ગુજરાતમાં તાજેતરમાં થયેલા ભારે વરસાદના પરિણામે રાજ્યના અનેક માર્ગો અને પુલો પર અસર થઈ છે. ખાસ કરીને નર્મદા કેનાલ નેટવર્ક પર આવેલી પરિવહન સુવિધાઓની સ્થિતિને લઈને રાજ્ય સરકારે ગંભીરતા દાખવી છે. મુખ્યમંત્રી ભૂપેન્દ્ર પટેલના આદેશ બાદ રાજ્ય સરકાર દ્વારા સમગ્ર નર્મદા કેનાલ નેટવર્ક પર આવેલ પુલોની તકનિકી દ્રષ્ટિએ તપાસ હાથ ધરવામાં આવી છે. સરદાર સરોવર નર્મદા નિગમ લિમિટેડ દ્વારા કરાયેલા આ વિશ્લેષણ પછી કેટલીક ચિંતાજનક સ્થિતિ બહાર આવી છે, જેને પગલે તાત્કાલિક પગલાં લેવામાં આવ્યા છે.
ગુજરાત રાજ્યમાં હાલ 69,000 કિ.મી. લાંબું નર્મદા કેનાલ નેટવર્ક છે, જે અંદાજે 17.92 લાખ હેક્ટર જમીનને સિંચાઈ માટે પાણી પૂરુ પાડે છે. આ નેટવર્ક પર અંદાજે 2,110 પુલો કાર્યરત છે, જે રાજ્ય અને રાષ્ટ્રીય ધોરીમાર્ગો તેમજ ગ્રામ્ય માર્ગોને જોડે છે. આ પુલોની સ્થિતિનું મૂલ્યાંકન કરવા માટે તાજેતરમાં સરદાર સરોવર નર્મદા નિગમ દ્વારા વિઝ્યુઅલ નિરીક્ષણ અભિયાન હાથ ધરાયું હતું.
આ અભિયાનના પરિણામરૂપે જાણવા મળ્યું કે 5 પુલ ટ્રાફિક માટે સંપૂર્ણપણે જોખમી છે અને તેમને તાત્કાલિક બંધ કરવામાં આવ્યા છે. આ પુલો મોરબી અને સુરેન્દ્રનગર જિલ્લામાં આવેલી મુખ્ય કેનાલ શાખાઓ પર આવેલી છે, જેમ કે:
- મોરબી – અજીતગઢ-ઘંટીલા રોડ પુલ
- મોરબી – માળિયા બ્રાંચ કેનાલ પુલ
- સુરેન્દ્રનગર – ઢાંકી-છારદ ગામ પુલ
- સુરેન્દ્રનગર – લખતર-વણા પુલ
- સુરેન્દ્રનગર – બાલા ફાર્મ પુલ
4 અન્ય પુલ પર ભારે વાહનો માટે પ્રતિબંધ ફરમાવવામાં આવ્યો છે, જેમાં અમદાવાદ અને પાટણના પુલોનો સમાવેશ થાય છે. ખાસ કરીને વલ્લભીપુર બ્રાંચ કેનાલ અને નરોડા-દહેગામ પુલ પર હવે ટ્રાફિક નિયંત્રણ અમલમાં મૂકવામાં આવ્યું છે.
તે સિવાય 36 પુલ એવા મળી આવ્યા છે જેમને તાત્કાલિક મરામતની જરૂરિયાત છે. તેમને તાત્કાલિક બંધ કરીને સમારકામ શરૂ કરવાના આદેશ તાત્કાલિક અસરથી આપ્યા છે. બાકી રહેલા 2,065 પુલોની સ્થિતિ યથાવત છે, છતાં તેમને ભવિષ્યમાં સુરક્ષિત રાખવા માટે નિયમિત નિરીક્ષણ અને જાળવણી માટે સૂચનાઓ આપવામાં આવી છે.
રાજ્ય સરકાર અને નર્મદા નિગમ દ્વારા આ પગલાં એ દિશામાં મહત્વપૂર્ણ છે કે આવા ઈન્ફ્રાસ્ટ્રકચર માટે નિયમિત મોનિટરિંગ અને જાળવણી જરૂરી છે. મોટા પ્રમાણમાં ટ્રાફિકના દબાણ અને પર્યાવરણીય અસરોના કારણે પુલો પર સતત તાણ રહે છે, અને ભવિષ્યમાં ગંભીર દુર્ઘટનાઓ ટાળવા માટે આવી કાર્યવાહી અનિવાર્ય છે. રાજ્ય સરકારે સ્પષ્ટ કર્યુ છે કે, હવે આ કામગીરીને સતત અને પ્રણાલીકૃત પ્રક્રિયા તરીકે આગળ વધારવામાં આવશે જેથી નર્મદા નેટવર્ક પર આવેલી પરિવહન સુવિધાઓ સુરક્ષિત અને કાર્યક્ષમ રહે.
