ભારત વિશ્વમાં સૌથી ઝડપથી વિકસતી અર્થવ્યવસ્થા છે અને તેને વિશ્વ બેંકથી લઈને IMF સુધીની તમામ રેટિંગ એજન્સીઓએ સ્વીકારી છે. હવે વૈશ્વિક રેટિંગ એજન્સી Moody’s તરફથી પણ ભારતીય અર્થતંત્ર માટે સારા સમાચાર આવ્યા છે. Moody’sએ ભારતીય અર્થતંત્રની પ્રશંસા કરતા BAA3 રેટિંગ જાળવી રાખ્યું છે. છેલ્લા કેટલાક વર્ષોમાં વિકસ દર ઘટ્યો છે.
લાંબા સમયથી ચાલી રહેલા રશિયા-યુક્રેન યુદ્ધને કારણે જ્યાં યુરોપના ઘણા દેશોની અર્થવ્યવસ્થા ખરાબ સ્થિતિમાં છે, ત્યાં ભારત શાનદાર વિકાસ દર સાથે આગળ વધી રહ્યું છે. Moody’s ઇન્વેસ્ટર્સ સર્વિસે ગઈકાલે જાહેર કરેલા તેના અહેવાલમાં ભારતીય અર્થતંત્રમાં વિશ્વાસ જાળવી રાખીને ભારતનું રેટિંગ અને આઉટલુક યથાવત રાખ્યો છે. Moody’sના મતે ભારતીય અર્થવ્યવસ્થા આ ગતિએ આગળ વધતી રહેશે. આ સાથે રેટિંગ એજન્સીએ ભારતના લાંબા ગાળાના સ્થાનિક અને વિદેશી ચલણ રેટિંગ તેમજ સ્થાનિક-ચલણ સિનિયર અસુરક્ષિત રેટિંગ BAA3 પર જાળવી રાખ્યું છે. આ ઉપરાંત ભારતના ટૂંકા ગાળાનું સ્થાનિક ચલણ રેટિંગ પણ P-3 પર સ્થિર રાખવામાં આવ્યું છે.
ભારતમાં આવકનું સ્તર વધી રહ્યું છે
ભારત પરનો રેટિંગ એજન્સી Moody’sનો આ વિશ્વાસ પુષ્ટિ કરે છે કે દેશની અર્થવ્યવસ્થા સાચા ટ્રેક પર છે. જો કે રિપોર્ટમાં કહેવામાં આવ્યું છે કે ઝડપી ગતિએ આગળ વધવા છતાં છેલ્લા 7થી 10 વર્ષમાં ભારતના સંભવિત વિકાસ દરમાં ઘટાડો થયો છે. Moody’sએ પણ ભારત પર વધી રહેલા દેવા અંગે ચિંતા વ્યક્ત કરતા કહ્યું છે કે તેનાથી દેશની અર્થવ્યવસ્થા પર અસર પડી રહી છે. પરંતુ તેની સાથે Moody’sએ કહ્યું છે કે ઉચ્ચ GDP વૃદ્ધિને કારણે આવકનું સ્તર પણ વધી રહ્યું છે અને આર્થિક સ્થિરતા જોવા મળી રહી છે.
વિકાસ દર 6-6.5 ટકા રહી શકે
Moody’sનો અહેવાલ જણાવે છે કે BAA3 રેટિંગ અને સ્થિર આઉટલૂકમાં નાગરિક સમાજ અને રાજકીય અસંમતિમાં ઘટાડો પણ સામેલ છે, જે સ્થાનિક રાજકીય જોખમોને કારણે વધુ વકરી છે. એજન્સીએ આશા વ્યક્ત કરી છે કે ઓછામાં ઓછા 2 વર્ષ સુધી ભારત તમામ G-20 દેશો કરતાં વધુ વૃદ્ધિ દર હાંસલ કરશે. તેનું મુખ્ય કારણ સ્થાનિક માંગમાં વધારો છે. આંતરરાષ્ટ્રીય ધોરણો અનુસાર આ ઝડપી વૃદ્ધિ દરને કારણે ઓછી આવકમાં વધારો થશે, જે આર્થિક મજબૂતી તરફ દોરી જશે. Moody’s અનુસાર હવે ભારતનો વિકાસ દર 6 ટકાથી 6.5 ટકા રહી શકે છે.
