‘ડોન-3’ એવી ફિલ્મોમાંથી એક છે જેની સિક્વલની લાંબા સમયથી ફેન્સ રાહ જોઈ રહ્યા હતા. ટ્વિટર પર ફેન્સ સતત આ ફિલ્મ બનાવવાની માંગ કરી રહ્યા હતા. એટલું જ નહીં ફરહાન અખ્તરની દરેક પોસ્ટ પર ફેન્સ કોમેન્ટમાં ‘ડોન 3’ વિશે લખતા રહે છે. ફરહાને મોશન પોસ્ટર શેર કરીને નવી ફિલ્મની જાહેરાત કરી છે. તેણે ફિલ્મનું નામ, કાસ્ટ કંઈપણ જણાવ્યું નથી. આ પોસ્ટ બાદ યુઝર્સ ઉત્સાહિત થઈ ગયા છે. મોશન પોસ્ટર સાથે જે બેકગ્રાઉન્ડ મ્યુઝિક સંભળાય છે તે શાહરૂખ સ્ટારર ફિલ્મ ‘ડોન’નું થીમ સોંગ છે.
— Farhan Akhtar (@FarOutAkhtar) August 8, 2023
‘ડોન 3’નું મોશન પોસ્ટર રિલીઝ
ફરહાને ‘ડોન 3’નું મોશન પોસ્ટર શેર કરતા કોઈ કેપ્શન લખ્યું નથી. મોશન પોસ્ટરમાં ‘3’ દેખાય છે. આ સાથે નીચે લખ્યું છે- ‘નવા યુગની શરૂઆત.’ મળેલા અહેવાલો અનુસાર ડોન 3માં શાહરૂખ ખાન નહીં પરંતુ રણવીર સિંહ હશે. જેના કારણે શાહરૂખના ફેન્સ નિરાશ થયા છે. કોમેન્ટ સેક્શનમાં એક યુઝરે લખ્યું કે, “સસ્પેન્સના ચક્કરમાં ડોન 3 લખવાનું ભૂલી ગયા.” અન્ય એક યુઝરે લખ્યું, ‘પહેલા લોકોને શાહરૂખ ખાન સાથે સમસ્યા હતી. શાહરૂખ ના હોય તો પણ સમસ્યા છે. જો તમારે જોવું હોય તો ઘરે બેઠા મફતમાં સૂર્યવંશમ જુઓ. બીજાએ કહ્યું, ‘કોઈ આ ધૂન કેવી રીતે ભૂલી શકે છે. શાહરુખ સિવાય બીજું કોઈ ન હોઈ શકે.’ એક અન્ય યુઝરે લખ્યું, ‘શાહરૂખ નહી તો ડોન 3 પણ નહી.’
ક્યારે થશે ‘ડોન 3’ રિલીઝ
મળેલા અહેવાલ અનુસાર ‘ગદર 2’ની સ્ક્રીનિંગ સાથે ટીઝર રિલીઝ કરવામાં આવશે. ‘ડોન 3’નું ટીઝર આ અઠવાડિયે જ આવશે. ડોન તરીકે રણવીર સિંહને લઈને ટીમ ખૂબ જ ઉત્સાહિત છે. રણવીર સિંહ સંજય લીલા ભણસાલીની ‘બૈજુ બાવરા’ પૂરી કરશે ત્યારબાદ ‘ડોન 3’ ફ્લોર પર જશે. ફરહાન અખ્તર ફિલ્મના નિર્દેશક હશે. તેને વર્ષ 2025માં રિલીઝ કરવાનું આયોજન છે.
