તેમને તાત્કાલિક હોસ્પિટલમાં ખસેડવામાં આવ્યા છે.
હોસ્પિટલમાં દાખલ દર્દીઓમાં બે લોકોની હાલત અત્યંત નાજુક હોવાનું તબીબોએ જણાવ્યું છે. ઘટનાને લઈને સોશિયલ મીડિયા પર લઠ્ઠાકાંડ જેવી અફવાઓ ફેલાઈ હતી, પરંતુ પોલીસે સ્પષ્ટતા કરી છે કે આ ઘટનામાં કોઈનું મૃત્યુ થયું નથી.
પોલીસે ઘટનાસ્થળેથી ઇન્ડસ્ટ્રીયલ આલ્કોહોલ અને અન્ય શંકાસ્પદ કેમિકલના નમૂનાઓ જપ્ત કરી ફોરેન્સિક તપાસ માટે FSL લેબમાં મોકલ્યા છે.
અધિકારીઓએ ચેતવણી આપી છે કે લોકોના જીવ સાથે ખેલવાડ કરનારાઓ સામે કડક કાનૂની કાર્યવાહી કરવામાં આવશે અને ભવિષ્યમાં આવી ગેરકાયદેસર પ્રવૃત્તિઓ સામે વધુ કડક પગલાં લેવાશે.
આ ઘટનાએ સમગ્ર રાજ્યમાં દારૂબંધીના અમલીકરણ અને ગેરકાયદેસર દારૂના કારોબાર સામે ગંભીર પ્રશ્નો ઉભા કર્યા છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
